Read Timugon Murut SIRAK 34 Bible Online

SIRAK 34 - Timugon Murut bible

SIRAK 34

¹Inupi ra kolondo' arati' Sangulun ondo' sasambungon nakalayau ra kolondo' kalansanan, am karaan nano lalayau sabap ra inupi.

²Ulun ondo' mangintopot ra inupi koson ra ulun ondo' mamparakop ra babara' kapoam mangilou ra angin.

³Ondo' inilayan ralalom ru inupi koson ayuk ra tampulau ru bulos ralalom ru saramin.

⁴Ondo' majamol kalo manangampos ra mapasau, koson niayuk ra inupi kalo manangampos ondo' motopot.

⁵Inupi, nujum, am mangilong no inupi ayuk, koson ondo' makito ru sangulun ruandu' ondo' marualan ra maganak.

⁶Pai' pagilong ra inupi, ondo' ak am ondo' minatong intor ra Tuhan.

⁷Inupi mampakalayau ra masuang ulun; ondo' mangintopot raginio makasunsuyar.

⁸Ukum maukapan ra kolondo' inupi ondo' mampakalayau, am kapintaran matanda' noyo amon rinagu ru ulun ondo' maintopot. Tanggau

⁹Sangulun ondo' masuang tinanggawan, masuang niayuk napandayan nano. Sangulun ondo' masuang nailian nano mindagu mabaya' ra napanu' pangaratian.

¹⁰Sangulun ondo' kalo kukula' nailian nano sanganu ayuk napandayan nano. Kaa' mabaya' ra inugaran, ulun no nanimung ra kapandayan.

¹¹Ralalom inugaran-inugaran kuno, masuang noyo nakito kuno am nailian kuno, masuang poyo intor ra raguon kutu.

¹²Masalok aku ralalom laa' ru kapatayan, kaa' binayag aku mabaya' ra nailian-nailian no. Malaa' ra Tuhan

¹³Ulun ondo' malaa' ra Tuhan magulayun maayag, sabap ra malansan ilo Riso ondo' mampakaayag.

¹⁴Ulun ondo' malaa' ra Tuhan kalo igondo' kalaa' am magalabo, sabap ra Tuhan iono lansanin nilo.

¹⁵Pakaansuk noyo ulun ondo' malaa' ra Tuhan, sabap ra nakapandai ilo ra osoi lansanin.

¹⁶Magilong Tuhan ra ulun ondo' motogom Riso; masauk Io ra sindungan ondo' maikang am sandigan ondo' mapiot ra tayar nilo. Manindung Io risilo intor ra angin malasu' am orou mapangit, am niayuk mangindangan am magalung risilo maa' raginio kalo makasaru am maratu'.

¹⁷Nambaal Io ra guang nilo maansukan am mato nilo suminda. Mambarakat Io ra kaayagan nilo am mangani' risilo ra kaligagan. Taak simbalui ondo' motopot

¹⁸Ulun ondo' mampataak ra rorondo' ondo' noowot pinabaya' ra lapau, nambaal ra baal ondo' masiwou. Taak simbalui intor ra ulun malaat kalo apuon.

¹⁹Io Ondo' Masawat Kaga' kalo masaga' ra taak simbalui ondo' pinataak ru ulun malaat, am taak simbalui ondo' masuang kalo manangampos ra pangampunan.

²⁰Ulun ondo' mangalap ra longgom ru ulun musikin am pataakon no koson ra taak simbalui, nogondo' ra ulun ondo' mamatoi ra sangulun anak ra saang mato ru ama' nano.

²¹Tayar ru ulun musikin, akanon iono mamparayus ra kaayagan. Ginio ra mangalap ra akanon intor risilo nogondo' ayuk koson mampatoi risilo.

²²Paat ra gumaau ra rapu' ru ulun bokon kapoam manginga' ra ayup ru sangulun ulipon, baal raginio nogondo' ayuk koson mampatoi riso.

²³Amon ru rondo' ti manirong am ondo' bokon no mamunsai, atan nua' ampos nano suai ra bagui?

²⁴Amon ru rondo' no mambarakat am bokon no magulas, osoi nua' rongogon ru Tuhan?

²⁵Amon ru sangulun mangimpasau ra inan galama' kalupus nakakambong ra baangkai, kaa' kumambong poyo, atan onong nano mangimpasau ra inan?

²⁶Paat sangulun mampali sabap ra tula-tula nano, kaa' minongoi pambaal ra tula ondo' nogondo', atan onong nano minggana' guang mabaya' ra mampali? Osoi nua' ondo' mangkirongog ra pakiasian nano?