Read Timugon Murut JISAYA 11 Bible Online

JISAYA 11 - Timugon Murut bible

JISAYA 11

¹Papag ri Raja' Daut koson ra puun ondo' tinagar. Kaa' koson ra talantar bagu tumuu' ra tuor ru puun tataun, koson niayuk ra sangulun raja' bagu ondo' sumalula' intor ra papag ri Raja' Daut.

²Kuasa'[22] ru TUHAN manaak riso ra kapintaran am niayuk katutunan am kapintaran koson mamarinta ra ulun nano. Makaulig io ra kasagaan ru TUHAN am mangurumat Riso.

³Masaga' io gumagaya' ra TUHAN. Kalo mangakim io ra ulun ra igondo' ilong kapoam sumugut ra ragu ru ulun.

⁴Ulun musikin akimin no ra matimpok, am paundokon no ulun lamumu' ra kabanisan ru guang. Tana' ti ukumin no ra susuban nano, am ulun malaat pusoon no.

⁵Parintaan no ulun nano ra matimpok am ralalom kabanisan ru guang.

⁶Taani mayan simpung ra domba, rimau bintang mombolong rumumak ra anak ru kambing Anak ru sapi' am anak ru singa' mababaya' maangkan[23] am ngaangai' lalaing mantamung ra ngaangai' no.

⁷Sapi' am baawang mababaya' maangkan, am anak sapi' magupu' ra kiing ru anak baawang. Singa' mongkotop ra sakot koson ra sapi'.

⁸Lalagang pana kalo majamaran, bulintok makimangkuli ra kukuo mabisa'.

⁹Giu' ra Sion, Bulur Matulai ri Aki Kapuuno', kolondo' atan-atan pana malaat kapoam makalalaa'. Tana' ti mapanu' ra ulun ondo' makaulig am mangurumat ra TUHAN koson ra raat nototop ra timug.

¹⁰Masuku' sangarawan bulintok ra sangulun raja' papag ru raja' Daut masauk ra tatandu' ru ngaangai' bansa'. Matong ilo riso, am bansa' nano galama' masauk ra sasabiton.

¹¹Bulintok raginio igondo' poyo TUHAN mamakai ra kuasa' Nano koson magibit saguli' ra ulun Nano ondo' lakat poyo naayag giu' ra Asyur am Misir, giu' ra pagun Patros, Itiopia,[24] Ilam, Babilonia am Gamat, am niayuk intok kiing ru raat am pulu'-pulu'.

¹²Bilaron ru TUHAN bandira' koson mapabala' ra ngaangai' bansa' ra Io tatanga' manimung saguli' ra mamagun ru Israil am Jiuda ondo' nakapantutuliar ra titikop ru tana' ti am magibit risilo muli'.

¹³Pamarintaan ru Israil kalo boo sumolon ra Jiuda, am Jiuda pana kalo boo makimantula' ra Israil.

¹⁴Mababaya' ilo mongoi pamulunsar ra ulun ru Palistin tampilon ra kalasaan am mampagaau ra mamagun tampilon ra sirangon. Kalaan nilo mamagun ru Idom am Moab. Mamagun ru Amon tuminduku' risilo.

¹⁵TUHAN mapalasak ra Teluk Suez. Pasiobon No angin malasu' saboi Sungoi Iprat masauk tulu' ngantaun sungoi boborok ondo' maitik, am osoi-osoi pana makasandaup ra monggolob.

¹⁶Ulun Nano ra ondo' lakat poyo naayag, mokoondo' ralan maayo mingkual intor ra Asyur, koson ra kinamatuaan ru ulun ru Israil miningkual intor ra Misir.