Read Timugon Murut JISAYA 41 Bible Online

JISAYA 41 - Timugon Murut bible

JISAYA 41

¹Indagu i Aki Kapuuno', “Pongkoror kau am rongogo' noyo ragu Kutu, akau namagun ra pagun-pagun maalur! Tampos kano am pootoro' pantagian mino ra makama; aniin kau ra kaluagan koson mindagu. Ibok no aruon takau osoi motopot am osoi makasala.

²Osoi kia naparatong ra mangnguasa' intor ra sirangon,[56] am napamanang riso ra ati ayuk angayan nano? Osoi kia ondo' nangani' riso ra kamanangan ra raja'-raja' am bansa'-bansa'? Ilang nano monotok risilo, pagilayan risilo onongon ayuk ra kaau. Panah nilono mapatabulias risilo koson ra rami masiob ru angin.

³Mangilou ilo risilo am jumalai ra kolondo' mongompong, maribok kaga' saboi mamaar kalo makakirau ra tana'!

⁴Osoi kia nambaal ra baal koson raginio? Osoi kia nangaru' ra sejarah? Aku, TUHAN ondo' nakapagulu, am Aku soroi saboi ra pamupusan.

⁵Mamagun ru pagun-pagun ra maalur magilong ra binaal Kuno; naliangan ilo am monontol malaa'. Ginio ra minatong ilo ngai' am tumimung.

⁶Ngaangai' ulun mangindangan ra rondo' am bokon, am masalok moposorot ra guang.

⁷Ulun manukang ra tataun moposorot ra guang ru ulun manukang ra mas, am ulun ondo' mantitip ra logam no ra panaa', mongompor ra ulun ondo' manitip ra logam ra bantulan. Konilo, ‘Moonsoi toojo kandoi muno.’ Sinungkalalaing no pana sinangat ra paku' maa' raginio kalo boo maunga'.

⁸Kaa' akau Israil, ulipon Kuno, akau noyo ulun pinili' Kuno, papag kau ri Abragam, kubayau Kuno.

⁹Ibiton Takamin intor ra pompor ru tana'; piniau Takamin intor ra intok-intok ra maalur. Mambala' Aku, ‘Akau ulipon Kuno.’ Kalo inggalarin Takamin, kaa' pilion Takamin.

¹⁰Pai' kalaa' sabap ra Aku minaya' ramuyun. Pai' pagalabo sabap Aku i Aki Kapuuno' min. Paikangon am indanganon Takamin; sindungin am bayagon Takamin.

¹¹Ulun ondo' sumangit ramuyun maala am tauyuon. Ulun ondo' manggal ramuyun matoi io am mapuso intor ra tana' ti.

¹²Uyumon min ulun ondo' manggal ramuyun, kaa' kalo makatuum kau risilo. Ulun ondo' mangayou manggal ramuyun ilo matoi am mapuso.

¹³Aku noyo TUHAN, i Aki Kapuuno' min; ikangon Takamin ra ragu, ‘Pai' kalaa', indanganon Takamin.’ ”

¹⁴TUHAN mindagu, “Kabalu' pana akau boborok am lamuoi, akau Israil, pai' kalaa', indanganon Takamin. Aku i Aki Kapuuno' ru Israil, i Aki Kapuuno' ondo' matulai, Aku noyo namayag ramuyun.

¹⁵Saukon Takamin koson ra papan pangagik ondo' baguon, malarom, am makaripon. Agikon min gunung am kuliagayon min; bulur-bulur pana tutukon min saboi masauk ra kaau.

¹⁶Ngaangai' no atapin min, am ngaangai' no masiob ru angin, am pantabuliason ru bagiu'. Akau pana maansukan sabap ra Aku i Aki Kapuuno' min; omporon min Aku, i Aki Kapuuno' ru Israil, i Aki Kapuuno' ondo' matulai.

¹⁷Bulintok ra ulun Kuno ra naimbolo' no maguyum ra timug, bulintok ra liog nilono napuaan sabap ra pinaason, Aku, TUHAN mangiou ra pakiasian nilono; Aku, i Aki Kapuuno' ru Israil, kalo igogondo' manatang risilo.

¹⁸Baalon Ku sungoi-sungoi tumilis ra bulur-bulur ondo' nalagas, am taur ru timug buburual ra limayak. Kulawan Ku tana' kaagisan masauk ra tulubong-tulubong am timug buburual ra tana' ondo' mapua'.

¹⁹Giu' ra tana' kaagisan patuwon Ku puun ru sidar, puun ru akasia, puun ru kemunting am puun ru jaitun. Tana' ra nalagas masauk ra kataunan puun ru pain, puun ru juniper, am puun ru sipris.

²⁰Ngaangai' ulun pana magilong riso am makapandai ra Aku, TUHAN, ondo' nambaal no. Urioon nilo am mangarati' ra i Aki Kapuuno' ru Israil, Aki Kapuuno' ondo' matulai nambaal no.”

²¹Gini noyo TUHAN, raja' ru Israil mindagu, “Akau dewa ru bansa'-bansa', pasalulaa' noyo naguang mino, am pabalaa' noyo sasaban-sasaban no!

²²Ibok no am panala' noyo atan kasaukan no, maa' raginio makapandai akai bulintok ra kasaukan raginio matong. Pabalaa' noyo kasaukan ra galing, am pabalaa' arati' no ramon.

²³Panala' noyo ra baal-baal ondo' masauk ra maagu no, maa' raginio makapandai akai ra akau no topot-topot matulai! Baalo' min atan ondo' moonsoi, kapoam atan ondo' malaat; maa' raginio mangimuag akai am malaa'!

²⁴Akau am binaal mino kolondo' atan-atan arati'; ulun sumamba ramuyun mampajaka' ayuk.

²⁵Binuir Ku guang ru sangulun intor ra sirangon;[57] kinibitin Ku io mongoi pamulunsar intor ra ralayo. Ngaangai' mangunguasa' kikinjangin no koson ra losok, koson niayuk ra sangulun manukang ra paliuk manginjang-nginjang ra tana' bandulan.

²⁶Osoi kia ramuyun igondo' manala' ra baal koson raginio, maa' raginio makapandai akai inala' raginio motopot? Kolondo' osoi-osoi pana ramuyun manala' ra baal koson ragitio! Kolondo' sangulun pana mangkirongog ramuyun mindagu ra atan-atan!

²⁷Aku TUHAN, Aku noyo nakapagulu napatanou ra babaal raginio ra Sion; Aku nangator ra ulun sinusub giu' ra Jirusalim koson mapasaboi ra tanou moonsoi, ‘Ilai' noyo bansa' mino rumatong! Ilai' noyo ilo minuli'!’

²⁸Bulintok ra Aku magilong ra dewa-dewa no, kolondo' mindagu ra atan-atan, kolondo' makataam ra pangkuatan Kuno.

²⁹Ngaangai' dewa no kolondo' onong, kolondo' atan-atan mabaal. Dewa-dewa no sinungkalalaing ayuk, lamuoi am kolondo' lulu'.”