Read Timugon Murut SIRAK 47 Bible Online

SIRAK 47 - Timugon Murut bible

SIRAK 47

¹Natan Kopongo i Samuil, minatong boo i Natan ondo' nasauk ra nabi paat ra Raja' Daut. Raja' Daut

²Koson ra tayar mokolomok intor ra taak simbalui koson makibarakat ra Tuhan, iono taak simbalui ondo' luntukon ra Tuhan, Koson raginio noyo ra Raja' Daut pinili' intor ra gino ngai' ru ulun ru Israil.

³Nangkukuli io ra singa' am baawang ilain koson ra anak domba am anak kambing.

⁴Paat io mamulok nampatoi io ra rondo' maayo ulun koson mamayag ra bansa' nano intor ra inasaban. Pupus ru kalimbawan ri Goliat pinuong ra rondo' batu intor ra ulun nampuong no.

⁵Sabap ra pakiasian nano ra Tuhan Ondo' Masawat Kaga', inanian io ra kaikangan koson mamatoi ra saujor ondo' maikang no am namiot ra kaikangan ru bansa' nano.

⁶Inurumat io sabap nangala ra kaaparan ngaribu ngaulun pantula'. Paat io pinasauk ra sangulun raja', inompor io koson ra sangulun binarakat ru Tuhan.

⁷Namuso io ra ngaangai' pantula' am nangala ra ulun ru Palistin, saboi ra ilo kalo boo makalulu' koson manggal saguli'.

⁸Ralalom ru ngaangai' baal, nongompor Raja' Daut ra Tuhan ondo' matulai am mangurumat Riso Ondo' Masawat Kaga'. Motogom io ri Io ondo' Nambaal riso am ra totopot ru guang marimbai ra rimbai pangamparan Riso.

⁹Nomposoroi io ra ulun mangkuli ra jitor ra saang ru altar koson mampaining ra rimbai-rimbai ondo' moonsoi kaga'.

¹⁰Nangaru' io ra orou-orou ru pangiantakan buoi ru sambilor am nampakaantak ra upacara-upacara no. Buoi ru songorou giu' ra Baloi ru Tuhan, maining rimbai-rimbai pangamparan tayar ru Tuhan.

¹¹Nangampun Tuhan ra tula ri Raja' Daut am namiot ra kuasa' nano koson ra sabuoi-buoi no. Nambaal Io ra nabantuan ra Raja' Daut ra io am papag nano mamarinta mabaya' ra kasingkatan giu' ra Israil. Raja' Salomo

¹²Kopongo Raja' Daut, minatong boo Raja' Salomo anak ungkuyon nano ondo' mapintar, am sabap ra kandoi moonsoi ru ama' nano, maayag io ralalom ru kaansayan.

¹³Buoi ru pamarintaan ru Raja' Salomo kolondo' pangayawan. Nambaal i Aki Kapuuno' ra balitan ru pagun nano mamimio, saboi Raja' Salomo nakapambaal ra Baloi ru Tuhan ondo' tumaan koson ra sabuoi-buoi no.

¹⁴Mapara' piboo kinapintar ru Raja' Salomo paat ra io lakat poyo mamulok! Pangaratian nano koson ra sungoi ondo' lumabi'-labi'.

¹⁵Kuasa' ru raja' no liminangka' ra titikop ru tana' ti; peribahasa am sundait nano mauligan ra ati ayuk intok.

¹⁶Raja' no nauligan kaga' ra titikop ru tana' ti am tagamin sabap nagibit ra pabansayan.

¹⁷Giu' ra ngaangai' pagun raja' no kasagain sabap ra rimbai-rimbai binaal nano, peribahasa, pagabigan, am arati' ra pinabala' toojo ru raja' no.

¹⁸Nanimung raja' no ra pirok am mas koson ra timah, ngaangai' no ralalom inggalan ru Tuhan Aki Kapuuno', ondo' sinabit ri Aki Kapuuno' ru Israil.

¹⁹Kaa' raja' no naratu' sabap ra laai nano ra ruandu'.

²⁰Nampajamol raja' no ra inggalan nano galama' am inggalan ru papag nano. Sabap ra sasambungon io, sinangitan ilo ru Tuhan am inimbolo'.

²¹Pamarintaan ru raja' no nakuliagai am ulun-ulun giminuor nambaal ra rondo' pamarintaan giu' ra Israil Ralayo.

²²Kaa' Tuhan masalok mataau guang am kalo sinulang bantu' Nano galama'. Kalo namuso Io ra papag ri Daut, ulun pinili' Nano ondo' motogom Riso. Ginio sabap ra nompoloso Tuhan ra rondo' suwo intor ra bansa' ru Israil, am intor ra papag ru Raja' Daut lakat poyo mokoondo' maayag. Raja' Rigabiam am Raja' Jirobiam

²³Raja' Salomo linobong ra giu' kalabangan ru kinamatuaan nano. Nampatatang io ra sangulun anak ungkuyon, iono Raja' Rigabiam, koson mamalit riso. Raja' Rigabiam ti sangulun gigiison, sasambungon kaga' intor ra bansa' nano. Puun ru pamarintaan nano nangkinibit ra mamagun nano giminuor. Raja' Jirobiam anak ri Nibat ondo' namarinta ra Israil Ralayo, nangkinibit ra mamagun nano makatula.

²⁴Tula nilo masuang kaga', saboi ra ilo pinatiran intor ra pagun nilo.

²⁵Nambaal ilo ra masuang salinut ru kalaatan, saboi ra pupus no ilo inukum ru Tuhan.