Read Timugon Murut JISAYA 45 Bible Online

JISAYA 45 - Timugon Murut bible

JISAYA 45

¹TUHAN nampalantik ri Koris masauk ra raja'. Pinili' No i Koris koson mangunguasa' ra bansa'-bansa'; sinusub No i Koris koson mangiru' ra kuasa' ru raja'-raja', ukabin ru TUHAN no kulobon-kulobon garabang ru bandar no riso. Gitio noyo ragu ru TUHAN no ri Koris,

²“Aku galama' manampos ra ralan no rirun, Gunung am bulur rataan Ku. Garabang tambaga' puuton Ku, am mamandak ra umpok-umpok ru basi'.

³Aniin Tokou ra kalangkayaan intor ra intok-intok ondo' molondom am nakasibuni; bagu no makapandai kou ra Aku noyo TUHAN, am niayuk i Aki Kapuuno' ru Israil nampiau noyo ra inggalan muno.

⁴Linantik Tokou koson mangindangan ra ulipon Kuno Israil, ulun ra pinili' Kuno. Inanian Tokou ra pangkat pangurumatan kabalu' pana okou kalo makaulig Raki'.

⁵“Aku noyo TUHAN; kolondo' bokon. Aniin Tokou ra kaikangan ondo' kasagaan Kuno, kabalu' pana okou kalo makaulig Raki'.

⁶Gini noyo binaal Kuni maa' raginio intor ra sirangon saboi ra kalasaan ngaangai' ulun makapandai ra Aku noyo TUHAN; kolondo' bokon ondo' ayuk am Aku.

⁷Aku noyo namangun ra sinda am kalandaman; Aku noyo maparatong ra barakat am karaat. Aku noyo TUHAN ondo' nambaal ra ngaangai' no.

⁸Patuunon Ku kamanangan koson ra rasam intor ra limbowon; tana' ti pariukab koson mangapu riso, am tumuu' boo kaluagan am katimpakan, sabap ra Aku, TUHAN, mapasauk ra babaal ragitio.”

⁹Aibui boo ra ulun ondo' minansang ri Namangun nano; ulun no koson ra paliuk ondo' manggal ra ulun nambaal no. Nangkuot kia tana' lia' no ra ulun manukang ra paliuk, “Atan binaal muno?” Makaindagu kia paliuk no ra ulun nambaal riso no kalo matuyu'?

¹⁰Aibui boo ra ulun mangkuot ra matuo nano, “Kua kia anako' aku koson ragitio?”

¹¹TUHAN, i Aki Kapuuno' ru Israil, i Aki Kapuuno' ondo' matulai mindagu, “Pangkuot kano Raki' intor ra orou matong. Kaa' pai' pangkuot intor ra anak-anak Kuno, kapoam manusub Raki' mambaal ra kandoi.

¹²Aku noyo TUHAN napasauk ra tana' ti, am namangun ra ulun koson mangayan no. Ralalom kuasa' Kuno bingkalon Ku limbowon, am manguasa' ra mato ru orou, bulan am butitin-butitin.

¹³Aku noyo nanusub ri Koris koson mapaugar ra kasagaan Kuno am mapaundok ra katimpakan. Moonong ralan ra bayaan nano rataan Ku. Baalon no sagulio' bandar Kuno Jirusalim am mapalabus ra ulun Kuno ondo' rinakop, kolondo' rasua am kalo kibayarin.” TUHAN Ondo' Maayo Kaga' Kuasa' minindagu noyo.

¹⁴Mindagu TUHAN ri Israil, “Gogoto' min kalangkayaan ru tana' ru Misir am Itiopia,[66] Ulun-ulun ru Siba ondo' mangaikang masauk ra longgom muno; nabangkil ilo am mugar ra talikuron muno. Migulatur ilo am mangiou, ‘I Aki Kapuuno' totopot minunor ramuyun; Io no i Aki Kapuuno' rondo'-rondo' ayuk!

¹⁵Namayag i Aki Kapuuno' ra ulun ru Israil ioginio i Aki Kapuuno' ra nansibuni.

¹⁶Ngaangai' ulun ondo' nambaal ra sinungkalalaing ra sambaan tauyuon am asabin.

¹⁷Kaa' Israil bayagon ru TUHAN; pamayagan riso no mantilayun. Kalo tauyuon kau am asabin saboi ra sabuoi-buoi no.’ ”

¹⁸TUHAN noyo namangun ra limbowon, Io noyo i Aki Kapuuno'! Io noyo namangun am nambaal ra tana' ti, am tana' ti masauk ra mokotog. Kalo polosoon no intok raginio masiluk, kaa' intok raginio ayanin. Io noyo minindagu, “Aku noyo TUHAN, am kolondo' bokon.

¹⁹Kalo alion Ku ra Aku mindagu, kapoam opoton. Kalo susubon Ku ulun Kuno Israil maguyum Raki' ra kolondo' logo. Aku, TUHAN, mindagu ra motopot, am mambala' ra motopot.”

²⁰Mindagu TUHAN, “Timung kano am pababaya' kano matong, akau noyo naayag ra ralalom ru nasuangan bansa'! Sasambungon noyo ulun-ulun ondo' saguguluyur mugar magibit ra sinungkalalaing ondo' binaal intor ra tataun, am makiasi' ra dewa-dewa no ondo' kalo makapamayag no.

²¹Pabalaa' atan suang ru guang muno am niayuk inono'-inono' no, iou, polosoo' ilo mansunur. Osoi kia napatanou ra baal raginio am napabala' intor ra galing i? Sala' kia ka Aku, TUHAN? Kolondo' tuhan-tuhan ra bokon, ondo' ak am Aku. Aku noyo i Aki Kapuuno' ondo' matimpok am mamamayag, kolondo' noyo bokon ondo' ak am Aku!

²²“Akau ngaangai' namagun ru tana' ti, saguli' kano Raki' maa' raginio bayagon kau, sabap ra Aku ayuk i Aki Kapuuno', kolondo' bokon!

²³Bantu' Kuno motopot, am kalo masulang. Aku galama' mipapator ralalom ru inggalan Kuno: Moonong ulun migulatur ra saang Kuno, am ralalom ragu nilo sigagama' mambaal ra bantu' koson gumagaya' Raki'.

²⁴“Ulun-ulun mindagu, ‘Katimpakan am kaikangan intor ayuk ra TUHAN!’ Ngaangai ulun ondo' masisang Raki' matong ilo Raki' am tauyuon.

²⁵Kaa' papag ri Jakub bayagon, am mongompor ilo Raki', TUHAN.”