Read Timugon Murut JISAYA 47 Bible Online

JISAYA 47 - Timugon Murut bible

JISAYA 47

¹Mindagu TUHAN, “Okou Babil, tuun intor ra turungan muno, am panturung noyo ra rasawat ru kaau, Okou kalo boo mantalur am makabunduk ra guang koson ra galing i.

²Kinsaro' noyo tapung no ra kinsaran batu; puaso' noyo rundung muno, kungkuno' tapi' muno saboi makito tonok muno am laupo' sungoi-sungoi![68]

³Ulun makakito ramuyun magibaang, asabin am tauyuon. Mansuli' Aku, am kolondo' sangulun pana polosoon Ku makalabus.”

⁴I Aki Kapuuno' ru Israil, i Aki Kapuuno' ondo' matulai, mapalabus ritakau, inggalan Nano TUHAN Ondo' Maayo Kaga' Kuasa'.

⁵TUHAN mindagu ra Babil, “Pongkoror, am subol no ra kalandaman! Kalo boo sasabiton kou ‘Ralaa mantalur ru ngaangai' bansa'.’

⁶Sumangit Aku ra ulun Kuno, kalo boo karaan Ku ilo koson ra ulun Kuno: Pataakon Ku ilo ralalom ru kuasa' muno, am kalo makaasi' kou risilo; ulun matutuo pana talalaingon min.

⁷Indoson muno mantilayun kou masauk ra ralaa mantalur, am kalo makatutun kapoam mangkara' ra pupus no.

⁸Rongogo' Aku no, okou ondo' masaga' mangilou ra katasuan! Indoson mu kaayagan muno moonsoi, am kolondo' koson rirun. Indoson mu kalo masauk kou ra mapuor, kapoam mailusan ra anak-anak muno.

⁹Kaa' sangkuliop ayuk, ralalom songorou, karuruo baal raginio masauk. Inda' pana mamakai kou ra guguno am kuasa' ru sihir muno, mailusan kou ra ralaki am anak-anak muno.

¹⁰Malimanan muno moonsoi ralalom ru kalaatan muno; indoson muno kolondo' sangulun pana makapandai. Kapintaran am kaintutunan muno mapalayau rirun. Indoson muno kolondo' mokogondo' rirun.

¹¹Kaa' malumpa' kou ru karaat, ilimu' ru sihir muno kalo mokopongompong. Patayan sangkuliop ayuk matong, patayan ondo' kalo maguang muno.

¹²Rayusi' noyo pakuan ra nansalinut sihir muno, ondo' pinakai mu intor poyo ra kinamuloko' muno. Magu' nansalinut sasampui muno makaindangan rirun, am mampakalalaa' ra pantula' muno.

¹³Kalo boo manguasa' kou kabalu' pana masuang pinson naapu muno. Polosoon noyo ulun mapandai mangilong mamayag rirun; migigila' ilo ra butitin-butitin, mangurio ra linsuk-linsuk ru limbowon ra moonong bulan, manala' ra atan[69] kasaukan muno ra tauli no.

¹⁴Ilo koson ra rami ondo' nakai' kosolob ru apui; kalo makapamayag ilo ra inan nilo galama'! Simbula' ru apui no malasu' kaga' limanin nilo, sala ka apui malasu' pandarangan.

¹⁵Ginio ayuk pakuan ra ulun mangingilong no ramuyun; intor poyo ra kinamuloko' muno makipinson kono riso. Ilo ngaangai' no magiru' am manatang rirun, Kolondo' sangulun pana namagun no koson mamayag rirun.”