Read Timugon Murut JISAYA 46 Bible Online

JISAYA 46 - Timugon Murut bible

JISAYA 46

¹“Gitio noyo pupus ru dewa-dewa Babil; galing i sinungkalalaing Bel am Nibo sambaan, kaa' ragino pinakura' ra bakulung ru tambiag, masauk ra kapaganan ru tambiag ondo' kalo maligag.

²Sinungkalalaing no kalo makakau' mangindangan ra nangkayang riso, ilo galama' kinayang koson ra rinakop. Ginio noyo pupus nilono.

³“Rongogo' Aku no, akau papag ri Jakub, akau ngaangai' ondo' ulun Kuno ra naayag. Aku nagalung ramuyun intor poyo ra akau inanak.

⁴Aku magulayun i Aki Kapuuno' min saboi akau matutuo; am magulayun magalung ramuyun saboi akau makauan. Aku napasauk ramuyun am magulayun magalung ramuyun, indanganon am bayagon Takamin.

⁵“Osoi kia pogondoon min Raki'? Mokoondo' kia osoi mokogondo' Raki'?

⁶Ulun mapaingkual ra mas intor ra katia' nano, am manimbang ra pirok ra timbangan. Mampagaji' io sangulun manukang ra mas koson mambaal ra sinungkalalaing, am sambaan no sinungkalalaing binaal nano.

⁷Sinungkalalaing no pinakuan am pinauli ra intok no, minigor io ra giu' no, kalo makabanding. Amon ru makiasi' ulun riso, kalo tumaam io, am kalo makapamayag ra ulun intor ra kapaganan nano.

⁸Karaa' noyo baal ragitio, akau ulun makatula; karaa' noyo nansalinut ondo' binaal Kuno.

⁹Karaa' noyo kasaukan-kasaukan ra galing i; Iowo' noyo ra Aku i Aki Kapuuno', am kolondo' bokon, Aku i Aki Kapuuno' am kolondo' mokogondo' Raki'.

¹⁰Intor ra talimpuun pabalaan Ku baal ra orou matong, intor ra galing i maguang Ku atan kasaukan. Ragu Ku: Pamatasan Kuno maaru' masauk, kasagaan Kuno musiti' Ku baalon!

¹¹Piawon Ku sangulun mangunguasa' intor ra sirangon;[67] matong io koson ra sanginan susuit kanui koson mapaugar ra pamatasan Kuno. Atan paraguon Kuno musiti' Ku baalon, atan ondo' inatang Kuno musiti' Ku baalon.

¹²Rongogo' Aku no, akau ulun-ulun bambalingatan, indoson min kamanangan maalur poyo.

¹³Painggaaron Ku orou papalabusan, pamayagan ondo' pataakon Kuno kalo boo kulawon. Bayagon Ku Jirusalim, am manaak ra urumat ri Israil.”