Read Timugon Murut JISAYA 54 Bible Online

JISAYA 54 - Timugon Murut bible

JISAYA 54

¹Jirusalim, galing i okou koson ra ruandu' tabanang ondo' kalo igondo' maganak. Kaa' ragino pagilakup no, am parimbai no maansukan! Sabap ra anak-anak muno masuang kaga', nakasail poyo intor ra anak ru ruandu' ondo' kalo tinatang ru ralaki.

²Kalangkaa' min kim-kim; kaawaro' min tali no am popoko' min paparukugan no!

³Rumuang langka' muno mongoi ra pamiris am kait, namagun muno mayan ra tana' ru bansa'-bansa' am mayan ra bandar-bandar ondo' ragino ti masiluk kaga'.

⁴Pai' kalaa', kalo tauyuon kou; kalo asabin am maringkauyu'. Lilianin mu kalo gagayaan muli bulintok ra kinamuloko' muli; am kalo makakara' ra kasilukan muno koson sangulun napuor.

⁵Namangun rirun no koson ra ralaki muno, i Aki Kapuuno' matulai ru Israil ioginio mamamayag rirun. TUHAN Ondo' Maayo Kaga' Kuasa', ginio noyo inggalan Nano, Io Aki Kapuuno' mangunguasa' ra titikop ru tana' ti.

⁶Israil, okou koson ra sangulun andu' mamulok ondo' mangiluk guang sabap ra tinatang ru ralaki nano. Kaa' i Aki Kapuuno' mampiau rirun saguli' am mindagu,

⁷“Sangkinolor ayuk buoi Aku nanatang rirun; ralalom ru togom maayo okou alapon Ku saguli'.

⁸Sangkinolor ayuk Aku timinalikur rirun sabap ra sangit Kuno ra lumuab-luab. Kaa' ralalom ru togom makaasi' Aku rirun.” Gini noyo ragu ri Aki Kapuuno' Mamamayag rirun.

⁹“Koson ra bulintok ri Nuu Aku nambantu' tana' ti kolondo' boo rosob, koon niayuk ragino ti Aku mambantu' ra kalo boo sumangit Aku am mangilalaa' ramuyun.

¹⁰Kabalu' pana gunung-gunung am bulur-bulur mauyog, kalo langgain Ku monogom rirun. Nabantuan pababansayan Kuno masalok Ku guuton,” kon ru TUHAN ondo' monogom rirun.

¹¹Mindagu TUHAN, “Okou Jirusalim, bandar ondo' majamaran, kolondo' lulu' muno am kolondo' mangansuk. Lonor-lonor muno pabantaan Ku saguli', ra batu-batu mokologo.

¹²Manara-manara baalon Ku intor ra batu dalima', kulobon-kulobon garabang muno intor ra batu intan, timbok-timbok muno intor ra ratna mutu manikam.

¹³“Ngaangai' ulun muno masauk ra maamaya' Raki', lumangkaya' ilo.

¹⁴Pinotolorog kou intor ra katimpakan, pinainggalur intor ra kajamaran am pangimpayan.

¹⁵Paat ra okou bulunsaron, sala' ka Aku nanusub, osoi ayuk mamulunsar rirun maratu' io.

¹⁶“Aku noyo namangun ra ulun manukang ra basi' ondo' manampui ra apui koson manitip ra kinandoi. Aku noyo napasauk ra saujor ondo' mampaguut ra kinandoi mangayou no koson mampatoi.

¹⁷Kaa' moonong kinandoi mangayou ondo' tinitip koson gumula' rirun, kalo masauk. Ra am moonong panguwan ralalom pangakiman mampainono' kou ra kalo motopot. Pataakon Ku kamanangan koson tangguang ra ulipon-ulipon Kuno.” Ginio noyo ragu ru TUHAN.