Read Timugon Murut JISAYA 34 Bible Online

JISAYA 34 - Timugon Murut bible

JISAYA 34

¹Ratong kau, akau ngaangai' bansa'! Timung kano am rongog kano! Titikop ru tana' am moonong ulun minayan no musiti' rumatong am mangkirongog.

²TUHAN sumangit kaga' ra ngaangai' bansa' am pulalai ru saujor nilono. Mangukum am mamuso Io risilo.

³Baangkai nilono kalo lobongon, kaa' polosoon mootong. Ngaangai' gunung masauk malia' sabap ra maliuran ru raraa'.

⁴Mato ru orou, bulan, am butitin matutuk. Limbowon mapuso, ilain koson ra rinulun koson naskhah rinulun. Butitin-butitin maratu' koson ra raun matutu' intor ra puun ru anggur kapoam puun ru nunuk.

⁵Giu' ra limbowon TUHAN nomongo noyo ra ilang, am ragino ilang no makalumpa' ra bansa' ru Idom, ulun ondo' inukuman am pusoon.

⁶Ilang Nano malimpot ra raraa' am lomok, koson ra raraa' am lomok ru domba am kambing ondo' sinimbalui. TUHAN mangatang ra taak simbalui no giu' ra bandar Bojra, am mangatang ra panimbaluyan masuang giu' ra pagun ru Idom.

⁷Ulun-ulun matoi koson ra sapi' masigo am sapi' mamulok. Pagun nilono malimpot ra raraa' am mototop ra lomok.

⁸Ginio noyo bulintok no TUHAN mamayag ra Sion am mansuli' ra pantula'-pantula' ru Sion.

⁹Sungoi-sungoi giu' ra Idom makulau masauk ra tiir am tana' no masauk ra bilirang. Titikop ru pagun no mosolob koson ra tiir.

¹⁰Orou rondom simbula' ru apui no kalo malasa' am lisun no mambuun ra sabuoi-buoi no. Pagun no pinoloso tinatang ra naliung-liung am mapua' saboi ra papag ka papag, am kolondo' sangulun pana mansail riso.

¹¹Puok am bangkaak mayan ra intok raginio. Polosoon ru TUHAN giu' no kumuliasou-asou koson ra kalo poyo namangunan i.

¹²Pagun raginio kolondo' raja' am tingganai-tingganai nano mapuso.[44]

¹³Bulungkut am sakot makaruui tumuu' ra ngaangai' istana am bandar ondo' makatimbok. Taani am susuit unta minayan ra giu'.

¹⁴Bibiag masigo sakayat-kayat, riwato mantataam am riwato ru rondom[45] matong maguyum ra ayanan.

¹⁵Giu' no puok manabunsut, mantalu', magamut am magalung ra anak-anak nano. Susuit nasar pana tumimung mababaya' ra tuop nano.

¹⁶Uyumo' ralalom kitab ru TUHAN am basaa'. Kolondo' rondo' pana intor ra ngaangai' ilo ondo' maayag no matatak kapoam kolondo' tuop. Inaru' noyo ru TUHAN, am Io galama' manimung ra ngaangai' ilo ondo' maayag no.

¹⁷TUHAN noyo mantayar ra tana' ra ilo ngai' ondo' maayag no; moonong nilo matayaran, am mayan ra tana' no ra sabuoi-buoi no am niayuk mompolonggom ra tana' no ra papag ka papag.