Read Timugon Murut JISAYA 21 Bible Online

JISAYA 21 - Timugon Murut bible

JISAYA 21

¹Gitio noyo tanou ru TUHAN intor ra Babilonia. Koson ra bagiu' mapuor mansail ra tana' kaagisan, koson raginio niayuk ra karaat matong intor ra rondo' pagun ondo' makalalaa'.

²Nakaapu aku ra pinaintalang intor ra kasaukan ondo' malaat kaga', intor ra kalaatan am pamusaan. Loyog kano alii ra saujor ru Ilam, pamulunsar no! Awangi' bandar-bandar no, alii ra saujor Madai! Pupusin ri Aki Kapuuno' kaimbalaan ondo' makinibitan ru Babil.

³Atan ondo' nakito kuno am norongog ralalom pinaintalang raki' makalalaa' am makaruol toojo; karualan raginio koson ra ruandu' maganak.

⁴Guang kuno magalabo am monontol aku malaa'. Rondom ondo' kaandaman kuno magibit ayuk ra aku monontol.

⁵Ralalom ru pinaintalang no rondo' pagakanan maayo inatang; apin pinabingkal koson panturungan ru tambului. Nasuangan piniau mangakan am manginum. Pulali' maining panusuban, “Akau ngai' panglima, tomposo' noyo perisai mino!”

⁶TUHAN pana mindagu raki', “Ugar no am pongondoyo' sangulun mantatamung, am susubo' io mapabala' atan nakito nano.

⁷Amon ru nakito no sangulun kiminura' ra kuda sikaruo, am niayuk kiminura' ra kaladai am unta, musiti' imansain no ilo.”

⁸Mantatamung raginio[38] nampiau, “Tuan, nangandoi aku ra intok pantamungan ti orou am rondom.”

⁹Pulusat ru ulun kiminura' ra kuda sikaruo. Mantatamung raginio napabala', “Babil napuut noyo! Ngaangai' sinungkalalaing ondo' sambaan nilo tinutuk nakuliagai ra tana'.”

¹⁰Alii ra bansa' kuno Israil, pinanjak-panjak kou koson ra gandum. Kaa' ragino balain takamin ra tanou moonsoi ondo' norongog kuno intor ra TUHAN Ondo' Maayo Kaga' Kuasa', i Aki Kapuuno' ru Israil.

¹¹Gitio noyo tanou ru TUHAN intor ra Idom. Sangulun intor ra Idom nampiau raki', “Okou mantatamung, mabuoi poyo kia rondom ti? Indagu no, kula' poyo buoi ra kalo poyo tumawang?”

¹²Taamo' ku, “Susuab no matong kaa' molondom matong poyo. Amon ru masaga' mangkuot, pangkuot poyo.”

¹³Gitio noyo tanou ru TUHAN intor ra Arab. Alii ra ulun ru Didan, Kafilah-kafilah mino nangkim giu' ra Arab, tana' ra mapua' no.

¹⁴Alii ra ulun ru Tima, painumo' noyo ulun pinaason ondo' matong ramuyun, am ulun naanjung paakano'.

¹⁵Ilai' noyo, ulun nagiru' intor ra ilang ondo' binutus intor ra angkap, intor ra tanggayan ru panah ondo' pinalagur, am intor ra pangayawan.

¹⁶TUHAN pana mindagu raki', “Topot sambilor poyo, katulayan ru bansa'-bansa' ru Kidar no mapupusan.

¹⁷Ulun-ulun mamanah nilono iono ulun mangaikang kaga' ra ilo ngai' ulun ru Kidar, kaa' kalo kukula' ulun nilono matatang. Aku TUHAN, i Aki Kapuuno' ru Israil minindagu noyo.”