Read Timugon Murut JISAYA 19 Bible Online

JISAYA 19 - Timugon Murut bible

JISAYA 19

¹Gitio noyo tanou ru TUHAN intor ra Misir. Minatong TUHAN ra Misir siminakoi ra gaun ondo' maribok. Ngaangai' sinungkalalaing ru Misir monontol ra saang Nano am namagun ru Misir liminawo.

²Mindagu TUHAN, “Singkualon Ku pangayawan ra gino ngai' ru Misir: pabukat manggal ra pabukat, pasambalayan manggal ra pasambalayan, bandar manggal ra bandar, am raja' manggal ra raja' koson mampagaau ra kuasa'.

³Ampangin Ku inatangan ru ulun ru Misir am polowoon Ku guang nilono. Makiindangan ilo ra ngaangai' sinungkalalaing nilono, makibilin am makitulu' ilo ra babalian am ambiluo ru ulun namagatoi.

⁴Kaa' pataakon Ku ulun ru Misir no ra sangulun raja' ra malaat kaga'. Parintaan ilo ru raja' malaat kaga' no. Aku, TUHAN Ondo' Maayo Kaga' Kuasa' minindagu noyo.”

⁵Timug ru sungoi Nil maitik am kalo mabuoi raginio malasakan.

⁶Sungoi-sungoi boborok mootong bulintok timug no lumasak. Sakot am tabu lumonot,

⁷am nansalinut tatanom ra tobo ru sungoi no mapua' am masiob ru angin.

⁸Moonong ulun mangimpait ra sungoi Nil no malumpus guang am mantangi'; apon am ralo nilono kolondo' boo onong.

⁹Ulun mambaal ra konoon linon malawo guang;

¹⁰ulun mambaal ra konoon am ulun mangandoi malumpus guang am malawo guang.

¹¹Tingganai-tingganai ru bandar Joan no sasambungon! Ngaangai' mambibilin ra raja' ru Misir manaak ra bilin ondo' sasambungon! Mapara' piboo baani nilono mambala' ra raja' ra ilo noyo sumuali ra ulun mapintar am niayuk raja' ra galing i!

¹²Alii ra raja' ru Misir, atibo mambibilin ra raja' ondo' mangapintar rali? Magu' mapandayan nilo inatangan ru TUHAN Ondo' Maayo Kaga' Kuasa' no koson ra Misir.

¹³Tingganai ru Joan am Mimpis sasambungon toojo! Musiti' no tingganayon nilo bansa' raginio, kaa' pinalayau nilo bansa' raginio.

¹⁴TUHAN noyo napasauk risilo manaak ra pinson ondo' mampalayau. Kinibit nano, Misir kolondo' katimpakan am kakasiling koson ra ulun nagauk am nakasunsuyar ra lua' nano galama'.

¹⁵Kolondo' sangulun pana giu' ra Misir makapangindangan, io pana langkaya' kapoam musikin, ondo' makainggalan maayo kapoam kolondo'.

¹⁶Bulintok no masuku' paat ra ulun ru Misir masauk koson ra ruandu' matalou. Monontol ilo malaa' paat makakito ra TUHAN Ondo' Maayo Kaga' Kuasa' manulu' koson mangukum risilo.

¹⁷Ulun ru Misir masauk ra malaa' ra Jiuda moonong ilo pakaraan ra namatasan ru TUHAN Ondo' Maayo Kaga' Kuasa' intor risilo.

¹⁸Bulintok raginio, ragu ru Ibrani pakayon ra limo bandar giu' ra pagun ru Misir. Ulun ra giu' magibot ralalom inggalan ru TUHAN Ondo' Maayo Kaga' Kuasa'. Rondo' ra bandar raginio inggalanin ra “Bandar Mato ru Orou”.

¹⁹Bulintok raginio, giu' ra pagun ru Misir mokoondo' rondo' altar ru TUHAN, am rondo' batu pangkaraan Riso giu' ra balitan ru pagun.

²⁰Altar am batu pangkaraan masauk ra tatandu' ratangan ru TUHAN Ondo' Maayo Kaga' Kuasa' giu' ra Misir. Paat ra ulun ru giu' no imboloon, am mampiau ilo ra TUHAN makiindangan, susubon No sangulun mongoi pamayag risilo.

²¹Mintalang TUHAN ra inan galama' ra ulun ru Misir, makaulig am sumamba ilo Riso, am magibit ilo ra taak simbalui am taak pataakon Riso. Magibot ilo Riso am suguton nilo ibot no.

²²Ukumin ru TUHAN ulun ru Misir, kaa' kalupus raginio mamabas Io risilo. Sumaguli' ilo Riso, am rongogon No pakiasian nilono am niayuk mamabas risilo.

²³Bulintok raginio, makaralan mapila' mangkilolot ra Misir am Asyur. Namagun ra karuruo pagun no maginsaguli' maya' ra ralan no am mababaya' sumambayang.

²⁴Bulintok raginio, Israil nogondo' ayuk boo ra Misir am Asyur, am katatalu bansa' raginio masauk ra barakat ra titikop ru tana' ti.

²⁵TUHAN Ondo' Maayo Kaga' Kuasa' mambarakat risilo am mindagu, “Barakatin Takamin, alii ra Misir ulun Kuno, Asyur binangun Kuno am Israil ulun pinili' Kuno.”