Read Timugon Murut SIRAK 29 Bible Online

SIRAK 29 - Timugon Murut bible

SIRAK 29

¹Magira' am mampasaguli' Sangulun ondo' makaasi' mampaira' ra sambalayan nano, am osoi ondo' mangindangan ra ulun bokon nambaal ra susuban ru Tuhan.

²Musiti' kou mampaira' ra sambalayan muno paat ra ilo matutusan. Amon makautang kou, bayari' noyo utang no paat ra inaru' noyo.

³Suguto' noyo binantu' muno ra guang gumagaya', am moonong bulintok okou makaalap ra atan ondo' gogoton muno.

⁴Masuang ulun mangkara' ra ondo' iniraan koson ra kuliamos ondo' naalap nilo, saboi mantipagon ra ulun ondo' mangindangan risilo.

⁵Mokoondo' ulun mindagu ra guang minggana' am mangalok ra kalindu' ru ulun bokon saboi makaira' ra rapu' nano. Kaa' amon makasuku' bulintok ru utang nano musiti' bayarin, rayus io mampainjul am mindagu ra bulintok nano kalo naulian, kapoam ra ragu-ragu ondo' kolondo' puun nano.

⁶Amon ru ulun nampaira' no rumayus jumajal, maringkuanang noyo io amon mabaya' ra pagon no nakaalap ra sampiruo no saguli'. Amon ru kalo, ulun nampaira' no mampagaau ra ruit nano am ra kolondo' sasaban nampasauk riso ra pantula' nano. Sala' ka mangurumat io, kaa' magulas, mangiis am magasab ra ulun ondo' nampaira' riso no.

⁷Ginio ra masuang ulun kalo masaga' mampaira', sala' ka sabap ra malaat, kaa' sabap ra malaa' gaawon ayuk lalayau. Mangani' ra taak kaindanganan

⁸Kabalu' pana raginio, oroto' noyo guang ra ulun musikin. Pai' polosoo' ilo maginaa ra taak indangan muno.

⁹Nanusub Tuhan ritakau koson mangindangan ra ulun musikin; sabap ra ilo natutusan, pai' susubo' ilo mugar ra kolondo' atan-atan.

¹⁰Moonsoi poyo ruit muno kalio sabap ra mangindangan ra pabukat kapoam rangan, intor ra kalio sabap ra nontogol ra ragana' ru batu.

¹¹Pakayo' noyo ra rapu' muno sumugut ra susuban ru Tuhan Ondo' Masawat Kaga'; baal raginio mokoonong poyo rirun ka mampauli ra kalangkayaan muno tayar ra inan muno galama'.

¹²Taak indangan ra ulun musikin musiti' no masauk ra rapu' muno; ondo' baalon moonsoi muno mamayag rirun intor ra ngaangai' kapaganan.

¹³Ralalom pansangaran ra pantula', ondo' baalon moonsoi muno maikang poyo intor ra perisai ondo' maikang am tutura' ondo' maagat. Manampilon ra utang ru ulun bokon

¹⁴Ulun ondo' moonsoi paliso manampilon ra utang ru sambalayan nano. Ulun ondo' kalo mapandai mauyu' kalo mambaal koson raginio.

¹⁵Pai' liliani' binaal moonsoi ru sangulun ondo' nanampilon rirun, sabap okou noyo nangkinuo io ra painawo nano.

¹⁶Sangulun ondo' makatula' manabulus ra rapu' ru ulun ondo' manampilon riso,

¹⁷am sangulun ondo' kalo mapandai maringkuanang mampalilian ra ulun nangindangan riso.

¹⁸Sabap ra manampilon ra ulun bokon, masuang ulun langkaya' nailusan ra rapu' am kakasiling ralalom kapaganan ondo' maayo. Ulun ondo' makainggalan ra maayo nailusan ra baloi am tumanggau kalalaat ra pagun-pagun ru bokon.

¹⁹Ulun makatula' ondo' gumogot sumauk ra ulun manampilon ra utang koson mangilou ra kalabaan makalabit ralalom ukum ru undang-undang.

²⁰Indangano' noyo ulun ra bokon maya' ra kaandaran muno, kaa' pagigilai', pai' saboi ra okou galama' maratu' sabap raginio. Magayan ra baloi ru ulun

²¹Gogoton kasaa' ralalom kaayagan iono timug, akanon, bayang, am baloi intok sindungan.

²²Moonsoi poyo maayag ra musikin giu' ra kalukub galama' intor ra mangakan ra akanon mangaamis giu' ra baloi ulun langkaya'.

²³Okou musiti' no majala' ra atan ondo' linonggom muno, masuang kapoam sanganu, am okou pana kalo boo asabin sabap ra magayan ayuk.

²⁴Naimbolo' noyo kaayagan ru sangulun ondo' sotopot no tumanggau intor ra baloi ka baloi, sabap koson ra sangulun tambului kalo iowon io mindagu.

²⁵Manguma' io ra tambului am nansulung ra inumon, kaa' kolondo' sangulun pana maringkuanang riso. Inambai ra pinaining io ra ragu-ragu ondo' mampakaruol ra guang koson ra,

²⁶“Okou ulun tumanggau, tomposo' mija' no! Amon mokoondo' kou ra atan pana, anii' aku ra akanon.

²⁷Okou ulun tumanggau, ugar no koson mangani' ra intok ra ulun urumaton. Matong pabukat kuno am makapakuan aku ra intok muno!”

²⁸Tayar ru ulun ondo' moonsoi paliso, maagat kaga' amon lulutaan sabap ra magayan ra baloi ru ulun am inasaban ru ulun mampaira'.