Read Timugon Murut SIRAK 50 Bible Online

SIRAK 50 - Timugon Murut bible

SIRAK 50

¹Simon anak ri Onias [62] Tingganai Maayo Imam i Simon, anak ri Onias, paat ra io naayag namuna' am mamiot ra Baloi ru Tuhan.

²Nampabanta' Io ra puun maatang ru timbok ondo' masawat am ruo pinakulaup, timbok panungka' ra liput Baloi ru Tuhan.

³Paat ra pamarintaan nano rondo' kulam maayo ondo' koson ra raat gayo nano kinali.[63]

⁴Nambaal io ra inatangan koson manindung ra bansa' nano am mamiot ra bandar nano intor ra pagawangin.

⁵Ilain io ra matulai ra tatanga' ru ulun paat ra io miningkual intor ra Lamin Matulai Kaga'.

⁶Koson io ra butitin ru sirangon ra tatanga' ru gaun-gaun, koson ra bulan salawang,

⁷koson ra mato ru orou ondo' nampasinda ra Baloi ri Aki Kapuuno' Ondo' Masawat Kaga', koson ra bulintung ondo' mapaang kaga' ra tatanga' ru gaun-gaun i,

⁸koson ra busak ros bulintok mambusak, koson ra busak ru bakung mamaar ra taur ru timug, koson ra talantar ru puun ondo' maamis owou bulintok ra malasu',

⁹koson ra kaminyan ondo' sinolob, koson ra sangkir mas tinuyu' baalo' ondo' tinakinan ra masuang intan,

¹⁰koson ra puun ru jaitun ondo' nototop ra kawa', koson puun ru sipris ondo' siminawat polos ra limbowon.

¹¹Mapara' bonsoi ru liliut Baloi ru Tuhan paat i Simon ra bayang katulayan nano am limpor ondo' moonsoi kaga' nagaloi ra altar ondo' matulai.

¹²Paat io nangapu ra kukula' kual intor ra kalindu' ru ngaangai' imam, liliwa' minigor mamaar ra apui ru altar liniputan ru pabukat-pabukat nano, io koson ra puun ru sipris mamulok giu' ra Libanon ondo' liniputan ru puun-puun palma.

¹³Ngaangai' ilo papag ri Arun nambayang ra bayang ru pamarintaan, minigor ra saang ru ngaangai' ulun ru Israil liliwa' nampaguut ra taak ra Tuhan.

¹⁴Nambaal i Simon ra upacara giu' ra altar am nanampos ra taak ra Tuhan Ondo' Masawat Kaga' am Maayo Kaga' kuasa'.

¹⁵Nangalap io ra mangkuk am nampasasar ra wain giu' ra lugu' ru altar koson taak maamis owou ra Io Ondo' Masawat Kaga', Raja' ru limbowon am tana' ti.

¹⁶Imam-imam pana nagigindii am nanamput ra bujung ondo' binaal intor ra tambaga' tinuyu'. Bolos nano mosongou kaga' maa' raginio iningon ru Tuhan Ondo' Masawat Kaga'.

¹⁷Kinuliag boo ru ngaangai' ulun nagagampan kiminubu koson sumamba ra Aki Kapuuno' nilo, Tuhan Ondo' Maayo Kaga' Kuasa' am Masawat Kaga'.

¹⁸Ngaangai' ulun maririmbai pana tumalimpuun marimbai, am mamintanou boo rimbai ra moonsoi kaga'.

¹⁹Rayus ulun makiasi' ra Tuhan Ondo' Masawat Kaga' am makitaak Riso Ondo' Motogom Kaga'. Kopongo upacara sumambayang ra Tuhan no nopongo,

²⁰Timinuun i Simon intor ra altar am nompotoroi ra longon nano ra rasawat ru ulun ru Israil koson mindagu ra barakat ru Tuhan rasawat nilo am nanabit ra inggalan ru Tuhan mabaya' ra urumat.

²¹Ulun kiminubu sumamba ra kainduo koson mangapu ra barakat ru Tuhan Ondo' Masawat Kaga'. Pangkimaitan am barakat

²²Raino omporo' noyo i Aki Kapuuno' Maayo Kaga' Kuasa' ondo' nambaal ra baal-baal maayo ra ati-ati ayuk. Io nampainsawat ritakau intor ra itakau inanak am pinamakuan ritakau nototop ra makaasi'.

²³Gama' ru nangani' Io ritakau ra guang maansukan am nangiou ritakau maayag ra mamimio giu' ra Israil koson ra sabuoi-buoi no.

²⁴Gama' ru magulayun Io mampakito ra makaasi' Nano ritakau am mamayag ritakau intor ra karaat. Talu bansa' ondo' kasisangin

²⁵Mokoondo' ruo bansa' ondo' kasisangin kuno, am ondo' katalu ra mulu' poyo kalo motopot sabiton bansa' nano.

²⁶Ilo mamagun ru kagunungan Siir,[64] ulun ru Palistin, am bansa' sasambungon ondo' minayan ra giu' Sikgim.[65] Kapintaran ri Jisus anak ri Sirak

²⁷Jisus anak ri Sirak, akupu ri Iliajar intor ra Jirusalim, nanimung ra pangilaan ondo' mangani' ra arati' am kapandayan ralalom ru kitab ragitio. Guang nano nampaluab ra kapintaran.

²⁸Pakaansuk noyo ulun ondo' mangintopot ra pangilaan-pangilaan ragitio. Osoi ondo' mangiou raginio masauk ra mapintar.

²⁹Ulun ondo' maayag sumugut ra pangilaan ragitio makaandar manguma' ra atan pana, sabap ra io maayag ralalom sinda ru Tuhan.