Read Timugon Murut SIRAK 6 Bible Online

SIRAK 6 - Timugon Murut bible

SIRAK 6

¹Pai' sauk ra pantula' paat ra okou musiti' no masauk ra rangan. Inggalan malaat magibit ra uyu', nogondo' ra ulun makatula ondo' masaga' magabau.

²Pai' polosoo' inan muno kuasaan ru saga' ru guang galama', maa' raginio gogot ru guang galama' no kalo mangai' ra ikang muno am paat ra kinamuloko' muno am niayuk mampaluus ra papag muno, am mangiruan rirun koson ra puun naguol ra kolondo' raun am kawa'.

⁴Koson raginio noyo baal no ra gogot ru guang galama' ondo' kalo kinuasa' mamuso rirun am mampasauk rirun pangiisan ru pantula'.[8] Pangkubayawan

⁵Ulun ondo' mindagu ra molomoi makaalap ra kubayau ondo' masuang.

⁶Kaayag no ra moonsoi ra masuang ulun, kaa' sangulun ayuk ra gino ngai' ru saribu no pasaukon ra ulun paminson muno.

⁷Amon ru masaga' kou kumubayau, pai' kataki' mangintopot ra ulun; kinami' ilo poyo galing ru gumagaya' ilo nua'.

⁸Mokoondo' ulun masaga' kumubayau amon ru makakalabaan ayuk, kaa' paat ra okou makakapaganan, kalo mangindangan ilo rirun.

⁹Mokoondo' rangan ondo' masauk ra pantula' sabap ra mansangor, am manauyu' io rirun ra pasunuron ra ngaangai' ulun.

¹⁰Mokoondo' niayuk rangan ondo' mangakan mabaya' rirun, kaa' mangiruan rirun paat ra okou makakapaganan.

¹¹Paat ra okou makarapu', timinilu io koson rirun galama', am manusub ra ulipon-ulipon muno.

¹²Kaa' paat ra okou nakayaan ra rapu', lumikar io anggal rirun am minggalur rirun.

¹³Inggalur no ra pantula'-pantula' muno, kaa' ilalai' noyo rangan muno.

¹⁴Kubayau ondo' gumagaya' koson ra intok sindungan ondo' moonsoi. Osoi ayuk makaalap no, makatuum ra rorondo' rapu'.

¹⁵Kubayau ondo' gumagaya' kalo mauntob logo nano, am kolondo' pogondo' nano.

¹⁶Io koson ra tatapis muno. Ulun ondo' malaa' ra Tuhan makatuum riso.

¹⁷Ulun ondo' malaa' ra Tuhan mokopopolongkot ra pangkubayawan motopot sabap ra pamakuan nilo ra kubayau nilo koson risilo galama'. Maguyum ra Kapintaran

¹⁸Anak kuno, apuo' noyo pangilaan bulintok ra okou mamulok, am okou pana mokoowot ra kapintaran saboi okou matutuo.

¹⁹Koson mokoowot ra kapintaran okou musiti' mingkotog pangandoi koson sangulun mantatanom ondo' mamparadu' am mantanom ra umo nano, bagu no makaalap kou ra ampos ondo' moonsoi. Raino okou musiti' mampalanat ra bungul koson sangkinolor, kaa' ampos no makasia' kou ra mataki'.

²⁰Ulun ondo' sasambungon am kalo inila' mangkara' ra gogoton ru kapintaran mapagon kaga', am ilo kalo mingkotog koson mokoowot raginio.

²¹Gogoton raginio limanin no koson mansaan ra maagat kaga', am mataki' io mamatir raginio.

²²Koson raginio baal no sabap ra kapintaran maaya' ra inggalan nano,[9] am kalo masuang ulun makaalap riso.

²³Anak kuno, rongogo' noyo am apuo' noyo bilin am pamaguangan kutu.

²⁴Bangkilo' noyo kalayam muno ra rantai ru kapintaran am pasanggapo' noyo kuk no ra liog muno.

²⁵Saani' noyo kapintaran am pai' sangit sabap ra bangkil-bangkil nano.

²⁶Uyumo' noyo kapintaran ra sotopot ru guang muno am bayaa' noyo ralan-ralan no ra ngaangai' ru ikang muno.

²⁷Uyumo' noyo am imumuyi' noyo kapintaran, am kapintaran pana mukab ra guang muno. Guuto' noyo kapintaran am pai' polosoo' kapintaran mugar.

²⁸Pupus no boo io noyo katuuman mu ra kalinasan am kapintaran masauk ra kasagaan muno.

²⁹Bangkil no masauk ra sindungan ondo' mapiot ra tayar muno am pasung no koson ra tatandu' pangurumatan.

³⁰Kuk no koson ra limpor mas am babangkil no koson ribin ondo' moonsoi.

³¹Kapintaran pakayon muno koson ra bayang ru ulun matulai am karaun kaansukan.

³²Anak kuno, makaigigila' kou amon ru mokoondo' kasagaan. Masauk kou ra mapintar amon ru mingkotog.

³³Makaigigila' kou am masauk ra mapintar amon ru masaga' kou mangkirongog am mangurio.

³⁴Ugar no tuum ra ulun mangatutuo, uyumo' noyo ulun ondo' mapintar ra ilo ngai' am pakiila' no riso.

³⁵Musiti' kou masaga' rumongog ra moonong pangilaan ri Aki Kapuuno', am pai' polosoo' ragu-ragu mapintar malabusan intor ra pagilayan muno.

³⁶Amon ru makatuum kou ra ulun ondo' mapintar, tirong no rumondom ra susuab ti koson manambului riso. Ratong no ra masalok riso.

³⁷Pakayo' noyo ngaangai' orou muno koson migigila' am mangurio ra susuban ru Tuhan, am okou pana aniin ra pangaratian am kapintaran ondo' kasaga' muli'.