Read Timugon Murut JISAYA 51 Bible Online

JISAYA 51 - Timugon Murut bible

JISAYA 51

¹TUHAN mindagu, “Rongogo' Aku no, akau ondo' masaga' bayagon am ratong kano Raki' makiindangan. Karaan noyo gunung batu intor min natulisan, am pangkalian ra batu intor min nakali.

²Karaa' noyo kinamatuaan min, i Abragam am i Sara ondo' naganak ramuyun. Paat ra Aku nampiau ri Abragam, kolondo' anak nano, nambarakat Aku riso am nangani' riso ra papag ondo' masuang kaga'.

³“Jirusalim, bansukon Tokou, am ngaangai' ondo' minayan ra napuutan Muno. Padang-padang muno ra mapua' saukon Ku ra taman, koson ra Idin, taman Kuno ra malabung. Giu' no ulun maantak am maansukan, am maringkuanang ra marimbai-rimbai.

⁴“Rongogo' noyo bolos Kuno, akau bansa' Kuno, Rongogo' noyo ragu-ragu Kuno, akau ulun Kuno. Mangila' Aku ra bansa'-bansa', ngaangai' ukum Kuno manaak risilo ra sinda.

⁵Pamayagan ondo' pataakon Kuno mamaar noyo, bulintok ra Aku mamanang mamaar noyo rumatong. Aku galama' mamarinta ra bansa'-bansa'. Pagun-pagun ondo' maalur magiginaa Raki' am malansan ra baalon Kuno ondo' makaimuag.

⁶Tingaano' noyo limbowon am indukui' noyo tana'; limbowon lumiot koson ra lisun am tana' maapu' koson ra bayang lairon, ngaangai' namagun no matoi koson ra namuk. Kaa' pamayagan ra pinataak Kuno mantilayun ra sabuoi-buoi no, am namanangan Kuno marayus-rayus.

⁷“Rongogo' Aku, akau bansa' Kuno, makapandai kau ra atan motopot, pangilaan Kuno nakauli ra ralalom ru guang mino. Pai' kalaa' amon asabin kau ru ulun, pai' pagalabo amon magasab ilo ramuyun.

⁸Mapuso ilo am matatak, koson ra konoon inakan ru kilau am konoon bulu kambing inakan ru anai. Kaa' pamayagan ra pinataak Kuno mantilayun ra sabuoi-buoi no, namanangan Kuno saboi ra papag am papag.”

⁹Luat noyo TUHAN, indangano' akai, bayago' akaino ra kuasa' Muno. Luat noyo koson ra galing i bulintok ra Okou nanutuk ra Ragab,[72] am nonobok ra tambuakal ru raat no saboi minatoi.

¹⁰Okou niayuk nampalasak ra raat, timug ru raat ondo' malandom. Binaal Mu ralan giu' ra tatanga' ru timug no, maa' raginio ulun-ulun bayagon makasandaup.

¹¹Ulun-ulun ondo' pinalabus ru TUHAN pana makauli' sumubol ilo ra Jirusalim ralalom guang maantak liliwa' marimbai. Matakau bulos nilo sabap maansukan sabuoi-buoi no, sabuoi-buoi no ilo nakalabus intor ra kapaganan am mangiluk guang.

¹²Mindagu TUHAN, “Aku noyo ondo' napabansuk ramuyun. Kua kalaa' kau ra ulun ondo' mapandai matoi, am ulun ondo' pinatiran koson ra sakot?

¹³Makalilian kau kia ra TUHAN Namangun ramuyun ondo' namingkal ra limbowon am napabanta' lonor ru tana'? Kua monsongorou kau malaa' ra gabu' ru ulun mangimbolo' ramuyun ondo' nakatampos mamuso? Sotopot no, gabu' nilono kalo makasaboi ramuyun.

¹⁴Nasuangan ulun rinakop palabuson mataki'; kalo maawayan ilo ra akanon, am kalo matoi am lobongon.

¹⁵Sabap ra Aku noyo TUHAN, i Aki Kapuuno' mino, ondo' nanguyau ra raat saboi kinulun nano makanginoos. TUHAN Ondo' Maayo Kaga' Kuasa' iono inggalan Kuno.

¹⁶Aku noyo namingkal[73] ra limbowon am napabanta' ra lonor ru tana'. Mindagu aku ra Sion, ‘Akau noyo ulun Kuno; pataakon Ku pangilaan Kuno ramuyun am mangampin ramuyun ra kuasa' Kuno.’ ”

¹⁷Luat noyo, okou Jirusalim, luat noyo! Ukuman ondo' pinatasan ru TUHAN sabap ra sangit Nano nailian mu noyo saboi nalupus.

¹⁸Intor ra namagun muno kolondo' maningganai rirun, intor ra minayan rirun kolondo' mangitang rirun.

¹⁹Nalumpa' kou ru ruo karaat; kinibit ru pangayawan pagun muno natutuk am napuso am ulun muno matoi ra naitilan. Kolondo' makaasi' am mapabansuk rirun.

²⁰Moonong pompor ru ralan ulun-ulun muno maratu' kolondo' lulu' koson ra tambang nakasulung ra jajaling. Nalumpa' ilo ra sangit ru TUHAN, am matiu' ra sangit ri Aki Kapuuno' Muno.

²¹Rongogo' noyo akau ulun-ulun ondo' inimbolo', ondo' kasiling-kasiling koson ra ulun nagauk!

²²Gitio noyo ragu ru TUHAN mino, TUHAN i Aki Kapuuno' noyo sumaung ramuyun, “Kaimbalaan ondo' pinataak Kuno ralalom sangit Kuno, alapon Ku sagulio' intor ramuyun. Guang kuno sumalui, am kalo pana boo saanin min.

²³Kaimbalaan no pataakon Ku ra ulun ondo' mangimbolo' ramuyun, ondo' nanusub ramuyun lumuya' ra tana' am nanginjang-nginjang ramuyun, koson ayuk ra ralan ondo' bayain ru ulun.”