Read Timugon Murut SIRAK 51 Bible Online

SIRAK 51 - Timugon Murut bible

SIRAK 51

¹Rimbai paringkuanangan Maringkuanang aku Rirun, iou Tuhan am Raja', Omporon Tokou, iou Aki Kapuuno' am Mamamayag raki'. Maringkuanang aku rirun

²sabap ra mangindangan am manindung Kou raki'. Namayag Kou raki' intor ra kapatayan, intor ra sinimbaalan ra ragu am abau ondo' mampajamar. Giu' ra saang ru pantula'-pantula' kuno nangindangan Kou raki'.

³Sabap ra makaasi' Muno ondo' maayo am ralalom ru inggalan Muno, namayag Kou raki' intor ra pantula' ondo' gumogot mampagabu' raki', intor ra kalindu' ru pantula' ondo' gumogot mamatoi raki', intor ra kapaganan maayo ondo' liminumpa' raki',

⁴intor ra matoi nolosor sabap ra apui ondo' sumikak ra libung kuno, intor ra tatanga' ru apui ondo' sala' ka aku nansikit,

⁵intor ra ulun mamparuung am magabau, intor ra sinimbaal ra ragu ondo' pinasaboi ra raja', intor ra kapatayan ondo' minggaar am intor ra luang ru lobong ondo' nagaal.

⁷Pinagawangan aku intor ra ngaangai' intok; maguyum aku ra sangulun mangindangan, kaa' kolondo' sangulun pana naalap.

⁸Ginio ra nakara' ku guang makaasi' Muno, iou Tuhan, am binaal Muno paat ragili. Nangkara' aku ra Okou nampalabus ra ulun ondo' mangintopot Rirun, am namayag risilo intor ra pantula'.

⁹Intor boo ra tana' ti makitaak aku Rirun am makiasi' maa' raginio labusin intor ra kapatayan.

¹⁰Makitaak aku Rirun, iou Ama' kuno, am pai' no iruani' aku ralalom ru kapaganan kuno, paat ra aku kalo maikang manguma' ra pantula' ondo' malilimbau.

¹¹Masalok aku mongompor Rirun am marimbai ra rimbai ru paringkuanangan Rirun, sabap ra Okou nangkirongog ra pakiasian kuno,

¹²am namayag raki' intor ra kapusaan am nampalabus raki' intor ra kapaganan. Ginio ra maringkuanang aku am mongompor Rirun; iou Tuhan, mampatulai aku Rirun. Maguyum ra kapintaran

¹³Paat ra aku lakat poyo mamulok, ra kalo poyo manalimpuun ra pangkiralanan-pangkiralanan kuno, minongoi aku ra Baloi ri Aki Kapuuno' am makiasi' ra totopot makitaak ra kapintaran. Rayuson ku maguyum raginio saboi ra pupus ru bayag kuno.

¹⁵Intor ra mamulok aku maansukan ra kapintaran ondo' minungkalar koson ra kawa' ru anggur ondo' masauk ra maansak. Intor ra lalaing aku nompoloso ra inan kuno inila' ru kapintaran.

¹⁶Bagu ayuk ra aku tumalimpuun rumongog raginio, nakaalap aku ra kapintaran am masuang pangilaan.

¹⁷Rayus aku siminingkot am mangurumat ra ulun ondo' nangani' raki' ra kapintaran.

¹⁸Moogot aku koson maayag ra kapintaran. Minirot aku maguyum ra atan ondo' moonsoi, am kalo nasindualan guang kuno.

¹⁹Mingkotog aku koson mokoowot ra kapintaran mabaya' ra tuyu' koson gumagaya' ukum ru Tuhan. Paat ra pakiasian, mangiluk guang kutu amon makaliman ra aku ti lakat poyo kalo kukula' mapintar.

²⁰Kaa' mingkotog guang kuno koson mokoowot ra kapintaran. Nakatuum aku ra kapintaran ra ralan minggalur ra tula. Intor ra talimpuun mabaya' ra kapintaran nokoowot aku ra pangaratian, am sabap riso kalo igondo' aku iniruanan.

²¹Sabap ra guguangon kuno koson makaalap ra kapintaran, masuang kaga' naalap kuno.

²²Nambalos Tuhan raki' am nangani' raki' ra kapandayan mindagu, am pakayon ku ginio koson mongompor Riso.

²³Ratong no raki', akau ngaangai' ondo' kalo poyo inila', am igigila' kau ra sikulan kuno.

²⁴Kua akau lakat poyo natutusan ra pangilaan, ali' ka moondom kau toojo raginio?

²⁵Rongogo' noyo ragu-ragu kutu: Kolondo' pakuan ra ruit koson sumauk ra ulun mapintar,

²⁶ginio ak ra masaga' migigila' am kalo mauyu' ra mapagon. Masalok mokoondo' ra kaluagan.

²⁷Ilai' noyo galama'; mabaya' ra pirot ra sanganu ayuk, nakaalap aku noyo ra katasuan maayo.

²⁸Kabalu' pana musiti' kau makakapaganan, ampos ondo' moowot mino masuang poyo intor ra pirot mino.

²⁹Masalok kau no maansukan sabap ra guang makaasi' ru Tuhan am pai' no kauyu' mongompor Riso.

³⁰Baalo' noyo kandoi mino ra kalo poyo makai' bulintok nano, am ra paat motopot mangapu kau ra pangayupan intor ra Tuhan.