Read Timugon Murut SIRAK 33 Bible Online

SIRAK 33 - Timugon Murut bible

SIRAK 33

¹Sangulun ondo' malaa' ra Tuhan kalo matiu' ru karaat; kaa' masalok io bayagon ru Tuhan ralalom ru pangkinaman.

²Ulun ondo' mapintar kalo masisang ra Ukum, kaa' ulun ondo' kalo mabanis guang malinggan-linggan koson ra parau ralalom ru bagiu'.

³Sangulun ondo' mapintar, mangintopot ra Ukum koson mangintopot io ra inala' matulai.

⁴Tuyuo' noyo ragu-ragu muno, am rongogon kou ru ulun. Kalo poyo tumaam, luluro' noyo atan ondo' napandayan muno.

⁵Karaan ru ulun sasambungon koson ra luda' ru kurita' ondo' marayus lumimbokou.

⁶Rangan ondo' masaga' manginguli' koson ra kuda ondo' makimampaa'; kuda no rumayus magipaturau kabalu' pana sakayin ru osoi ayuk. Ngaangai' ulun nansasala'

⁷Kua kia rondo' orou matulai poyo intor ra orou-orou ra bokon, kabalu' pana sabuoi ru bilor no moonong orou masinda ru nogondo' mato ru orou?

⁸Tuhan Ondo' Makapandai Kaga' nampasuai ra orou-orou i, saboi mokoondo' ra orou ru bunsag am paat ra luntukon rondo'.

⁹Kukula' ngoorou inaru' Nano koson ra orou pangiantakan ondo' matulai, ali ka orou-orou ru bokon pinasauk No ra orou kaindalaman.

¹⁰Koson ri Adam, moonong ulun sinauk intor ra tana'.

¹¹Kaa' Tuhan, ralalom kapintaran Nano nampasauk risilo ra mansasala', am sigagama' inanian ra ralan ondo' mansasala'.

¹²Mokoondo' binarakat am pinainsawat ru Tuhan, mokoondo' niayuk ondo' pinatulai am pinainggaar Riso. Kaa' mokoondo' niayuk ondo' inulas am pinainggana' am pinagiru' intor ra intok nano.

¹³Koson ra tana' labu' giu' ra kalindu' ru ulun manukang ra pagangan ondo' inayur maya' ra kasagaan nano, koson niayuk ra ulun giu' ra kalindu' ru Io Nambaal ondo' pinamakuan risilo maya' ra kasagaan Nano.

¹⁴Ondo' moonsoi no gumula' ra ondo' malaat, am kaayagan gumula' ra kapatayan. Koson niayuk ra ulun ondo' makatula gumula' ra ulun ondo' gumagaya' ra Tuhan.

¹⁵Ilai' no ngaangai' kandoi ru Tuhan Ondo' Masawat Kaga'; ngaangai' no binaal mantutuop, rondo' no gumula' ra bokon no.

¹⁶Aku galama' minatong pupus koson mantamung, koson ra ulun ondo' manganam ra atan ondo' pinatatang ru ulun nangupu' ra kawa' ru anggur.

¹⁷Mabaya' ra barakat ru Tuhan makaampos aku ra moonsoi koson ra sangulun nangupu' ra kawa' ru anggur ondo' nakapanuang ra intok pamagaan ra kawa' ru anggur nano.

¹⁸Kaa' pakapandai noyo ra kalo mambaal aku ra ngaangai' no ra tayar ru inan kuno galama', kaa' ra tayar ru ngaangai' ulun ondo' gumogot migila'.

¹⁹Rongogo' noyo am ilai' noyo ragu-ragu kuno, akau ngai' tingganai ru bansa' am tingganai ru ulun! Pai' makuasa' ru ulun bokon

²⁰Sabuoi ru bayag muno, pai' polosoo' inan muno kuasaan ru ulun ra bokon, ru anak muno, andu' muno, pabukat muno kapoam rangan muno. Pai' taaki' rapu' muno ra ulun bokon, maagu no pansagulian guang muno am musiti' kitaakon saguli'.

²¹Buoi ru painawo soroi ra inan, pai' taaki' intok muno ra osoi pana.

²²Moonsoi poyo malansan anak-anak muno rirun intor ra malimpatui.

²³Musiti' kou mantamung ra ngaangai' ondo' binaal muno, am pai' polosoo' inggalan muno jamalin.

²⁴Taaki' noyo tinungkus muno paat ayuk ra pupus ru kaayagan muno, amon mamaar noyo bulintok ru pamukatan muno. Ralan pamakuan ra ulun mangandoi

²⁵Sanginan kaladai musiti' aniin ra sakot am saanin am niayuk lambaan ra susukur. Sangulun mangandoi musiti' aniin ra akanon am kandoi am niayuk ilaan ra matanda'.

²⁶Susubo' noyo mangangandoi muno mangandoi, am makatangus kou. Amon polosoon milampuag, maguyum io ra kalabusan.

²⁷Sanginan tambiag maalap kaupon ra kuk am kakang; sangulun mangangandoi ondo' malaat musiti' tagion am ukumin.

²⁸Susubo' noyo io mangandoi am pai' polosoo' io milampuag, sabap ra kalampuagan magibit ra ulun no malaat.

²⁹Ginio ra susubo' noyo mangngandoi muno mangandoi ra sotopot no, am amon kalo gumagaya' io, rantayo' io.

³⁰Kaa' pai' najanjayan malasang ra osoi pana am pai' baalo' atan-atan ondo' kalo matimpok.

³¹Amon mokoondo' kou ra sangulun mangngandoi, pamakuan riso no koson ra okou galama' moogot moonsoi pamakuan, sabap ra binali mu noyo io pinaaya' ra ampos ru pirot muno.

³²Pamakuan riso koson ra pabukat muno, sabap kalo maayag kou ru kolondo' io.

³³Amon pamakuan muno riso malaat am nagiru' io, ati kia' paguyuman muno riso?