Read Timugon Murut SIRAK 30 Bible Online

SIRAK 30 - Timugon Murut bible

SIRAK 30

¹Mangila' ra Anak Sangulun ama' ondo' motogom ra anak nano masalok mampalamba' riso maa' raginio anak no masauk ra kinamanggo nano paat ra orou tauli.

²Sangulun ondo' mangila' ra anak nano ra moonsoi mokoowot ra jala' intor raginio. Makapamanggo io ra anak nano ra gino ngai' ru ulun nauligan nano.

³Sangulun ondo' mangila' ra anak nano ra moonsoi, kalo ayuk maayo guang ra saang ru rangan-rangan nano, kaa' niayuk nambaal ra pantula' nano sumolon.

⁴Buoi ru bayag nano makaansuk io paat makakito ra anak nano. Paat ra matoi, kalo mangiluk io. Sotopot no, kalo matoi io, sabap ra nangiruan io sangulun anak ondo' sumalu toojo riso.

⁶Nangiruan io ra sangulun ondo' mansuli' ru pantula'-pantula' nano am mambalos ra kinoonsoi ru rangan-rangan nano.

⁷Kaa' sangulun ondo' mampalaya' ra anak nano mapilatan guang nano. Mangiluk guang nano ra moonong makaining ra tangi' ru anak nano.

⁸Kuda ondo' kalo kinakaup sumauk ra bambalingatan. Koson niayuk ra baal no ra anak ondo' kalo inila' ra matanda'.

⁹Sangulun ondo' mananggal ra anak nano am makimangkuli riso, pangkauson guang ra orou tauli am pangilukon no.

¹⁰Ulun ondo' raino makakurit mabaya' ra anak nilo, mantangi' ilo ra orou tauli no am pupus no manguritot ripon sabap ra pansagulian.

¹¹Pai' anii' anak muno ra kalabusan paat ra io mamulok am pai' no mitambingai ra kalo makakito ra kasalaan nano.

¹²Pakukuo' noyo am loposo' noyo io paat ra lalaing maa' raginio mangurumat io ra kuasa' muno. Amon kalo, sumauk io ra sangulun mokotog ulu, kalo gumagaya' rirun, am mampangiluk rirun.

¹³Ginio ra ilaa' noyo anak muno maa' raginio moonsoi paliso. Pirot no koson mangila' riso maa' raginio okou kalo boo maruol guang sabap ra mampakauyu' io rirun. Kaligagan

¹⁴Moonsoi poyo musikin kaa' maligag am maikang, intor ra langkaya' kaa' masalok marualan.

¹⁵Inan ra maligag am maikang mologo poyo intor ra mas am kalangkayaan maayo.

¹⁶Kolondo' kalangkayaan ondo' makasail intor ra kaligagan ru inan, am kolondo' katasuan ondo' makasail intor ra kaansukan ru guang.

¹⁷Moonsoi poyo matoi am tumangus mantilayun intor ra maayag maimbolo' sabap ra masalok marualan.

¹⁸Mampasulung ra akanon maamis ra ulun ondo' marualan nogondo' niayuk koson mampabanta' ra akanon rasawat ru kalabangan.

¹⁹Kolondo' onong no koson mampasulung akanon ra sinungkalalaing, sabap ra sinungkalalaing no kalo mangakan kapoam mongolok ra owou nano. Koson niayuk baal ru sangulun ondo' inimbolo' ru Tuhan;

²⁰magilong io ra akanon nano am mampalaa koson ra ulun ondo' kinambiri' gumanggol ra sangulun ralaa. Kaansayan am kangilukan

²¹Pai' babaya' ra kangilukan am pai' no singon mangimbolo' ra inan galama'.

²²Guang ra maansukan mampagawar ra umur ru ulun am maayag ra maansukan.

²³Simoyoo' noyo guang muno am pakaansuk no. Patiri' noyo kangilukan muno ra maalur, sabap ra kangilukan kalo igondo' mauli', am poyo namuso ra masuang ulun.

²⁴Kaimamangan mambaal ra ulun mataki' matutuo; guang sumolon am kasangitan mampariwa' ra umur.

²⁵Ulun ondo' maansukan am moonsoi guang masuung mangakan.