Read Timugon Murut SIRAK 37 Bible Online

SIRAK 37 - Timugon Murut bible

SIRAK 37

¹Rangan ondo' kalo motopot Moonong ulun makapangiou ra inan galama' ti rangan, kaa' mokoondo' rangan inggalan ayuk toojo rangan.

²Paat ra sangulun rangan masauk ra pantula', namparatong io ra kangilukan koson ra kapatayan.

³Aibui boo malaat guang! Ati nua' intor ru puun nano, saboi nototop tana' ti ra pamparuungan?

⁴Mokoondo' ulun ondo' makaaya' makaili' ra katasuan ru rangan nano. Kaa' paat ra kapaganan ru rangan nano, sumauk io ra pantula'.

⁵Mokoondo' ulun mangindangan ra rangan nano paat makaalap ra kalabaan intor raginio, manindung io ayuk ra inan nano galama'.

⁶Pai' liliani' sangulun rangan ondo' motopot, pai' liliani' io ra tatanga' ru kalangkayaan muno. Pai' Pangkirongog ra bilin lalayau

⁷Moonong ulun mambibilin manaak ra bilin nano, kaa' mokoondo' ulun mangani' ra bilin koson kaatangan galama'.

⁸Ilalai' noyo sangulun mambibilin. Imumuyi' galing atan kaatangan nano ralalom ru baal raginio, sabap ra io niayuk mangkara' ra kaatangan nano galama'. Ati lair ru kukulion kou ayuk

⁹am mindagu ra ngaangai' no moonsoi ra tayar muno, am maginaa koson magilong atan masauk rirun.

¹⁰Pai' pakibilin intor ra ulun ondo' kalo malansan rirun, am bunio' noyo inatangan muno intor ra ulun ondo' sumolon rirun.

¹¹Pai' pakimansunur ra sangulun ruandu' intor ra pagilou nano; ra sangulun ondo' malaa' intor ra pangayawan; ra sangulun ulun mantatalan intor ra kitaakon; ra sangulun mambabali intor ra talanon; ra sangulun ondo' sumolon intor ra paringkuanangan; ra sangulun ondo' mapuka' intor ra moonsoi; ra sangulun ondo' matiar intor ra kandoi; ra sangulun mangngandoi makabulintok intor ra momongo ra kandoi; ra sangulun ulipon ondo' matiar intor ra masuang kandoi. Pai' lioo' atan pana bilin ondo' taakin nilo.

¹²Suai raginio lioo' ra masalok ulun ondo' motopot ondo' natutun muno mambaal ra susuban-susuban ru Tuhan, ondo' rondo' guang rirun am mangiluk guang paat ra okou kalo nakasugut.

¹³Pangintopot noyo ra bolos ru guang muno, sabap ra kolondo' gumagaya' poyo rirun suai ra guang muno galama'.

¹⁴Sanganuan guang ru ulun moonsoi poyo mangani' ra pambalaan intor ra tulu' ngaulun ulun mantamung giu' ra rasawat ru manara ondo' masawat.

¹⁵Kaa' ondo' maatang, pakiasi' no Riso Ondo' Masawat Kaga' maa' raginio mangila' Io rirun koson tumimbalos ondo' motopot. Kapintaran ondo' motopot am ondo' kalo motopot

¹⁶Karaan ra kalo poyo mimbuor am atangon ra kalo poyo mambaal ra atan ayuk.

¹⁷Mokoondo' apat baal ondo' manulu' ra kulawan ru guang: moonsoi am malaat, maayag am matoi. Kaa' kuasa' ra kasalingai' soroi ra rila'.

¹⁹Maaru' lair sangulun mapandai mangila' ra masuang ulun, kaa' kolondo' onong ra inan nano galama'.

²⁰Maaru' lair mapandai io mindagu, kaa' matoi maitilan sabap ra kasisangin ru ulun.

²¹Koson raginio baal no sabap ra kolondo' kapintaran nano, am Tuhan pana kalo nangani' riso ra taak no.

²²Mokoondo' ulun mapintar koson ra inan nano galama' am mindagu ra ampos ru kapintaran nano maintopot.

²³Sangulun ondo' mapintar sumauk ra ulun mangingila' ra tayar ru bansa' nano, am ampos ru kapintaran nano totopot maintopot.

²⁴Sangulun mapintar inompor toojo, am ngaangai' ulun ondo' magilong riso mindagu ra io makaansuk.

²⁵Kaayagan ru ulun sangkinolor ayuk, kaa' umur bansa' ru Israil kalo mauntob.

²⁶Sangulun mapintar maintopot ru bansa' nano, am io karaan koson ra sabuoi-buoi no. Kinuasa' ru kalaayan ru guang

²⁷Anak kuno, buoi ru bayag muno tutuno' noyo inan muno am ilai' noyo ra atan ondo' kalo moonsoi rirun, am pai' rayuso' polosoo'.

²⁸Sala' ka ngaangai' maaya' ra moonong ulun, am sala' ka moonong ulun makasia' ra ngaangai' no.

²⁹Pai' no ra kalo majala'-jala' gumogot ra kalaayan ra atan pana, am pai' no koroot ra akanon.

³⁰Ulun ondo' najanjayan suang ru akan masauk ra marualan, am ulun moroot marualan ra tinai'.

³¹Masuang ulun moroot nakatuum ra kapatayan. Inggaluri' noyo baal raginio, am okou pana maayag ra mabuoi poyo.