Read Timugon Murut SIRAK 49 Bible Online

SIRAK 49 - Timugon Murut bible

SIRAK 49

¹Raja' Josia Raja' Josia nampatatang ra inggalan moonsoi kaga' koson ra kaminyan ondo' pinaratok ra matanda', koson mangakan ra ruu' maningot ondo' matamis kapoam miujik paat ra bunsag wain.

²Mirot io ra ralan motopot, koson mampasaguli' ra mamagun ra Tuhan. Namuso io niayuk ra kalaatan sumamba ra sinungkalalaing.

³Gumagaya' io ra Tuhan ra ngaangai' gayo ru guang, am paat ra napanu' ra kalaatan, nampaikang io ra guang gumagaya' ru ulun. Jirimia

⁴Ngaangai' ru raja' ondo' ak am Raja' Daut, Raja' Gijkia, am Raja' Josia, iono ulun ondo' makatula' toojo sabap nangiruan ra Ukum ri Aki Kapuuno' Ondo' Masawat Kaga'. Ginio sabap ra raja'-raja' ru Jiuda napuso.

⁵Nampataak ilo ra kuasa' am urumat nilo ra ulun bokon

⁶ondo' nonolob ra bandar Jirusalim am Baloi ru Tuhan. Ralan-ralan pana masiluk,

⁷koson ondo' inala' noyo ru Nabi Jirimia. Malaat pinamakuan ra Jirimia, kabalu' pana intor ra binunakan ru ina' nano, pinili' io masauk ra nabi koson mamubul, mangimpasau am mamuso, kaa' niayuk koson mampatirong am mantanom. Yehezkiel

⁸Nakaalap i Yehezkiel ra pinaintalang intor ra katulayan ri Aki Kapuuno' ondo' pinatulu' riso giu' ra rasawat ru kurita' kuda am kirub-kirub.

⁹Nangkara' Tuhan ra pantula'-pantula' Nano am nampalumpa' risilo ra karaat. Kaa' moonsoi io ra ulun ondo' maayag ra guang mabanis. Mopor am ruo ngaulun nabi

¹⁰Gama' ru mopor am ruo ngaulun nabi pinatirong intor ra lobong nilo, sabap ra ilo nampabansuk am namayag ra bansa' ru Israil am mangani' ra kalansanan ondo' mapiot kaga'. Jirubabil am Josua

¹¹Atan koson takau mongompor ri Jirubabil? Koson io ra sinsing meterai ra kalindu' pamiris.

¹²Ginio niayuk ri Josua anak ri Jojadak. Paat ra io naayag Baloi ri Aki Kapuuno' ondo' matulai binaal saguli' am tinampos kuayan no koson katulayan ra sabuoi-buoi no. Nigimia

¹³I Nigimia pana nauligan kaga' pangkaraan nano. Timbok-timbok ru Jirusalim ondo' natuyas i binaal saguli' ra tayar takau. Inanian ra kulobon-kulobon maayo am niayuk umpok ru kulobon. Baloi-baloi takau niayuk binaal no saguli'. Ginok, Jusup, am ngaangai' kinamatuaan

¹⁴Ra tana' ti kolondo' ulun koson ri Ginok, sabap io kinayang intor ra tana' ti.

¹⁵Kalo igondo' inanak sangulun koson ri Jusup, tingganai ru pabukat-pabukat nano am ulun nanungka' ra bansa' nano. Mulu' poyo ra bungul-bungul nano lioon ru ulun.

¹⁶I Siim am i Sit niayuk inurumat kaga', kaa' ra gino ngai' ru ilo ondo' maayag, kolondo' ondo' matulai poyo intor ri Adam.