Read Timugon Murut SIRAK 45 Bible Online

SIRAK 45 - Timugon Murut bible

SIRAK 45

¹Musa Intor ra papag i Jakub, Tuhan nampasukal ra sangulun ulun gumagaya' ra Tuhan ondo' nasauk ra katagaman ru ngaangai' ulun. Tagamin io ri Aki Kapuuno' am poyo ngaangai' ulun. Ulun no i Musa, am io kinara' mabaya' ra pangamparan.

²Nampasauk Tuhan riso koson ra kinatulai ru malaikat, am io kalaanin ru pantula'-pantula' nano.

³Mabaya' ra susuban nano, longgo' boo karaat ondo' nakalumpa' ra Misir. Nambaal Tuhan riso ra urumaton ru raja'-raja'. Nampakito Io ra sinda ru saang Nano riso am inanian io ra ngaangai' susuban koson ulun Nano.

⁴Intor ra ngaangai' ulun, nampili' Tuhan am nampatimpok ri Musa sabap ra io gumagaya' am minggana' guang.

⁵Nampaining Tuhan ra bolos Nano ri Musa am nagibit riso ralalom ru gaun molondom. Giu' no nambala' Tuhan riso nangkito ra bulos am nangani' riso ra susuban-susuban Nano, iono ukum ondo' nangani' ra kaayagan am kapandayan. Ukum no pinataak riso, maa' raginio makapangila' ra nabantuan am inaru'-inaru' ru Tuhan ra ngaangai' bansa' ru Israil. Arun

⁶Nampasauk Tuhan ri Arun, sangulun matulai koson ri Musa pabukat nano intor ra bansa' Liwi.

⁷Nambaal Tuhan ra nabantuan mantilayun riso am nampasauk riso ra imam tayar ru ulun. Nampabansuk Tuhan riso ra limpor ondo' moonsoi am nangani' riso ra bayang ru pamarinta,

⁸maukop ralalom ru kaantakan nano. I Arun pinaikang niayuk ra tatandu' ru kakuasaan: saluar linon, sukub am efod.

⁹Giu' ra kiing liningkom ru sukub no mokoondo' ra limpor kawa' ru dalima' am masuang kangkaling mas ondo' mokobolos paat ra io mugar. Bolos nano maining giu' ra Baloi ru Tuhan am mampakara' ra Tuhan ra ulun Nano.

¹⁰Pinapakai niayuk ru Tuhan riso sukub matulai ondo' pinikit ra banang mas, makabatik matanggilung matuo, am matanggilung mamulok binaal ru sangulun ulun mapandai toojo mampikit, utau ra Urim am Tumim,[58] banang malia' ondo' pinitol ru sangulun manukang

¹¹tinakinan ra batu-batu intan ondo' inukiran ra inggalan-inggalan. Batu-batu no binangkos ra mas ra utau ru sangulun manukang koson mampakara' ra Tuhan ra mopor am ruo bansa' ru Israil.

¹²Pinansigal io ru Tuhan mabaya' ra limpor ru mas inukiran ra ragu-ragu: “Patimpokon tayar ru Tuhan”. Limpor no iono kandoi seni ra matuyu' ondo' mapasau toojo; totopot rondo' urumat maayo ra ulun ondo' nampakai no.

¹³Paat ra kalo poyo jaman ri Arun, kolondo' kuliamos moonsoi kaga' koson raginio. Suai ri Arun am anak-anak nano ondo' matutungkus, kolondo' nampakai raginio am kolondo' osoi pana ondo' mampakai ra kuliamos no.

¹⁴Induo songorou ra kalo lumonggo', nampataak io ra taak simbalui koson mapabansuk ra guang ru Tuhan.[59]

¹⁵Patimpokon ri Musa i Arun am nampasasar ra umau ru upacara rasawat ru ulu nano. Ginio ra nambaal Tuhan ra nabantuan mantilayun ri Arun am papag nano, ra ilo mangandoi ayuk ra Tuhan koson ra imam-imam Nano am nambarakat ra ulun ralalom ru inggalan Nano.

¹⁶Intor ra ngaangai' ulun nampili' Tuhan ri Arun koson mampataak ra taak simbalui am monolob ra kaminyan ondo' maamis owou, maa' raginio Tuhan mangkara' ra ulun Nano am mangampun ra tula-tula nilo.

¹⁷Pinalansan ru Tuhan susuban-susuban Nano ri Arun am nangani' riso ra kuasa' koson mambaal ra pamatasan-pamatasan ondo' motopot ra kuayan mampainono' ra Israil am mambala' toojo ra ukum Nano risilo.

¹⁸Paat ra ulun ri Aki Kapuuno' lakat poyo giu' ra tana' kaagisan, santimungan ulun liwar ondo' nangusolon am siminangit giminuor ri Arun. Ilo iono i Datan, i Abiram, am i Kora mabaya' ra ulun maamaya' riso.

¹⁹Kalo masaga' Tuhan magilong ra binaal nilo. Siminangit Io kaga' saboi nambaal ra kaimuagan am namuso risilo ralalom paang ru apui.

²⁰Tuhan pana namparuang ra urumat ri Arun; taak intor ra tayar kasaa' ampos ru tana' ti paluntukon ra imam-imam maa' raginio maukapan ilo ra akanon.

²¹Ngaangai' imam makaakan ra akanon ondo' pinataak ra Tuhan; nangani' Tuhan raginio ri Arun am ra papag nano.

²²Kaa' i Arun kalo nakaalap ra tana' tungkuson koson longgom nano. Tuhan galama' nasauk ra tayar ru tinungkus nano. Pinigas

²³Kopongo i Musa am i Arun, i Pinigas ulun katalu ondo' matulai, sabap ra mangandoi ayuk am gumagaya' ra Tuhan. Paat ra ulun ru Israil giminuor, minikang io ra pirot ru guang am baani, am koson raginio makaalap ra pangampunan ra tayar ru bansa' nano.

²⁴Tuhan pana nambaal ra nabantuan mantilayun ri Pinigas: Maningganai i Pinigas ra Baloi ru Tuhan am ra ulun Nano, am io mabaya' ra papag nano mansaan ra kandoi ru Tingganai Maayo Imam koson ra sabuoi-buoi no.

²⁵Topot ra Tuhan niayuk nambaal ra nabantuan ri Daut, anak ri Isai intor ra bansa' ru Jiuda. Kaa' kurisi' pamarintaan pinatungkus ru raja' ra sangulun anak nano ayuk, kandoi ru imam ondo' tinaakan ri Arun pinatungkus ra ngaangai' papag nano.

²⁶Gama' ru Tuhan nangani' rirun ra kapintaran koson mangakim ra ulun Nano ra katimpakan, maa' raginio magulayun ilo makakaansayan am katulayan nilo tumaan matutungkus.