Read Timugon Murut SIRAK 35 Bible Online

SIRAK 35 - Timugon Murut bible

SIRAK 35

¹Gumagaya' ra Ukum nogondo' logo nano koson mampataak ra taak simbalui ondo' masuang, am gumagaya' ra susuban ru Tuhan nogondo' ayuk logo nano ondo' mampataak ra taak simbalui koson makibarakat ra Tuhan.[48]

²Paat mambalos ra kinoonsoi, nogondo' noyo magibit ra taak simbalui koson paringkuanangan ra Tuhan,[49] am mangani' ra taak indangan nogondo' ra mampasaboi ra taak simbalui ru paringkuanangan.

³Ulun ondo' minggalur ra tula mapabansuk ra guang ru Tuhan, am ulun ondo' mangimpai ra kalaatan ampunon tula nilo.

⁴Kaa' pai' no ongoi ra Baloi ru Tuhan ra kolondo' ibiton, sabap ra ukum manusub ra musiti' takau magibit ra taak.

⁵Amon ulun mabanis guang mampataak ra taak simbalui, lomok intor ra taak simbalui nilo mingkual ra rasawat ru altar am maamis owou nano magaloi mongoi saang ru Io Ondo' Masawat Kaga'.

⁶Tuhan masaga' ra taak simbalui intor ra ulun mabanis guang am kalo lilianin no.

⁷Omporo' noyo Tuhan ra taau ru guang, am pai' pagingkalit bulintok mampataak ra tayar kasaa' ampos ru tana' muno.

⁸Ibito' noyo moonong taak muno mabaya' ra bulos ondo' maansukan am taaki' noyo taak simbalui sampiopor muno mabaya' ra guang maansukan.

⁹Anii' noyo Io Ondo' Masawat Kaga' ra taak ondo' nogondo' ra taak Nano rirun; taaki' no taak mabaya' ra taau ru guang am mabaya' ra kaandaran muno.

¹⁰Pambaal no koson raginio sabap ra Tuhan noyo ondo' mangani' ra pangayupan; mambalos Io rirun saboi ra intulu' ruli'. Tuhan no Matimpok

¹¹Pai' kinami' mampasuu' ra Tuhan, sabap ra kalo apuon no. Pai' niayuk malansan ra taak ondo' kalo mapasau,

¹²sabap ra Tuhan no akim, am io kalo pilion osoi saungon.

¹³Io kalo pilion osoi saungon ralalom baal ru ulun musikin, kaa' rumongog ra pakiasian ru ulun ondo' kalo matimpok pinamakuan.

¹⁴Kalo mangimpai Io ra pakiasian ru lalaing nailusan ra matuo kapoam ruandu' napuor ondo' nampabala' ra suang ru guang.

¹⁵Lomou ru mato tumulisan ra pingas ru sangulun napuor ondo' giminolok sumonsol ra ulun ondo' nampatangi' riso.

¹⁶Tuhan mansayan ra ulun ondo' mangandoi Riso am pakiasian nilo makasuku' ra limbowon.

¹⁷Pakiasian ru ulun musikin makaantos ra gaun, am ilo kalo makaansuk amon ru kalo poyo nakasuku' pakiasian nilo ra Tuhan.

¹⁸Kalo lumonggo' ilo saboi Io Ondo' Masawat Kaga' magilong risilo am paugaron katimpakan am niayuk sumaung ra ondo' motopot.

¹⁹Mataki' Tuhan tumimbalos; kalo tumaan guang Nano ra ulun malaat.

²⁰Ukumin No bansa'-bansa' am pusoon no ulun ondo' kalo nakaulig ra guang makaasi'.

²¹Sampulalai ulun ondo' minsawat guang kinala, am kuasa' ru ulun malaat pinagaba' no.

²²Moonong ulun balasin nogondo' ayuk ra binaal am inatangan nano.

²³Manaung Tuhan ra ulun Nano, am makaansuk ilo sabap ra guang makaasi' Nano.

²⁴Motopot noyo rinatangan ru guang makaasi' ru Tuhan ra tatanga' ru kapaganan, koson ra rasam ondo' rumatu' bulintok tampio.