Read Timugon Murut SIRAK 32 Bible Online

SIRAK 32 - Timugon Murut bible

SIRAK 32

¹Amon okou pinasauk ra tingganai ru bunsag, pai' pakikiilong koson ra ulun maatang. Tiluo' noyo koson ra ulun bokon am pagayam no ra tambului-tambului ra kalo poyo okou galama' manturung.

²Mopongo mambaal ra ngaangai' kandoi muno, bagu no okou makapanturung am makakaluagan mabaya' ra ulun bokon. Okou pana urumaton sabap ra pinaugar mu noyo kandoi ra matanda'.

³Amon matutuo kou noyo, makaindagu kou, sabap ra baal raginio okou ra kuasa'. Kaa' musiti' kou mindagu koson ra ulun ondo' makakapandayan am pai' jojowo' miujik.

⁴Pai' indagu tatanga' ru maririmbai no; bulintok raginio kalo motopot koson mampakito ra kapintaran muno.

⁵Koson ra batu ru dalima' ralalom ru bingkai ru mas, koson niayuk ra miujik paat ra bunsag ru wain.

⁶Miujik ondo' painingon mabaya' ra wain matamis koson ra batu jamrud ralalom ru bingkai mas.

⁷Amon lakat kou poyo mamulok, indagu no ru maatang ayuk, pai' masailan intor ra induo, am amon kuatin ayuk.

⁸Raguon muno musiti' mariwa' am motopot. Sauk no ra ulun ondo' makapandai ra masuang kaa' mongkoror ayuk.

⁹Giu' ra saang ru ulun nauligan toojo, pai' salu koson ra okou ti nogondo' risilo, am pai' tutului pakimansunur amon ru ulun bokon tatanga' mindagu.

¹⁰Koson ra ganit magulu intor ra tingkalur, koson niayuk ra inggalan moonsoi magulu ra ulun ondo' minggana' guang.

¹¹Iruani' noyo bunsag ra bulintok no masuku' am pai' noyo tumauli muli'. Pai' pagiginaa giu' ra kulobon, kaa' ugar no ra mataki'.

¹²Giu' ra baloi muno mangkukuli kou am mambaal ra atan ayuk kasagaan ru guang muno, kaa' pai' pakatula sabap ra mansusunur.

¹³Suai raginio paringkuanang noyo Riso Nambaal muno ondo' nampalaba rirun ra taak-taak ondo' moonsoi. Ralan mambala' ra arati' ru Ukum ri Aki Kapuuno'

¹⁴Ulun ondo' malaa' ra Tuhan gumagaya' ra sawai Nano. Barakaton ru Tuhan ulun ondo' tumirong ra susuab ti koson makiasi' Riso.

¹⁵Osoi ondo' mimumui ra Ukum makarati' kaga' ra Ukum no. Kaa' ulun ondo' kalo totopot maratu' sabap ru ginio.

¹⁶Ulun ondo' malaa' ra Tuhan makapandai ra atan ondo' motopot, am ilo mauligan toojo sabap ra baal ondo' moonsoi.

¹⁷Ulun ondo' makatula kalo masaga' mangapu ra sawai, am mambala' ra arati' ru Ukum maya' ra kasagaan galama'.

¹⁸Ulun ondo' mapintar mampaguang ra moonong pamaguangan, ali ka ulun ondo' malimbau toojo[45] am ulun ondo' masawat guang kalo mapandai mauyu'.

¹⁹Karaa' ra kalo poyo mimbuor kou, am okou kalo pana pansagulian guang muno ra binaal muno.

²⁰Pai' kiralano' ralan ondo' makalalaa' maa' raginio kalo makasaru kou ra batu-batu nano.

²¹Pai' masailan kalansanan giu' ra ralan ondo' kalo poyo nauligan muno.

²²Pagigilai' noyo ra masalok ralan-ralan ondo' kiralanon muno.[46]

²³Ilalain noyo[47] ralalom ngaangai' binaal muno; am koson raginio okou mambaal ra susuban ru Tuhan.

²⁴Ulun ondo' gumagaya' ra ukum mambaal ra susuban ru Tuhan, am ulun ondo' mangintopot ra Tuhan kalo malubatan.