Read Timugon Murut JISAYA 48 Bible Online

JISAYA 48 - Timugon Murut bible

JISAYA 48

¹Rongogo' noyo baal ragitio, akau ulun ru Israil, papag ri Jiuda, nampator kau ralalom inggalan ru TUHAN am mangiou sumamba ri Aki Kapuuno' ru Israil, kaa' ragu-ragu mino kalo motopot.

²Kaa' mangiou am maansukan kau ra akau namagun ra bandar ondo' mapasau, am akau sumingkayut ayuk ri Aki Kapuuno' ru Israil, ondo' sabiton ra TUHAN Ondo' Maayo Kaga' Kuasa'.

³Indagu TUHAN ra ulun ru Israil, “Intor poyo ra galing i Aku nambala' intor ra baal ondo' masauk, am pulaliin Ku mambaal raginio.

⁴Makapandai aku ra akau bambalingatan, mokotog guang am makaulu batu.

⁵Ginio ra intor ra galing i Aku minindagu intor ra orou matong mino, pabalaan Ku baal ondo' kalo poyo nasauk; maa' raginio kalo makaindagu kau ra baal raginio binaal ru sinungkalalaing sambaan mino.

⁶Nansalinut panalaan Kuno nasauk noyo ragino, musiti' no iowon min ra panalaan Kuno motopot. Ragino manala' Aku ra baal-baal nakabagu, inopot-inopot ra kalo poyo napandayan min.

⁷Ragino ayuk ra Aku mambaal raginio, kalo poyo igondo' Aku pokorongog ra baal raginio, maa' raginio kalo makaindagu kau ra nakapandai kano ra ngaangai' no.

⁸Makapandai Aku ra akau no kalo malansanan, nauligan kau ra maanggal-anggal. Ginio ra akau kalo makapandai no, am kalo sambangis pana ragu makasuku' ra talingo mino.

⁹Oroton Ku ayuk sangit Kuno, maa' raginio ulun mongompor ra inggalan Kuno. Oroton Ku ayuk sangit Kuno, maa' raginio kalo potoyon kau.

¹⁰Kininaman Takamin noyo ra apui kaimbalaan, koson ra pirok pinalunau ra apui.

¹¹Binaal Ku gitio koson kaatangan Kuno galama', kalo polosoon Ku inggalan Kuno jamalin, kapoam mantayar ra katulayan Kuno ra osoi-osoi ayuk.”

¹² TUHAN mindagu, “Rongogo' noyo, akau Israil, ulun ondo' piniau Kuno. Aku noyo i Aki Kapuuno', rondo'-rondo' ayuk i Aki Kapuuno', ondo' kasaa' am pamupusan!

¹³Kalindu' Kuno mapabanta' ra sonor ru tana', am mamingkal ra limbowon. Bulintok ra Aku manusub ra limbowon am tana' muma', karuruo no mataki' matong.

¹⁴Timung am rongog kano ngaangai'! Kolondo' rondo' pana dewa makapampaguang ra ulun pinili' Kuno mongoi pamulunsar ra Babil; bayaan no panusuban Kuno.

¹⁵Aku noyo minindagu am niayuk nampiau riso; maningganai Aku riso am manaak riso ra ampos.

¹⁶Ratong inggaar no Raki' am rongogo' ragu Kuno. Intor ra galing i kalo opoton ku ragu Kuno, am moonong ragu Kuno motopot.” Ragino TUHAN Raja' manusub raki' am manaak raki' ra kuasa' Nano.

¹⁷Ragu ri Aki Kapuuno' ru Israil, i Aki Kapuuno' ondo' matulai, TUHAN Mamamayag ramuyun, “Aku noyo TUHAN, i Aki Kapuuno' mino, mangila' Aku ra atan ondo' moonsoi ramuyun, maningganai Aku ramuyun ra ralan ondo' sotopot bayain min.

¹⁸Amon ru ilain min ukuman Kuno, makaapu kau ra barakat ondo' kalo maukat-ukat koson ra sungoi ra kalo igondo' kalasak. Kolondo' pupus ru ampos mino koson ra kinulun ru raat ondo' kalo igondo' longgo'.

¹⁹Papag mino masauk masuang koson ra agis am tutunon Ku maa' raginio kalo mapuso ilo.”

²⁰Ingkual noyo am pagiru' intor ra Babil! Pabalaa' noyo tanou raginio ralalom guang maantak. Pabalaa' noyo tanou raginio ra ati-ati ayuk, “TUHAN namayag ra Israil, ulipon Nano!”

²¹Bulintok ra TUHAN maningganai ra ulun Nano mugar ra tana' kaagisan, kalo paason ilo. Paingkualon No timug intor ra bulur batu no risilo; lapakon No bulur batu, am timug pana tumampusis.

²²“Ulun makatula kalo mabayag,” ginio noyo ragu ru TUHAN.