Read Timugon Murut SIRAK 4 Bible Online

SIRAK 4 - Timugon Murut bible

SIRAK 4

¹Anak kuno, pai' pangkinibit ra ulun musikin kolondo' pangindapuan am pai' polosoo' ulun ondo' kolondo' atan-atan magulayun lumansan.

²Pai' karuolo' guang ru ulun ondo' maitilan am pai' pangkauso' guang ru ulun ondo' kolondo' atan-atan.

³Ulun ondo' siminangit noyo pai' noyo ruangi' kapaganan nilai. Pai' painjulo' jam mangani' ra indangan ra ulun kolondo' atan-atan.

⁴Indangano' noyo ulun ondo' ralalom kapaganan, am pai' impayi' kitaakon ru ulun musikin kapoam mangani' risilo ra sasaban koson magulas rirun.

⁶Koson raginio baal no sabap ra amon ralalom kapaganan guang nilo magulas rirun, i Namangun risilo momporongog ra kitaakon nilai no.

⁷Singkuat no maa' raginio kasagain kou ru ulun, am urumato' noyo ulun ondo' makakuasa'.

⁸Rongogo' noyo ragu-ragu ru ulun musikin am taamo' ilo noyo ra ragu molomoi.

⁹Bayago' noyo ulun ondo' inimbolo' intor ra ulun mangimbolo' risilo am pai' kalaa' mapaugar ra katimpakan.

¹⁰Sauk no koson ra sangulun ama' ra tayar ru anak nailusan ra matuo am pangindangan no ra ngaangai' napuor. Okou pana masauk boo koson ra anak ru Tuhan Ondo' Masawat Kaga', am tagamin No masailan intor ri ina' muno. Logo ru Kapintaran

¹¹Ulun ondo' maguyum ra kapintaran alungin am urumaton nano.

¹²Ulun ondo' monogom ra kapintaran monogom ra kaayagan. Osoi ayuk rumondom ra susuab ti tumirong koson maguyum raginio mototop ra kaansukan.

¹³Ulun ondo' mokoondo' ra kapintaran urumaton am barakaton ru Tuhan ra ati ayuk angayan nilo.

¹⁴Ulun ondo' gumonsoi ra kapintaran, gumonsoi ra Tuhan Ondo' Matulai am ulun ondo' monogom ra kapintaran, tagamin ru Tuhan.

¹⁵Osoi ayuk mokorongog no mangakim ra ulun ondo' kolondo' tuhan, am osoi ayuk mangurio riso maayag ra namimio.

¹⁶Pangintopot no ra kapintaran, am okou pana mompolonggom riso am mampatungkus ra papag muno.

¹⁷Pagulu no kapintaran mangaak rirun mansail ra ralan ondo' miraraikol saboi okou malaa' am monontol. Inila' no okou ra pangimbalaan, am kininaman ra aturan-aturan no saboi io mangintopot rirun.

¹⁸Ra kalo noyo boo injulin kapintaran no matong rirun. Ngaangai' inopot no pinabala' no rirun am okou pinabansuk no.

¹⁹Kaa' amon okou lumisang intor riso, okou iruanin no am polosoon malungganang. Mangintopot ra inan galama'

²⁰Pakayo' noyo kaluagan ondo' moonsoi, kaa' tamungi' noyo inan muno intor ra kalaatan am pai' papakaratong ra uyu' ra inan muno.

²¹Koson raginio baal no sabap mokoondo' mauyu' ondo' mampakaratong ra tula, am mokoondo' poyo mauyu' ondo' musiti' kasagain am omporon.

²²Pai' saung ra ulun saboi okou galama' malubatan, am pai' pakikiala ra kinibit nano okou galama' maulas.

²³Pai' pagantangan koson mindagu amon musiti' mindagu.[7]

²⁴Ragu muno mapakito ra kapintaran am inigilaan muno.

²⁵Pai' anggal ra katapatan, kaa' musiti' kou mauyu' sabap ra sambung muno.

²⁶Pai' kauyu' mangiou ra tula-tula muno, baug ru sungoi kalo maalap kagula'.

²⁷Pai' polosoo' ulun sasambungon manguasa' rirun am pai' piboo saung ra ulun makakuasa'.

²⁸Singkotog no toojo koson manaung ondo' motopot, am okou pana saungon ru Tuhan i Aki Kapuuno'.

²⁹Pai' baani ralalom ragu muno, alika matiar am mototoi ralalom baalon muno.

³⁰Pai' tilu koson ra singa' giu' ra baloi muno kapoam manantam ra ulipon-ulipon muno.

³¹Pai' pabilaro' kalindu' muno koson mangapu, kaa' pangguuto' paat okou musiti' mapasaguli' no.