Read Timugon Murut SIRAK 41 Bible Online

SIRAK 41 - Timugon Murut bible

SIRAK 41

¹Kapatayan Pangkaraan intor ra kapatayan mapait malimanan ra sangulun langkaya' ondo' maayag mamimio ra tatanga' ru rapu' nano, ondo' kalo makaulig ra mapagon, ondo' makaampos ralalom ru ngaangai' no am lakat poyo makasia' ra akanon nano.

²Kapatayan inapu ra moonsoi ru ulun ondo' maayag ra musikin, ondo' malawo, ondo' maawar umur, ondo' mansaan ra masuang kapaganan, ondo' nobolou am kolondo' orot ru guang.[56]

³Pai' kalaa' ra inaru' ru kapatayan. Karaa' noyo ra mokoondo' ulun ondo' minatoi ra kalo poyo am malupus okou.

⁴Kapatayan iono ondo' inaru' ru Tuhan ra moonong ilo ondo' maayag. Okou kalo makapangimpai ra kasagaan ru Io Ondo' Masawat Kaga'. Giu' ra intok ru ulun minatoi kalo masauk ra pangkuatan iou pana maayag kou sabuoi mopor, maatus, kapoam saribu ngambilor. Pupus ru ulun malaat

⁵Lalaing-lalaing ru ulun ondo' makatula am ondo' pinasukor ra gino ngai' ru ulun malaat sumauk ra malaat niayuk.

⁶Matatakan ilo ra rapu' tinungkus, am papag nilo asabin koson ra sabuoi-buoi no.

⁷Sangulun ama' ondo' mapuka' asabin ru anak-anak nano sabap ra io noyo puun nilo inasaban.

⁸Aibui boo ramuyun, ulun malaat kau ngai' ondo' nangiruan ra ukum ri Aki Kapuuno' Ondo' Masawat Kaga'!

⁹Akau inanak koson ulason, am malupus kau matoi magulayun ulason.

¹⁰Ondo' intor ra tana' ti sumaguli' ra tana'. Koson niayuk ra ulun malaat minanding intor ra inulas mongoi ra kapusaan.

¹¹Mangulir takau ra ulun minatoi, kaa' inggalan malaat ru ulun ondo' makatula' lilianin.

¹²Alungi' inggalan moonsoi muno, sabap ra inggalan no siminoroi rirun mabuoi poyo intor ra saribu ra rapu' mas.

¹³Kaayagan moonsoi naaru' ayuk polos no, kaa' inggalan moonsoi mantilayun ra sabuoi-buoi no. Onong ru inan

¹⁴Lalaing-lalaing kuno, kaayag no koson ondo' nangilaan kuno ramuyun, am mamimio boo kaayagan min. Kapintaran ondo' pinasibuni nogondo' ayuk ra rapu' ondo' kalo nakito; karuruo no kolondo' onong.

¹⁵Sangulun ondo' mampasibuni ra sambung nano moonsoi poyo intor ra sangulun ondo' mampasibuni ra kapintaran nano.

¹⁶Sala' ka ngaangai' guang mauyu' no moonsoi, sala' ka ngaangai' no kinara' ra motopot ru ngaangai' ulun. Musiti' kau mauyu' intor ra ngaangai' baal ondo' sabiton kuno ragiti.

¹⁷Akau musiti' mauyu' ra matuo mino amon mambaal kau ra paliso kalo moonsoi; ra sangulun panguasa' kapoam ulun mauligan toojo amon ru magabau kau;

¹⁸ra sangulun akim am panguasa' amon kalo gumagaya' kau ra ukum; ra pantimungan ru mamagun amon ru nambaal kau ra kasalaan; ra sangulun rangan kapoam kubayau amon ru kalo mabanis guang min;

¹⁹ra sambalayan amon mantakou kau. Giu' ra saang ru katapatan ri Aki Kapuuno' am nabantuan Nano musiti' kau mauyu' amon: mampasandig ra siku ra rasawat ru mija' pagakanan; magasab ra ulun ondo' paat mangani' kapoam mangapu ra pinataak;

²⁰kalo mambalos ra tabi' ru ulun bokon; manulilit ra sangulun ruandu' mantalan ra inan;

²¹mangimpai ra kitaakon ru sangulun pabukat; mangalap ra tayar ru ulun bokon kapoam atan ondo' pinataakan ra ulun bokon; monontong ra andu' ru ulun bokon;

²²kumubayau ra ulipon ruandu' ru ulun no — pai' no inggaar intok pambalangan nano; magasab ra rangan-rangan muno; mampaluta' ra ulun nopongo okou nangani' ra rondo';

²³mambala' ra atan ondo' naining min; mambala' ra inopot ondo' pinasaboi rirun. Ginio noyo paat ondo' motopot ra okou mauyu', am okou pana urumaton ru ngaangai' ulun.