Read Timugon Murut JISAYA 40 Bible Online

JISAYA 40 - Timugon Murut bible

JISAYA 40

¹“Bansuko' noyo ulun Kuno, bansuko' ilo no!” ragu ri Aki Kapuuno' mino.

²“Bansuko' noyo namagun ru Jirusalim. Balai' ilo, sama' noyo kaimbalaan nilono, am tula nilono inampun Ku noyo.”[52] Inukum Ku ilo ra sotopot-topot no sabap ra tula nilono.

³ Morongog bolos ru ulun mampiau, “Pongoono' noyo ralan ru TUHAN giu' ra tana' kaagisan! Baniso' noyo ralan giu' ra agis limayak tayar ri Aki Kapuuno' takau!

⁴Taubi' noyo moonong limayak; rataa' noyo moonong gunung. Bulur-bulur masauk ra dataran, am tana' ra takukutur no rataan.

⁵Katulayan ru TUHAN pana pabalaan, am moonong ulun makatalinono'. TUHAN galama' noyo nambantu' no.”

⁶Norongog bolos ru ulun mampiau, “Pabalaa' noyo tanou ragitio!” “Atan tanou ra musiti' pabalaan kuno?” mangkuot aku. “Pabalaa' noyo ulun koson ayuk ra sakot; koson ilo ayuk ra bunga' ondo' kalo tumaan ra mabuoi.

⁷Sakot masauk mapua', am bunga' pana lumonot, bulintok ra TUHAN mapasampui ra angin ondo' malasu'. Ulun niayuk nogondo' koson ra sakot.

⁸Sakot masauk kumolop am bunga' pana lumonot, kaa' ragu ri Aki kapuuno' takau mantilayun ra sabuoi-buoi no.”

⁹Okou Jirusalim, pangkiwa' no ra bujuk ru gunung ondo' masawat am pabalaa' noyo tanou moonsoi! Okou Sion, pampiau no ra bolos matangil am potonowo' noyo tanou moonsoi![53] Pampiau no am pai' kalaa'. Balai' noyo bandar-bandar giu' ra Jiuda ra i Aki Kapuuno' nilo matong!

¹⁰ TUHAN Raja' matong koson mamarinta am makakuasa', Ibiton No ulun ondo' binayag Nano.[54]

¹¹Alungin No ulun Nano koson ra sangulun magagalung; timungon No am kubibilon No anak-anak ru domba, am ralalom kinolomoi, aakon No indung-indung ru domba.

¹²Osoi kia makapanuku' ra timug ru raat ondo' suukon ru palar nano, kapoam manuku' ra limbowon mamakai ra dangou? Osoi kia makapanuku' ra tana' mamakai ra sangkir, kapoam manimbang ra bagat ru gunung am bulur mamakai ra timbangan?

¹³Osoi kia makapanusub ra TUHAN, am osoi kia makapangila' am makapaminson Riso?

¹⁴Osoi kia kuatin No koson makaalap ra kapandayan am pangaratian? Osoi kia manaak Riso ra panuluan koson mamatas ra matimpok?

¹⁵Pampaguangan ru TUHAN, bansa'-bansa' koson ra somposok timug ralalom ru pansagawan, koson sangunor kaau ra timbangan; pulu'-pulu' nogondo' maan no ra kaau.

¹⁶Ngaangai' bibiag giu' ra kataunan Libanon kalo maukop saukon ra taak simbalui koson mapabansuk ra guang[55] ri Aki Kapuuno' takau, am puun-puun ra giu' no kalo maukop koson saukon ra luton.

¹⁷Ngaangai' bansa' kolondo' arati' no Riso, koson ayuk ra kolondo' minatong ra saang Nano.

¹⁸Osoi kia maalap min pogondoo' ri Aki Kapuuno'? Osoi kia guangon min pogondoo' Riso?

¹⁹Kalo nogondo' Io ra sinungkalalaing ondo' binaal ru kalindu' ru ulun, ondo' inangkupan ra mas ru ulun manukang ra mas, am inapinan ra pirok.

²⁰Ulun ra kalo makabali ra mas am pirok, mampili' ra tataun ondo' kalo mataki' mapasa'. Maguyum io ra ulun manukang ra mapandai koson mambaal ra sinungkalalaing ondo' kalo maratu'.

²¹Kalo kia nakapandai kau? Kalo kia binalaan kau intor ra galing i? Sala' kia ka i Aki Kapuuno' namangun ra tana'?

²²Io no nanguasa' ra titikop ru tana' ti; namagun ru tana' makito boborok koson ra gapu'. Bilaron No limbowon koson ra konoon, am pabingkalon no koson ra kim ayanin.

²³Ratuin No pamarinta ra nanguasa', am liomon kuasa' nilo.

²⁴Ilo no koson ra tatanom mamulok, ondo' bakat nano kakatuu' ayuk. Paat ra TUHAN mapasampui ra angin, mapua' ilo am masiob koson ra rami.

²⁵Osoi kia maalap min pogondoo' ri Aki Kapuuno' Ondo' Matulai Kaga'? Mokoondo' kia mogondo' koson Riso?

²⁶Tingaano' noyo limbowon am urioo'! Osoi kia namangun ra ngaangai' butitin? Io noyo nanusub ra butitin mingkual koson ra pulalai ru saujor, mapandayan No kula' suang, am mampiau ra inggalan ru moonong butitin! Kuasa' Nano maayo kaga' — kolondo' rondo' butitin pana matatak!

²⁷Koon poyo raginio, okou Israil, kua kia pangimuag kou, ra TUHAN kalo makapandai ra kapaganan muno, am kalo mampalio ra ondo' kaapuan muno?

²⁸Kalo kia nakapandai kou? Kalo poyo kia nokorongog kou? TUHAN iono i Aki Kapuuno' ondo' mantilayun; Io no namangun ra titikop ru tana' ti. Kalo igondo' Io kaagui kapoam boboon. Kolondo' osoi-osoi pana makapandai ra pangkaraan Nano.

²⁹Paikangon No ulun ra lamumu', am manaak ra kaikangan ru ulun ondo' lamuoi.

³⁰Ulun mamulok pana masauk ra maagui am boboon; lalaing pana maratu' sabap ra maagui.

³¹Kaa' ulun ondo' lumansan ra TUHAN, mokoowot ra kaikangan bagu. Ilo koson ra susuit kanui, ondo' minsawat pansiab ralalom kaikangan ru kawo nano. Masimbul ilo am kalo maagui; mugar ilo am kalo lumami'.