Read Timugon Murut JISAYA 53 Bible Online

JISAYA 53 - Timugon Murut bible

JISAYA 53

¹Timinaam bansa' raginio, “Osoi kia mangintopot ra atan ondo' norongog mai? Osoi kia papasabayan ra kuasa' ru TUHAN?

²Kasaga' ru TUHAN ulipon Nano gumayo koson ra samul ondo' tumuu' giu' ra tana' mapua'. Kolondo' makaantak paat ra ilain; kolondo' makabunduk koson ra kasagain.

³Asabin am minggalur takau riso, ulun ondo' nototop ra imbolo' am maubas magiba' ra karualan. Kolondo' sangulun pana masaga' magilong riso, am kalo lioon takau io.

⁴Sotopot no maruol takano ibain nano, kapaganan takano mangkinibit ra io maimbolo', indoson takau kaimbalaan nano ukuman ri Aki Kapuuno' riso.

⁵Kaa' pinilatan io sabap ra tula-tula takau, am sinindualan sabap ra kalaatan takau. Inukuman io maa' raginio itakau bayagon, sabap ra ulitomo' nano nababas takau.

⁶Itakau ngaangai' nakalayau koson ra domba, sigagama' ayuk ra ugar, am pinalumpa' ru TUHAN riso ngaangai' kalaatan takano.

⁷ Malaat kaga' pinamakuan riso, kaa' inorot no ayuk. Kalo sambangis pana ragu nano koson ra anak ru domba inibit ra panimbaluyan kapoam indung ru domba sinukur bulu nano.

⁸Rinakop io am inakim, am binuntayang am inukuman ra matoi. Kolondo' mampalio riso; io minatoi sabap ra tula ru bansa' takau.

⁹Linobong io pinabaya' ra ulun malaat; Lobong nano nakaunor ra ulun langkaya', kabalu' pana kalo igondo' io pambaal ra kalaatan, am kalo igondo' pamparuung.”

¹⁰Mindagu TUHAN, “Kaimbalaan nano topot sumugut ra kasagaan Kuno; am pasubakon no painawo nano koson taak simbalui ra pangampun ra tula. Ginio ra io maawar umur; makakito io ra papag nano, am ralalom riso gogoton Kuno nasugut.

¹¹Mopongo maimbolo', maansukan io saguli'; makapandai io ra kaimbalaan nano mokoonong toojo. Ulipon Kuno, ondo' gumagaya' am ondo' iowon Kuno, Magiba' ra ukuman ru ulun masuang; am sabap io, Aku mangampun risilo.

¹²Ginio ra aniin Ku io ra intok ondo' matulai, intok no giu' ra gino ngai' ru ulun antung am ulun makapangkat. Nampataak io ra painawo nano, am kinara' io koson ra ulun malaat. Nansaan io ra tula ru ulun masuang, am makiasi' maa' raginio tula nilo ampunon.[76]