Read Timugon Murut SIRAK 48 Bible Online

SIRAK 48 - Timugon Murut bible

SIRAK 48

¹Nabi Ilia Nabi Ilia pana timinirong, sangulun nabi ondo' makaapui. Ragu-ragu nano koson ra pilasut ondo' mapaang.

²Namparatong io ra karaat bitilan ra bansa' nano. Nangkinibit io ra masuang ulun intor ra bansa' nano napuso saboi sanganu ilo ayuk boo soroi.

³Mabaya' ra kuasa' ru Tuhan nanusub io ra rasam kalo rumatu', am saboi intalu io namparatong ra apui.

⁴Nabi Ilia, kaimuagan-kaimuagan muno makaimuag kaga'. Kolondo' sangulun pana makapamanggo koson rirun.

⁵Mabaya' ra kuasa' ru Tuhan Ondo' Masawat kaga' namayag kou saguli' ra ulun minatoi.

⁶Namuso kou ra raja'-raja' am namparatu' ra ulun maayo kaga' inggalan intor ra kuasa' nilo.[61]

⁷Giu' ra Gunung Sinai norongog muno pansawayan ru Tuhan, am giu' ra Gunung Gorib norongog muno pamatasan Nano koson mangukum ra pantula'-pantula' Nano.

⁸Nampasauk kou ra sangulun raja' koson mampaugar ra ukuman no am sangulun nabi koson malit rirun.

⁹Okou pana kinayang mongoi ra suruga' ralalom ru angin lumibut ondo' mapaang, mabaya' ra rondo' kurita' kuda ondo' binunduk ru kuda makaapui.

¹⁰Ralalom ru Buuk Kitab tinulisan noyo ra okou sumaguli' paat ra ondo' inaru' koson mampalinos ra sangit ri Aki Kapuuno', ra kalo poyo sangit Nano makatabual. Tinulisan niayuk ra okou mompobonsoi ra ama' am anak am niayuk mampatapuli' ra bansa'-bansa' ru Israil.

¹¹Pakaansuk noyo ulun ondo' makarampot magilong ra okou matong, am ra ilo ondo' minatoi ralalom ru togom, sabap ra maaru' itakau ti pana maayag. Nabi Ilisa

¹²Liniputan i Ilia ru angin lumibut, am ambiluo nano kinuasa' ri Ilisa. Buoi ri Ilisa naayag, kalo malaa' io ra panguasa'-panguasa' am kalo maruku' ru osoi pana.

¹³Kolondo' mapagon kaga' riso. Buoi ru kaayagan nano nambaal io ra kaimuagan-kaimuagan, am kalupus minatoi io lakat poyo mindagu ra ragu manala' am nambaal ra kaimuagan.

¹⁵Kaa' kabalu' pana raginio, bansa' nano kalo nangiruan ra baal ru kaayagan nilo ondo' makatula, saboi ra ilo pinatiran intor ra pagun nilo am pinantuliar ilo ra titikop ru tana' ti. Intor ra bansa' no sanganu ayuk boo soroi mabaya' ra sangulun panguasa' intor ra papag ri Raja' Daut.

¹⁶Santayaran intor risilo nambaal ra atan ondo' kasagain ru Tuhan, kaa' bokon no nagulayun makatula. Raja' Gijkia am Nabi Jisaya

¹⁷Raja' Gijkia namiot ra bandar nano mabaya' ra kubu am inukapan no ra lutu' ru timug. Nanusub io ra ulun mangkali rondo' parit maayo mansail ra bulur batu ra kuliamos-kuliamos basi'. Io pana nambaal ra kulam-kulam koson pangkaangan ra timug no.

¹⁸Ralalom ru pamarintaan nano, bandar nano binulunsar ru Raja' Sanirib. Nanusub Raja' Sanirib ri Rabsyaki, sangulun pagawai makapangkat masawat. Ulun sinusub no nompololob ra bandar Jirusalim am mindagu ra mabaya' ra limbau nano.

¹⁹Ulun ru Israil malawo guang am nonontol ra malaa'. Naimbolo' ilo koson ra sangulun ruandu' maganak.

²⁰Kaa' nakiasi' ilo ra longon pinotoroi ra Tuhan ondo' makaasi' kaga'. Intor ra suruga', Tuhan ondo' matulai mataki' nokorongog ra pakiasian nilo am nanusub ri Nabi Jisaya koson mamayag risilo.

²¹Nampalamba' Tuhan ra pangkiman ru ulun Asyur, am malaikat Nano namuso risilo

²²sabap Raja' Gijkia nambaal ra atan ondo' kasagain ru Tuhan am nanilu ra binaal moonsoi ru Raja' Daut kinamatuaan nano. Nambaal io ra baal raginio maaya' ra susuban ri Jisaya, nabi matulai no, am nampaintopot ra nakito-nakito nano.

²³Nambaal nabi no ra mato ru orou mininsir mongoi ra talikuron am nampaawar ra painawo ru raja' no.

²⁴Nampalinos Io ra ulun ondo' mangulir giu' ra Jirusalim. Mabaya' ra ambiluo nano ondo' matulai nakakito io ra atan ondo' masauk paat ra orou rumatong

²⁵am nanala' ra kasaukan-kasaukan suku' orou pupus, am baal-baal nakasibuni ra kalo poyo masauk.