Read Timugon Murut JISAYA 26 Bible Online

JISAYA 26 - Timugon Murut bible

JISAYA 26

¹Masuku' bulintok no rimbayon ru ulun rimbai ragitio giu' ra tana' Jiuda: Bandar takau ti maikang! I Aki Kapuuno' mangampin ra timbok Nano!

²Ukabi' noyo kulobon-kulobon garabang ru bandar, Maa' raginio bansa'-bansa' ra gumagaya' sumubol, ondo' ulun nano gumagaya' ra kasagaan ri Aki Kapuuno'.

³Okou, TUHAN, mangani' ra pababansayan am kaansukan ra ulun ondo' maikang guang, sabap ra mangintopot ilo Rirun.

⁴Pangintopot noyo ra TUHAN ra sabuoi-sabuoi no; masalok Io mangampin ritakau.

⁵Ulun malilimbau paingganaan No; Bandar ra mapiot ondo' inayanan nilono binunsag No, am pinuut No timbok no saboi sawat nano nontotop ayuk boo ra tana'.

⁶Ulun musikin am naimbolo' mamanjak-manjak riso.

⁷Ralan ondo' binayaan ru ulun moonsoi no mabanis, sabap ra Okou, TUHAN, kinabanis Mu ginio risilo.

⁸Sumugut akai ra kasagaan Muno am lumansan Rirun; Okou ayuk kaandaman mai.

⁹Salibuor kuno moondom Rirun bulintok molondom; uyumon Tokou ralalom pirot ru guang kuno. Bulintok ra Okou mangakim ra tana' ti ra maagu no, namagun nano makapandai ra arati' ru katimpakan.

¹⁰Kabalu' pana moonsoi pamakuan ra ulun malaat, kaa' kalo niayuk mambaal ilo ra matimpok. Giu' pana ra pagun ru ulun mabanis guang, lumapau ilo niayuk, am kalo mangiou ra katulayan Muno.

¹¹Pantula' Muno kalo makapandai ra Okou mangukum risilo. Iou TUHAN, tauyuo' ilo, am polosoo' ilo maimbolo'. Polosoo' noyo ilo maantungan ru ukuman ondo' pinatampos Muno risilo. Polosoo' noyo ilo makakito ra mapara' piboo gayo ru katagaman Muno tayar ru ulun Muno.

¹²Iou TUHAN, pinasauk Mu akai ra langkaya'; ngaangai' naalap maino ampos intor ra nangindanganan Mu ramon.[41]

¹³Iou TUHAN, i Aki kapuuno' mai, nakaili' akai kinuasa' ru ulun bokon, kaa' Okou ayuk TUHAN mai.

¹⁴Ragino minatoi ilo noyo am kalo boo maayag saguli'; baangkai nilono kalo boo tumirong saguli', sabap inukuman Mu ilo am namuso risilo. Kolondo' osoi-osoi pana mangkara' risilo.

¹⁵Iou TUHAN, rinuangan Mu suang ru bansa' maino, am kinalangka' Mu libung ru wilayah maino, sabap raginio Okou omporon.

¹⁶Iou TUHAN, inukum Mu ulun Muno, am ralalom kaimbalaan, mampiau ilo Rirun.

¹⁷Iou TUHAN, Okou nangkinibit ramon giminolok marualan koson ra sangulun ruandu' maganak.

¹⁸Panantian akai, am kikisol marualan kaa' kolondo' atan-atan anakon mai. Kalo makapapamanang akai ra tana' ti; kalo niayuk makapamparuang akai ra mamagun ra tana' ti.

¹⁹Ulun Muno ra minatoi maayag saguli'! Baangkai nilono tumirong saguli'. Ngaangai' ondo' linobong ra kalabangan, tumirong am marimbai ralalom kaansukan. Koson ra bolobou mamasa' ra tana', koson raginio niayuk ra TUHAN mamayag risilo ondo' nabuoi noyo minatoi.

²⁰Subol kano ra baloi mino, akau bansa' kuno, am angabi' kulobon. Pansibuni sangkinolor, saboi sangit ru TUHAN luminos.

²¹TUHAN matong intor ra intok Nano giu' ra suruga' koson mangukum ra ulun ra tana' ti sabap ra tula nilo. Namatayan ra inopot ra tana' ti masingkual, am lobong pana kalo boo mapasibuni risilo ondo' pinatoi.