Read Timugon Murut JISAYA 23 Bible Online

JISAYA 23 - Timugon Murut bible

JISAYA 23

¹Gitio noyo tanou ru TUHAN intor ra Tirus. Panulaboi kano, alii ra ulun-ulun mapaugar ra kapal raat ru Sipanyol giu' ra raat! Bandar mino giu' ra Tirus binunsag noyo. Baloi am papararalan ra kapal napuut. Morongog min bulintok akau mintor ra Siprus.

²Pantangi' kano, alii ra ulun-ulun mangindapu' intor ra Sidon! Akau noyo nanusub ra ulun

³mongoi ra sandaup ru raat koson magalig pantalan ra gandum intor ra Misir am koson talanon ra ngaangai' bansa'.

⁴Bandar Sidon tinauyu'! Raat malangka' am malandom kalo mangiou rirun, am mindagu, “Kolondo' anak kuno. Kalo igondo' aku napasukor ra anak ungkuyon kapoam ruandu'.”

⁵Ulun pana ru Misir naliangan am malawo guang paat nokorongog ra Tirus pinuso noyo.

⁶Panulaboi noyo am pagiru' noyo ra Sipanyol, alii ra namagun ra libung ru nagas!

⁷Gitio kia bandar ru Tirus ondo' masalok makaansuk, ondo' binangun intor poyo ra galing i? Gitio kia bandar ondo' manusub ra ulun mongoi ra sandaup ru raat koson mangindapu' am mayan ra giu'?

⁸Osoi kia nangatang ra baal koson ragitio ra Tirus, bandar ra maayo no? Sala' kia ka ulun-ulun mangindapu' no ulun bangsawan ondo' urumaton toojo ra tana' ti?

⁹TUHAN Ondo' Maayo Kaga' Kuasa' nangatang noyo raginio, maa' raginio malanggaan No limbau nilono ondo' masalok mamanggo ra baalon nilono, am niayuk magasab ra ulun ondo' makainggalan maayo.

¹⁰Ongoi kau pagitatanom, alii ra namagun ru Sipanyol! Kolondo' osoi-osoi pana boo mangampin ramuyun.

¹¹Palar ru TUHAN binilar no ra rasawat ru raat am mamulir ra ngaangai' pamarintaan. Nanusub Io koson mamuso ra pusor-pusor ru pangindapuan giu' ra Punisia.

¹²Okou bandar ru Sidon, kaansukan muno napupusan noyo. Ragino mamagun muno inimbolo'. Kabalu' pana magiru' ilo ra pagun Siprus, ilo lakat poyo kalo maayag. (

¹³Sala' ka ulun ru Asyur, kaa' ulun ru Babilonia ondo' nopoloso ra tambiag masigo salilitau giu' ra Tirus. Ulun ru Babilonia ondo' namangun ra manara-manara koson mampalibung ra pantula'; ilo noyo namuut ra kubu-kubu giu' ra Tirus, am niayuk napasauk ra bandar no napuut.)

¹⁴Panulaboi noyo, alii ra ulun-ulun ondo' mapaugar ra kapal ru raat! Bandar ra lansanin mino napuso noyo.

¹⁵Bulintok no masuku' paat Tirus lilianin buoi tulu' ngoopor ngambilor, ioginio gawar ru umur sangulun raja'. Mopongo raginio, Tirus masauk koson ra sangulun mantalan ra inan ondo' pinabala' ra rimbai koson ragitio:

¹⁶Ibito' noyo jitor muno, liputo' bandar, alii ra ruandu' mantalan ra inan ra kalo boo karaan ru ulun! Kayuso' noyo jitor muno, parimbai no saguli', maa' raginio karaan kou boo saguli'!

¹⁷Makasail tulu' ngoopor ngambilor no, polosoon ru TUHAN Tirus maparayus saguli' ra pangindapuan no ra ngaangai' pamarintaan ra tana' ti.

¹⁸Nansalinut ampos ru pangindapuan raginio pataakon ayuk ra TUHAN. Ruit intor ra pangindapuan no kalo buliin kaa' pakayon koson pabalion ra akanon am bayang ru ilo ondo' sumamba ra TUHAN.