Read Timugon Murut JISAYA 32 Bible Online

JISAYA 32 - Timugon Murut bible

JISAYA 32

¹Orou ra matong no sangulun raja' mamarinta ra matimpok, am ngaangai' tingganai ru bansa' mapaugar ra katimpakan.

²Ilo koson ra intok sindungan intor ra angin am bagiu'. Koson ilo ra sungoi-sungoi ondo' tumilis ra tana' kaagisan, koson ra nasindungan ru batu maayo giu' ra tana' mapua'.

³Mato am talingo nilono masalok maukaban koson magilong ra gogoton ru ulun.

⁴Ilo ondo' galing i maajag-ajag mamatas ra kalo malingas am totopot makarati'. Ilo ondo' kakabang-kakabang ra mindagu makaindagu ra matalinaasan.

⁵Ulun sasambungon kalo boo karaan ra urumaton kaga', am ulun mamparuung kalo raguon ra mabanis guang.

⁶Ulun sasambungon mindagu ra ragu-ragu sasambungon am mangatang ra baal malaat. Binaal am raguon nilono magasab ra TUHAN. Kalo igondo' ilo panaak ra akanon ra ulun maitilan kapoam manaak ra inumon ra ulun pinaason.

⁷Ulun mamparuung mangkara' am mambaal ra malaat. Mangkara' ilo ra ralan mamparuung ra ulun musikin ralalom ragu-ragu abau, am mongompong ra ulun musikin makaalap ra kaapuan nilono.

⁸Kaa' ulun mabanis guang mangatang ra baal ondo' matimpok, am mamatas ralalom katimpakan.

⁹Rongogo' noyo, akau ruandu' ondo' maayag ra matasu', nakalabus intor ra pagalabaan.

¹⁰Ragino majala' noyo guang min, kaa' sambilor poyo malumpus kau, sabap ra kawa' ru anggur makai' kapuso.

¹¹Moonsoi noyo kinaayag-ayag min, nakalabus intor ra pagalabaan, kaa' ragino ponontol noyo ra malaa'! Labas noyo am pansabuk ra konoon karung ra awak mino.

¹²Tangii' noyo umo-umo mino ra malabung am umo ru anggur mino ra napuso noyo.

¹³Ragino bulungkut am kataunan makaruui timinuu' ra tana' ru bansa' kuno. Tangii' noyo baloi-baloi intok ru ulun mangiantak, am bandar nototop ra kaagawan.

¹⁴Istana pana iruanin am pusor ru bandar nasauk ra masiluk. Bulur-bulur am manara-manara intok ru mantatamung no mapuut ra sabuoi-buoi no. Kaladai masigo am domba no salilitau am mongkotop ra giu' no.

¹⁵Kaa' igondo' poyo i Aki Kapuuno' matong ralalom kuasa' Nano. Tana' ra mapua' pana masauk malabung, am umo no mapaingkual ra ampos ondo' masuang.

¹⁶Giu' ra titikop pagun mokoondo' ra kabanisan ru guang am katimpakan.

¹⁷Pagun raginio kalinuos ayuk am kolondo' sasou ra sabuoi-buoi no sabap ra moonong ulun mambaal ra atan ayuk motopot.

¹⁸Ulun ri Aki Kapuuno' kalo pana boo maimamang, am baloi nilono kalinuos ayuk am makakaansayan,

¹⁹kabalu' pana kataunan malumpa' ru rasam batu am bandar mapuut toojo.

²⁰Mapara' piboo bansuk ru ngaangai' ulun sabap ra tatanom makatimug ra lumuab, am padang ru sakot masauk ra intok ondo' kalinuos ayuk am ayanin ru kaladai am sapi'.