Read Timugon Murut SIRAK 8 Bible Online

SIRAK 8 - Timugon Murut bible

SIRAK 8

¹Mamakai ra guang matanda' Pai' anggalo' ulun ondo' makakuasa', maa' raginio kalo maratu' kou ralalom ru kalindu' nilo.

²Pai' pansangor ra ulun ondo' langkaya', maa' raginio ilo kalo mampakai ra ngaangai' kaikangan koson gumula' rirun. Masuang ulun noyo napuso ru mas, am raja'-raja' pinalayau ru ginio.

³Pai' pansangor ra ulun kararaguan, sabap baal raginio nogondo' ra mamparuang ra luton ralalom ru apui.

⁴Pai' pakimantaag ra ulun kalo moonsoi, maa' raginio kinamatuaan muno kalo asabin no.

⁵Pai' panginguli' ra ulun ondo' tanga' tumalikur intor ra tula. Karaa' noyo ra itakau ngaangai' noyo makasala.

⁶Pai' kataman ra ulun ondo' tuu' lair, sabap ra itakau pana mokoondo' noyo nasauk ra matutuo.

⁷Pai' paringkuanang sabap ra pinatayan ru sasangulun; karaa' noyo ra itakau ngaangai' musiti' matoi.

⁸Pai' iiso' panuluan ru ulun mapintar. Igigila' noyo ra pagabigan nilo, maa' raginio okou masauk ra ulun ondo' mapandai kaga' am makapangandoi ayuk ra ulun-ulun manguasa'.

⁹Pangundasa' no ra ragu ru mangatutuo, sabap ra ilo pana nakitulu' ra kinamatuaan nilo. Nokoowot kou ra karatian intor risilo am migigila' mangani' ra taam ra paat ondo' motopot.

¹⁰Pai' simbulani' kasagaan galama' ru ulun ondo' makatula', maagu no okou makaaya' kosolob.

¹¹Pai' pakikiala ra ulun ondo' malilimbau, maagu no palukiaton nilo ragu muno koson gumula' rirun.

¹²Pai' pampaira' ra rorondo' ra ulun ondo' makakuasa' poyo intor rirun. Amon pairaan mu io, karaa' noyo kakamot raginio koson kakamot ondo' natatak.

¹³Pai' pampajamin ra utang ru ulun bokon amon ginio makasail ra kaandaran muno. Amon nakatibusu noyo, musiti' kou tumampos mambayar raginio.

¹⁴Pai' pantagi' ra akim, sabap ra maaru' io mamanang sabap ra pangkat nano.

¹⁵Pai' baya' ra sangulun tumanggau ra kalo naaruan, sabap ra io mantipagon ayuk rirun. Mambaal io ra kasagaan ak ru guang nano, am okou matoi sabap ra sambung nali.

¹⁶Pai' pagabu ra sangulun ondo' masaga' gumabu', am pai' ongoi ra intok masiluk mabaya' riso. Ulun koson raginio masaga' mambaal ra kalaatan, am mampatoi io rirun ra intok ondo' kolondo' mangindangan rirun.

¹⁷Pai' pakibilin ra ulun sasambungon, sabap ra ilo kalo mongopot ra ragu.

¹⁸Atan ondo' musiti' inopot, pai' kou pambaal ra saang ru ulun ondo' kalo nauligan muli, sabap ra okou kalo nakapandai atan ondo' potonowon nilo.

¹⁹Pai' ukabo' guang muno ra kalo nauligan ulun am pai' pangapu ra taau moonsoi nilo.