Read Timugon Murut JISAYA 5 Bible Online

JISAYA 5 - Timugon Murut bible

JISAYA 5

¹Rongogo' noyo rimbai kutu, tunung koson ra rangan kuno am umo ru anggur nano: Rangan kuno mokoondo' sampila' umo ru anggur giu' ra bulur ondo' malabung.

²Manangkul io ra tana' nano am mamatir ra batu-batu nano; mantanom io ra anggur napili', am nambaal io ra manara pantamungan. Mangkali io ra rondo' luang koson pamagaan ra kawa' ru anggur nano. Io pana mantamung saboi kawa' ru anggur maansak, kaa' moonong kawa' no mataris.

³Ginio ra rangan kuno minindagu, “Alii ra namagun ra Jirusalim am Jiuda, akimi' min aku no am umo ru anggur kuno.

⁴Mokoondo' poyo kia baalon kuno, kaa' kalo poyo nabaal ku ra umo ru anggur kuno? Kua kia kataris kawa' ru anggur no, am sala' ka kawa' ra moonsoi koson ra kalansanan kuno?

⁵Gitio noyo baalon kuno ra umo ru anggur kuno: bubulon ku insor ra liput nano, am mamalunsai ra timbok nakasindung riso, am mopoloso ra bibiag masigo mongkotop riso am manginginjang riso.

⁶Polosoon ku tuwin io ru alab. Puun ru anggur kalo boo indaanin ku kapoam intawangin ku. Kaa' polosoon ku malungkutan ru kusingan. Ompolon ku poyo gaun maa' raginio kalo mamparatu' io ra rasam.”

⁷Israil no umo ru anggur ru TUHAN Ondo' Maayo Kaga' Kuasa'; ulun ru Jiuda no puun ru anggur ondo' tinanom Nano. Malansan Io risilo mambaal ra moonsoi, kaa' baalon nilono mampatoi. Malansan Io risilo mambaal ra motopot, kaa' ondo' maining no bolos ru ilo ondo' makitaak ra katimpakan.

⁸Aibui boo ramuyun! Nambali kau ra baloi am umo koson mamparuang ra longgom mino. Kalo boo mabuoi makayaan noyo ulun ra bokon ra intok. Akau ayuk mayan ra pagun raginio.

⁹Makaining aku ra TUHAN Ondo' Maayo Kaga' Kuasa' mindagu, “Ngaangai' baloi ondo' maayo am moonsoi ti kalo ayanin am kolondo' mangayan.

¹⁰Puun-puun ru anggur ondo' timinuu' ra tana' ondo' kinapila' no mopor ngahektar, ampos no balu' ngalito wain ayuk. Maatus am balu' ngoopor ngalito sampug, ampos nano mopor am balu' ngalito gandum ayuk.”

¹¹Aibui boo ramuyun! Kakakarat min ayuk poyo am manginum kano ra inumon makagauk. Magauk kau boo saboi ra tanga' ru rondom.

¹²Ralalom nasuangan pangiantakan mangkuli kau ra jitor, gambus, tamburing, am tulali, am niayuk manginum ra wain, kaa' kalo mapandayan min atan tatanga' baalon ru TUHAN raino ti.

¹³Patirin kau koson ra ulun rinakop. Ngaangai' tingganai matoi maitilan am mamagun matoi pinaason.

¹⁴Kabang ru intok kapatayan gumaal toojo koson monolon ra ulun paawang giu' ra Jirusalim mababaya' ra nasuangan ulun ondo' mangiantak.

¹⁵Moonong ulun tauyuon, am ngaangai' ulun malilimbau paingganaan.

¹⁶Ginio noyo ra TUHAN Ondo' Maayo' Kaga Kuasa' mampakito ra katulayan Nano koson mambaal ra atan ondo' motopot, am niayuk mapatalang ra katulayan Nano koson mangakim ra ulun Nano.

¹⁷Nakaayantanga' ra napuutan ru bandar, anak ru domba mongkotop ra sakot am anak ru kambing mokoowot ra limayak ondo' makasakot malabung.

¹⁸Aibui boo ramuyun! Kalo masaga' kau manatang ra tula.

¹⁹Mindagu kau, “Ilai' takau atan baalon ru TUHAN. Polosoon Io mataki' mambaal ra atan rinagu Nano. Polosoon noyo i Aki Kapuuno' ru Israil, i Aki kapuuno' ondo' matulai mapaugar ra inatang Nano.”

²⁰Aibui boo ramuyun! Pantalikaron min ondo' moonsoi am niayuk ondo' malaat, ondo' molondom am niayuk ondo' matawang, am niayuk ondo' mapait am ondo' matamis.

²¹Aibui boo ramuyun! Pangkaraan min, mapintar kau am mapandai toojo!

²²Aibui boo ramuyun, akau mainum-inum. Kalo namimii' pintar mino ra akau mamparatok ra inumon mapait!

²³Kaa' bulintok ra akau aniin ra rasua kabalu' pana sanganu ayuk, makatampos kano mapalabus ra ulun makasala, am niayuk mongompong ra ulun ondo' kolondo' sala mangapu ra katimpakan.

²⁴Ginio ra ati koson ra rami am sakot mapua' maluoi mosolob, ginio niayuk ra bakat mino mapasa' am bunga' mino lumonot, am masiob ru angin, sabap ra pangilaan ru TUHAN Ondo' Maayo Kaga' Kuasa', i Aki Kapuuno' ru Israil, i Aki Kapuuno' ondo' matulai, inimpayan min.

²⁵Sumangit TUHAN ra ulun Nano. Masaga' Io mangukum risilo. Gunung mangauyog am baangkai sakabantai' ra tatanga' ru ralan koson ra ginsamol. Kaa' sangit ru TUHAN kolondo' poyo pupus. Rayusin No mangukum ra ulun Nano.

²⁶Ilai' TUHAN manaak ra pulanu ra bansa' ondo' maalur.[7] Sisiukon No mampiau risilo intor ra pompor ru tana' ti am mataki' ilo matong!

²⁷Kolondo' sangulun pana maagui am makasaru. Kalo igondo' ilo matikoolong kapoam mombolong. Masalok ilo tumampos koson mangayou.

²⁸Anak ru panah nilono malarom am tanggayan ru panah makatampos palaguron. Salindu ru kuda nilono mokotog koson ra batu ru apui, am luda' ru kurita' kuda nilono musing koson ra bagiu' mapuor.

²⁹Ngaangai' saujor nilono sumingangal koson ra singa' mansaam am mantangag ra akanon nano masimbul maa' raginio kolondo' osoi-osoi mampagaau ra akanon no.

³⁰Paat ra orou raginio, titikop ru Israil maining bolos ra mangayou koson ra nginoos mapuor ru raat. Ilai' nga, titikop ru pagun no molondom am kumuliasou-asou. Sinda masauk ra molondom.