Read Timugon Murut SIRAK 28 Bible Online

SIRAK 28 - Timugon Murut bible

SIRAK 28

¹Sangulun ondo' mansuli' balasin ru Tuhan. Untobon ru Tuhan tula nano.

²Kaa' sangulun ondo' nangampun ra kasalaan ru ulun bokon ampunon amon makiasi' io.

³Sangulun ondo' mansuli' ra ulun bokon kalo malansan ra pangampunan intor ra Tuhan.

⁴Amon kalo masaga' io mangampun ra sangulun koson riso, pai' io pakiasi' maa' raginio tula-tula nano ampunon.

⁵Amon sangulun ondo' kalo makalulu' nampauli ra suli', kalo pana malansan io ra tula nano ampunon.

⁶Karaa' noyo ra rondo' paat ra okou matoi am inan muno mootong. Ginio ra langgai' noyo pantulaan am gagaya' no ra ngaangai' susuban.

⁷Karaa' noyo susuban ru Tuhan am pai' no mansuli' ra gino ngai' ulun. Karaa' noyo nabantuan ri Aki Kapuuno' Ondo' Masawat Kaga' am maapon noyo kasalaan ru ulun. Pansangaran

⁸Ulun ondo' minggalur ra pansangaran kalo masuang mambaal ra tula, sabap ra pansangaran simbulukin ru ulun ondo' malasu' guang.

⁹Sangulun ondo' makatula mampajajou ra pangkubayawan; mampatabual io ra pantulaan ra gino ngai' ru ulun ondo' maayag ra mamimio.

¹⁰Gumaai suang pampaang ra apui, gumaai lasu' simbula' ru apui nano. Gumaai kotog guang ru ulun, gumaai poros ru pansangaran nilo. Gumaai gayo kuasa' ru ulun, gumaai poros ru sangit nilo. Gumaai suang ru kalangkayaan nilo, gumaai makalalaa' likokot nilo.

¹¹Pansangaran ondo' sumimbuluk ra namulali' mangkinibit ra pampatayan.

¹²Amon panjut sampuyon, apui nano manimbula'. Amon tiwagin, apui nano malasa'. Karuruo nano binaal ra kabang. Ragu-ragu Malaat

¹³Sangulun ondo' masaga' magabau am manimbaal ra ragu musiti' ulason sabap ra nangkinibit io ra masuang ulun ondo' maayag mamimio maratu'.

¹⁴Sangulun ondo' masaga' manimbaal ra ragu mampagagai ra masuang ulun am ginio ra tumanggau ilo mongoi ra rondo' pagun am pagun ra bokon. Bandar-bandar ondo' maikang pinuso no am sasambaloi ru ulun-ulun makainggalan maayo linunsai no.

¹⁵Sabap ra ragu sinimbaal, andu'-andu' ondo' makapaliso moonsoi inali am ampos ru kandoi nilo ginaau.

¹⁶Ulun ondo' mangkirongog ra ragu sinimbaal kalo makatuum ra guang mamimio am guang luminos.

¹⁷Linapos ra pitol lalapos mangkinibit ra babalis, kaa' ragu-ragu malaat makapandak ra bungul.

¹⁸Masuang ulun maratu' sabap ra ilang, kaa' masuang poyo ulun naratu' sabap ra rila' nilo.

¹⁹Pakaansuk noyo ulun ondo' nakapagiliu intor ra sangitan ru ulun manimbaal ra ragu, am pakaansuk niayuk ulun ondo' kalo mansaan ra saanin koson bagat ru basi' am kalo nabangkil kalayam nano ra rantai ru tambaga'.

²¹Ragu-ragu malaat mangkinibit ra kapatayan ru ulun ra naimbolo', kaa' ra tayar nilo moonsoi poyo matoi intor ra maayag.

²²Ulun motopot kalo makuasa' ru ragu sinimbaal am kalo mosolob ru apui nano.

²³Ulun ondo' mangiruan ra Tuhan masauk inimbolo' ra ragu sinimbaal. Igondo' apui ru ragu sinimbaal sinikitan ra tatanga' risilo, apui no kalo boo maalap ra lasa'. Ragu sinimbaal no inataran risilo koson ra singa' ondo' mansaam am koson ra ampunguon ondo' maminsang-minsang.

²⁴Sala' ka kia tana' linonggom muno inanian mu ra insor am ruit muno pinauli ra intok ondo' kinaputan?

²⁵Koson niayuk ra musiti' ilalain mu ngaangai' rinagu muli. Guango' noyo moonong rinagu muli am kimuto' kabang muno.

²⁶Pagigilai' noyo maa' raginio pai' masuku' masala ragu muno am maratu' kou ra kalindu' ru ulun ondo' maginaa ra kaluagan raginio.