Read Timugon Murut SIRAK 39 Bible Online

SIRAK 39 - Timugon Murut bible

SIRAK 39

¹Kaa' sala' baal intor ra sangulun ondo' mapirot am matasik migigila' ra ukum ri Aki Kapuuno' Ondo' Masawat Kaga'. Mangimumui io ra kapintaran ru ulun paat ra galing i am mirot mintutun toojo ra ragu-ragu inala'.

²Mangkara' Io ra pangilaan ru ulun nauligan toojo am mintutun ra arati' ru abig.

³Mangimumui Io ra arati' ondo' nakasibuni ralalom ru inuui am maalap pakabala' tayar-tayar ondo' mapagon ralalom arati' ru abig.

⁴Nangandoi Io ra gino ngai' ru ulun mangaatang am minongoi ra saang ru ngaangai' panguasa'. Sinuku' no pagun-pagun ru bokon sabap ra moogot makapandai ra atan ondo' moonsoi am malaat ra ulun.

⁵Tumirong io ra susuab ti am makiasi' ra Tuhan Nambaal riso. Mabaya' ra bolos mosongou makiasi' io Riso Ondo' Masawat Kaga' maa' raginio mangampun ra tula-tula nano.

⁶Amon iniou ru Tuhan ondo' matulai, nototop io ra pangaratian. Ragu-ragu ru kapintaran miningkual intor ra kabang nano am maringkuanang ri Aki Kapuuno' ralalom ru pakiasian.

⁷Mokoondo' io ra kapandayan am pangaruan ra motopot, am mampaguang ra ondo' inopot ru Tuhan.

⁸Nanulu' Io ra pangilaan ondo' pinataak riso, am mamanggo io ra Ukum am nabantuan ru Tuhan.

⁹Pangaratian nano omporon ru masuang ulun, am kalo malilianan io sabap ra inggalan nano kinara' papag ka papag.

¹⁰Kapintaran nano tunungon ru bansa'-bansa' ra bokon, am omporon io ralalom santimungan ru ulun.

¹¹Amon ru maawar umur nano, nanatang io ra inggalan ondo' moonsoi toojo, kaa' amon minatoi io ra kalo poyo nauligan kaga', baal raginio sama' noyo riso. Pangamparan ri Aki Kapuuno'

¹²Lakat poyo masuang pamaguangan ondo' masaga' kuno pasukuon, sabap ra nototop aku koson ra sila' ru salawang.

¹³Pangkirongog no raki', akau ngai' ru anak kuno ondo' mangintopot ra Tuhan; mungkalar kano koson ra puun ros giu' ra kiing ru sungoi.

¹⁴Mungkalar kano koson ra busak bakung am polosoo' noyo owou maamis mino mokototop ra ngaangai' intok koson ra kaminyan. Parimbai no ra rimbai mongompor ra Tuhan am paringkuanang no Riso ralalom ru ngaangai' binaal Nano.

¹⁵Potonowo' noyo katulayan Nano ra ompor ondo' natikop ra guang maringkuanang. Rimbayo' noyo rimbai ragitio pabayaan mangkuli ra jitor:

¹⁶Moonsoi toojo ngaangai' binaal ru Tuhan; ngaangai' susuban Nano nasugut ra paat nano.

¹⁷Pai' pangkuot, “Atan gitio? Kua koson raginio?” Ngaangai' no taamon ra bulintok nano. Mabaya' ra susuban Nano timug mujuk koson ra ombon; sabap ra ragu Nano timinimung timug ralalom ru kulam.

¹⁸Mabaya' ra susuban Nano nasauk noyo ngaangai' ondo' iniou Nano; kandoi pamayagan Nano kolondo' polos.

¹⁹Magilong Io ra binaal ru ngaangai' ondo' maayag; kolondo' nakasibuni Riso.

²⁰Intor ra talimpuun saboi ra pupus no mantilayun Io magilong raginio; kolondo' ondo' makaimuag Riso.

²¹Pai' pangkuot, “Atan gitio? Kua koson raginio?” Ngaangai' binaal mokoondo' kuayan nano.

²²Barakat Nano lumuab koson ra sungoi, koson ra luab ru timug manimug ra tana' mapua'.

²³Nampalumpa' Io ra kasangitan Nano ra bansa'-bansa', koson paat ra Io nangulau ra timug mapalo masauk ra maasin.

²⁴Ralan-ralan ru Tuhan marata' ra tayar ru ulun moonsoi guang, kaa' nototop ra ompong ra tayar ru ulun malaat.

²⁵Intor ra talimpuun nangaru' Io ra ondo' moonsoi ra tayar ru ulun moonsoi am ondo' malaat no ra tayar ru ulun ondo' makatula.

²⁶Gitio noyo mokoonong kaga' ra tayar ru ulun: timug, apui, basi' am usi', gandum, susu' am ruu' ru maningot, wain, umau am bayang.

²⁷Ngaangai' no moonsoi ra tayar ru ulun ondo' moonsoi guang, kaa' masauk malaat ra tayar ru ulun ondo' makatula.

²⁸Mokoondo' angin ondo' binaal koson mamparatu' ra ukuman, ondo' mambagiu' am mangimbolo' ra makalalaa' kaga'. Paat ra pangakiman paabuso' noyo ngaangai' kaikangan nano, mampalinos ra kasangitan ru Io Mambaal riso.

²⁹Bibiag masigo, lingait am mantakag, ilang ondo' namuso ra ulun malaat, apui, rasam batu, maruol tumapik am bitilan, ngaangai' no binaal koson ra ukuman.

³¹Ngaangai' masaga' mambaal ra susuban ru Tuhan am nakatampos manugut ra kandoi ra tana' ti. Paat nakasuku' noyo bulintok nano koson mimbuor, ngaangai' no kalo igondo' karara'.

³²Intor ra talimpuun mangintopot aku noyo toojo, am kalupus mangkara' raginio, tinulisan ku:

³³Binaal ru Tuhan moonsoi ngaangai' no; nangukop Io ra pakuan ra bulintok nano.

³⁴Kalo maalap karagu ondo' rondo' ti malaat poyo intor ra bokon, sabap ra ngaangai' no makito moonsoi ra paat nano.

³⁵Raino parimbai no ra totopot ru guang am omporo' noyo Tuhan ra bolos mosongou.