Read Timugon Murut SIRAK 46 Bible Online

SIRAK 46 - Timugon Murut bible

SIRAK 46

¹Josua am Kalib Josua anak ri Nun, saujor maikang am baani ondo' namalit ri Musa masauk ra nabi. Maaya' ra arati' ru inggalan nano,[60] namayag io ra ulun pinili' ru Tuhan. Nampaala io ra pantula' ondo' namulunsar suku' Israil nakaalap ra tana' tungkuson.

²Mapara' piboo ikang nano paat gonggomon no kalindu' nano koson maningganai ra pamulunsaran ra bandar-bandar!

³Naningganai io ra pangayawan ru Tuhan, am kalo igondo' mokoondo' ulun maikang koson riso.

⁴Karaa' noyo atan koson io nompolonggo' ra kainsiran mato ru orou saboi songorou masauk ra ruo ngoorou.

⁵Paat ra io inawangan ru pantula' intor ra ngaangai' pisuk, nakiasi' io ra Tuhan Ondo' Masawat Kaga' am Maayo Kaga' Kuasa'. Pakiasian nano tinaam ru Tuhan am namparatong ra rasam batu ondo' makalalaa'.

⁶Nampalumpa' Io raginio ra pantula' am namuso risilo giu' ra ginting Bit-Oron, maa' raginio bansa'-bansa' makapandai ra ngaangai' kaikangan ri Josua sabap ra io mangayou mabaya' ra indangan ru Tuhan, ginio sabap ra io mabaya' ra gogot ru guang maya' ra Tuhan Ondo' Maayo Kaga' Kuasa'.

⁷Paat ri Musa naayag, giminuor i Josua ra matanda'. Io am i Kalib anak ri Jipuni minanggal ra ngaangai' ulun, nompolonggo' ra butok malaat nilo am mangampin risilo intor mambaal ra tula.

⁸Intor ra 600,000 ulun ru Israil ondo' minugar mansail ra tana' kaagisan, ilo ruo ayuk binayag koson mangator ra bansa' ru Israil mongoi ra tana' tinungkus nilo, rondo' pagun ondo' langkaya' am malabung.

⁹Nangani' Tuhan ri Kalib ra kaikangan saboi ra io matutuo, am nakaaloi io ra libung kabuluran. Papag nano nakaalap ra libung no koson ra longgom tinungkus.

¹⁰Koson raginio ngaangai' ru Israil nakakito ra mapara' bonsoi no gumagaya' ra Tuhan. Tingganai-tingganai ru bansa'

¹¹Kopongo raginio minatong boo tingganai-tingganai ru bansa'. Sigagama' mauligan toojo sabap ra kandoi moonsoi nilo. Kalo igondo' ilo nangiruan ra Tuhan am kalo igondo' samba ra sinungkalalaing. Gama' ru masalok ilo kinara' mabaya' ra pangamparan.

¹²Gama' ru ngaangai' ulun ondo' inurumat takau i tumirong saguli' intor ra lobong am magulayun maayag ralalom ru papag nilo. Samuil

¹³I Samuil katagaman ru Tuhan. Koson ra nabi ru Tuhan, nampasauk io ra pamarintaan am nampasauk ra panguasa'-panguasa' tayar ru bansa' nano.

¹⁴Nangakim io ra ulun sumugut ra Ukum ru Tuhan, am nanindung Tuhan ra Israil.

¹⁵Sabap ra gagaya' nano, nampainono' i Samuil koson sangulun nabi ondo' motopot. Ragu-ragu nano nampasauk riso nauligan koson ra ulun magilong ondo' maintopot.

¹⁶Paat inawangan ru pantula' intor ra ngaangai' pisuk, nampiau io ra Tuhan Ondo' Maayo Kaga' Kuasa' am nampataak ra taak simbalui iono sanginan anak domba.

¹⁷Tuhan pana naningkalur intor ra suruga' am nampaining ra bolos Nano ondo' mompogolon.

¹⁸Namuso i Samuil ra panguasa'-panguasa' ru Tirus am Palistin.

¹⁹Paat ra patayan nano, nampainono' i Samuil ragitio giu' ra saang ru Tuhan am raja' ondo' linantik nano, “Kalo igondo' aku nangalap ra longgom ru ulun bokon, am poyo satukir kasut pana kalo.” Kolondo' osoi pana manguu' riso.

²⁰Kopongo minatoi, nabi no lakat poyo nampakito atan koson io matoi ra maagu no, ra Raja' Saul. Intor ralalom ru tana', minindagu i Samuil koson ra sangulun nabi koson mamuso ra kalaatan ru bansa' nano.