Read Timugon Murut JISAYA 2 Bible Online

JISAYA 2 - Timugon Murut bible

JISAYA 2

¹Gitio noyo tanou intor ri Jiuda am Jirusalim ondo' tinaakan ri Aki Kapuuno' ri Jisaya anak ri Amos:

²Bulintok orou ra matong bulur intok ru Baloi ru TUHAN masauk ra bulur ondo' masawat kaga' ra ilo ngai' bulur ra bokon. Ngaangai' bansa' saguguluyur mongoi ra giu',

³am mindagu ilo, “Ongoi takano ra bulur ru TUHAN,[4] ra baloi ri Aki Kapuuno' ru Israil. Mangila' Io ritakau ra atan kasagaan Nano; am maya' takau ra ralan ondo' pinili' Nano, sabap pangilaan ru TUHAN intor ra Jirusalim; intor ra Sion Io mindagu ra ulun Nano.”

⁴Akimin No ngaangai' bansa' am manalasai ra pansasangaran nilono. Ilang nilo saukon ra radu', am tanggulan saukon ra pais pamutul. Ngaangai' bansa' kalo boo mangayou am kalo boo tumampos mongoi pamulunsar.

⁵Alii ra papag ri Jakub, ugar takau ralalom sinda ru TUHAN!

⁶Iou Aki Kapuuno', iniruanan Mu ulun Muno, papag ri Jakub! Pagun ragitio nototop ra sihir intor ra sirangon am intor ra pagun ru ulun ru Palistin. Timinilu mamagun ra kaulayan ru ulun bansa' ra bokon.

⁷Pagun nilono nososok ra pirok am mas; rapu' nilono kolondo' polos. Kuda nilono masuang kaga' am kurita' kuda nilono kalo mauntob.

⁸Pagun nilono nososok ra sinungkalalaing, am sambaan nilo sinungkalalaing ra binaal nilo galama'.

⁹Moonong ulun asabin am tauyuon. Pai' ilo ampuno', iou TUHAN!

¹⁰Mansibuni ilo ra ralalom ru luang batu giu' ra kabatuan bulur, kapoam mangkali ra luang giu' ra tana' koson pansibunian maa' raginio makatuliar ilo ra sangit ru TUHAN, mansibuni intor ra kuasa' am niayuk katulayan Nano!

¹¹Masaboi orou ra limbau ru ulun liomon am minsawat guang ru ulun pusoon. Bagu no TUHAN ayuk omporon.

¹²Orou raginio TUHAN Ondo' Maayo Kaga' Kuasa' mapainggana' ra ngaangai' ulun ondo' minsawat guang, am mangukum ra ngaangai' ulun malilimbau.

¹³Pusoon No ngaangai' puun ru sidar ondo' masawat giu' ra Libanon, am ngaangai' puun mangaayo giu' ra Basan.

¹⁴Ngaangai' gunung am bulur ra mangasawat tuyason no masauk ra lampam,

¹⁵am niayuk gabaan no moonong manara masawat am timbok silian.

¹⁶Kaa' niayuk ngaangai' kapal ra mangaayo am mongoonsoi polosoron No.

¹⁷Limbau ru ulun liomon No, am minsawat guang ru ulun pusoon No. Ngaangai' sinungkalalaing liomon No saboi mapuso, am TUHAN ayuk omporon ra orou raginio.

¹⁹Ulun mansibuni ra ralalom ru luang batu giu' ra kabatuan bulur, kapoam mangkali ra luang giu' ra tana' koson tumuliar ra sangit ru TUHAN, am mansibuni intor ra kuasa' am katulayan Nano bulintok ra Io matong manguyog ra tana' ti.

²⁰Bulintok ra orou raginio, patirin ru ulun sinungkalalaing ondo' binaal intor ra pirok am mas, ondo' patatangon no ra tikus am pungit.

²¹Bulintok TUHAN matong manguyog ra tana' ti, ulun mansibuni ralalom ru luang batu giu' ra kabatuan bulur koson tumuliar intor ra sangit Nano, am mansibuni intor ra kuasa' am niayuk katulayan Nano.

²²Ginio ra, pai' pangintopot ra ulun mapandai matoi sabap kolondo' logo nilo.