Read Timugon Murut SIRAK 40 Bible Online

SIRAK 40 - Timugon Murut bible

SIRAK 40

¹Kaimbalaan kaayagan ru ulun Moonong ulun musiti' mirot mangandoi am mansaan ra maagat intor ra io miningkual intor ra binunakan ru ina' nano suku' sumaguli' ra tana' namagunan.

²Itakau ngaangai', tumalimpuun intor ra raja' ondo' nambayang ra bayang pamarintaan am mangkaraun am niayuk manturung ra turungan ondo' matulai, saboi ra ulun inasaban toojo ondo' nambayang ra makalas am manturung ra rasawat ru kaau, malaa' am magalabo mangkara' ra orou patayan takau. Ngaangai' ru kaayagan takau marayus mampaliman ra sangit, sumolon, kapaganan, magalabo, malaa' matoi, mansuli', am pansangaran. Paat ra mombolong pana pangkaraan takau inuliso ru inupi malaat.

⁶Sangkinolor ayuk itakau tumangus, kapoam kalo igondo'. Paat ra mombolong itakau koson ayuk magurog sabap inuliso ru kakaraan takau. Maginupi takau ra magiru' takau intor ra pantula',

⁷am topot ra paat itakau mamaar marakop, makarat takau am mangimuag sabap ra kolondo' atan-atan kalaanin.

⁸Gitio noyo sotopot no umaan ru moonong ondo' maayag, ulun kapoam bibiag, am ulun ondo' makatula makaili' intulu' maagat poyo:

⁹patayan, kalaatan, pansangaran, pampatayan, karaat, bitilan, kapusaan, am maruol tumapik.

¹⁰Ngaangai' no binaal tayar ru ulun malaat. Ilo noyo nangkinibit ra rosob minatong.

¹¹Ngaangai' ondo' minatong intor ra tana' musiti' sumaguli' ra tana', koson ra ngaangai' timug tumilis mongoi ra raat. Kinibit ru kalaatan

¹²Rondo' ondo' noowot ra rasua kapoam maya' ra ralan ondo' kalo matimpok kalo tumaan, kaa' ampos ru pampagagayaan mantilayun ra sabuoi-buoi no.

¹³Rapu' ondo' noowot ra guang kalo mabanis masauk ra mapua' koson ra sungoi, am sumalula' koson ra ganit ondo' mangurisit ralalom ru rasam.

¹⁴Ulun ondo' mataau maansukan, kaa' ulun ondo' manggal ra ukum malingon mapuso.

¹⁵Papag ru lalaing-lalaing ru ulun malaat kalo masuang; ilo koson ra tutuu' ondo' mapasa' bakat nano sabap ra timinuu' ra tana' kabatuan,

¹⁶kapoam galaga ondo' timinuu' ra kiing ru sungoi am binubul galing intor ra tutuu' ru bokon no.

¹⁷Kinoonsoi ru guang koson ra taman ondo' nototop ra barakat, am kinataau ru guang tumaan koson sabuoi-buoi no. Baal-baal ondo' moonsoi toojo ra tayar ru ulun

¹⁸Kaayagan ti matasu' ra tayar ru ulun ondo' makakandoi am kalo malansan ra ulun bokon. Kaa' ulun ondo' nakatuum ra rapu' maringkumaa' toojo intor risilo.

¹⁹Ulun mampatilayun ra inggalan maya' ra papag nilo kapoam mampasauk ra bandar, kaa' moonsoi poyo mokoondo' ra andu' ondo' kalo najamaran.

²⁰Wain am miujik mampakaansuk ra guang, kaa' moonsoi poyo lumaai ra kapintaran.

²¹Suling am jitor mambaal ra rimbai ondo' mampakaansuk, kaa' moonsoi poyo bolos ondo' matangil.

²²Masaga' mato magilong ra moonsoi am mapasau, kaa' masaga' poyo magilong ra talantar ru gandum giu' ra umo.

²³Rangan am kubayau mantuum ayuk ra paat naaru'; moonsoi poyo mansawo.

²⁴Pabukat am ulun mangindangan mokoonong paat ra kapaganan, kaa' mokoonong poyo kaindalaman mangani' ra indangan.

²⁵Mas am pirok makajamin ra kaayagan, kaa' mologo poyo bilin ondo' moonsoi.

²⁶Kaikangan am kalangkayaan mampakaansuk ra guang, kaa' moonsoi poyo malaa' ra Tuhan. Ulun ondo' malaa' ra Tuhan kalo matutusan ra atan pana am kalo pana makiindangan ra bokon.

²⁷Malaa' ra Tuhan koson ra taman ondo' nototop ra barakat am mangani' ra sindungan ondo' moonsoi poyo intor katulayan ru atan pana. Makikitaak

²⁸Anak kuno, pai' no kaayag koson ra ulun makikitaak; moonsoi poyo matoi intor ra makikitaak.

²⁹Amon ru akanon muno tinampilon ru ulun bokon, kalo poyo maayag kou ra sotopot no. Nampajamar kou ra inan muno galama' am mangapu ra akanon intor ru ulun bokon. Ulun ondo' makaguang am inila' toojo kalo masaga' mambaal koson raginio.

³⁰Tayar ru ulun ondo' kalo mapandai mauyu', makikitaak maamis ra kabang, kaa' makaantak ra guang.