Read Timugon Murut SIRAK 42 Bible Online

SIRAK 42 - Timugon Murut bible

SIRAK 42

¹Mamanggo guang Pai' no pambaal ra tula sabap ra magibaya' am pai' no kauyu' sabap ra baal-baal ragitio:

²Ukum am nabantuan ri Aki Kapuuno' Ondo' Masawat Kaga'; kapatasan ondo' mangani' ra katimpakan, kaa' niayuk ra ulun malaat;

³magapu ra balanja' ra rangan kapoam kubayau rondo' kiralanon; Mantatayar ra tinungkus ru rangan;

⁴nampakai ra timbangan am tutuku' ra motopot; maulian, ru maayo kapoam boborok;

⁵Makamauli' intor ra mansusunur ra logo ra sangulun mantatalan; ruli'-ruli' mangila' ra anak-anak muno tumanda'; mampalamba' ra sangulun ulipon ondo' kalo gumagaya' saboi nampuraa'.

⁶Moonsoi iono, bulii' noyo longgom muno ra intok ondo' kinaput amon ru andu' muno kalo maintopot, kapoam amon ru mokoondo' masuang ulun timinimung.

⁷Untobo' am timbango' noyo atan ondo' binulian muno giu' ra intok ru bokon, am tulisi' ngaangai' pinasubol am pinaingkual muno.

⁸Pai' kauyu' koson mangila' ra ulun sasambungon kapoam ulun maawar umur ondo' uwin sabap paliso ru kaayagan nilo kalo moonsoi. Okou pana sumauk ra ulun ondo' inila' toojo am omporon ra saang ru moonong ulun. Magalung ra lalaing ruandu'

⁹Kalinuos ru sangulun ama' kalo mokororot sabap ra mangkara' ra lalaing ruandu' nano. Paat ra lalaing no lakat poyo mamulok, ama' nano maimamang ra io kalo makaalap ra ralaki. Kopongo anak no inandu', maimamang toojo ama' nano ra maaru' lair io kasisangin ru ralaki nano.

¹⁰Paat ra io lakat poyo ralaa, magalabo ama' nano ra maaru' lair rinulug io am maapang liliwa' ra io lakat poyo minayan ra intok ru ama' nano. Kopongo ra io inandu', magalabo ama' nano maaru' lair tabanang io kapoam kalo gumagaya'.

¹¹Pagilai' noyo toojo lalaing ruandu' muno ondo' mokotog kaga' ulu. Amon kalo, masauk kou ra kukuritin ru pantula'-pantula' muno, raraguon ru mamagun ru bandar, asasabin ru ulun, am okou kuritin ra saang ru ulun masuang.

¹²Pai' pagilong ra osoi pana sabap ra kinantalur nano, am pai' panturung mabaya' ra ruandu',

¹³sabap intor risilo matong kalaatan, koson ra lipos intor ra konoon.

¹⁴Moonsoi poyo sangulun ungkuyon ondo' malaat intor ra sangulun ruandu' ondo' sumalu ra moonsoi. Sangulun ruandu' mamparatong ra kauyuan am pagasaban. Katulayan ri Aki Kapuuno' ralalom ru ondo' binaal

¹⁵Masaga' aku mangkara' ra kandoi ru Tuhan, atan ondo' makito kuno potonowon ku; ngaangai' no sinauk ru ragu Nano.

¹⁶Sinda ru mato ru orou manampulau ra ngaangai' no; kandoi ru Tuhan natikop ra katulayan Nano.

¹⁷Mulu' ra ngaangai' malaikat Nano kalo nangani' Tuhan ra kaandaran koson mantunung ra ngaangai' binaal Nano ondo' makaimuag, ondo' inaru' ru Tuhan Ondo' Maayo Kaga' kuasa' maa' raginio tana' ti mapiot ralalom ru katulayan Nano.

¹⁸Tinolop No raat am guang ru ulun am makapandai ra ngaangai' inatangan nano. Io Ondo' Masawat Kaga' makapandai ra ngaangai' ondo' maalap kapandayi', tatandu' ru orou maratian No.

¹⁹Nambala' io ondo' galing i am ondo' rumatong no am sukiapon inopot ondo' malandom toojo.

²⁰Magilong io ra ngaangai' pangkaraan takau am mangkirongog ra moonong ragu ondo' sabiton takau.

²¹Tana' ondo' tinuyu' toojo mampailong ra kapintaran Nano ondo' maayo; Io ondo' rondo' ayuk am mantilayun ra sabuoi-buoi no. Kolondo' makapamparuang kapoam iruruin intor Riso, kalo gumogot Io ra osoi pana koson ra ulun mambilin.

²²Ngaangai' kandoi ru Tuhan makabunduk ra guang, saboi takis ru apui ondo' boborok kaga'.

²³Ngaangai' no maayag am mimbuor ra kolondo' pupus am ra gumagaya' nanugut ra ngaangai' kuayan ru sigagama'.

²⁴Ngaangai' no sinauk ra mantuop ondo' kalo nogondo' ra rondo' am bokon; kolondo' ondo' kalo matanda' binaal ru Tuhan.

²⁵Moonong rondo' maukop ra kaansayan ru bokon, kalo majala' takau magilong ra katulayan Nano.