Read Timugon Murut JISAYA 59 Bible Online

JISAYA 59 - Timugon Murut bible

JISAYA 59

¹Pai' karaa' ra TUHAN no malawo kaga' koson mamayag ramuyun, kapoam barat kaga' koson mangkirongog ra pampiawan mino.

²Sabap ra kalaatan mino ra Io pana kalo mangkirongog bulintok ra akau makiasi' Riso. Tula-tula mino napatuliar ramuyun intor ri Aki Kapuuno'.

³Nakasala kau sabap ra magabau am sumaindang, malaat am mamatoi.

⁴Minongoi kau pantagi' ra makama kabalu' pana kolondo' sasaban am pinatasan ra kalo matimpok. Magabau kau am ingain min ondo' kolondo' onong; mampaguang kau koson mampajamar ra ulun bokon am mambaal ra kalaatan.

⁵Inatangan min ondo' malaat magibit ra kapatayan koson ra talu' ru kukuo mabisa'. Amon talu' no babakon, mingkual noyo kukuo no. Guangon raginio kolondo' noyo toojo onong no ramuyun, koson ra konoon binaal intor ra tambaloi ru lawa'!

⁷Rayusin min mangatang ra malaat, am intakiin min mambaal. Kalo pansagulian guang mampatoi kau ra ulun ondo' kolondo' sala. Ati ayuk sukuan min, mapatatang kau ra napuutan am kapusaan.

⁸Kalo mompogogot kau ra pababansayan, am ngaangai' binaal mino kalo matimpok. Ralan mino mampipitol, am ulun maya' ra ralan raginio kolondo' kaansukan.

⁹Mindagu bansa' raginio ri Aki Kapuuno', “Ragino nakapandai akai kua Okou kalo namayag ramon intor ra ulun-ulun ondo' mangimbolo' ramon. Maginaa akai ra matawang, kaa' kalandaman ayuk mokoondo'.

¹⁰Akai sakangkam-kangkam koson ra ulun bolou; ra bulintok mampayung orou makasaru akai koson ra mampayung rondom; ra tatanga' ru ulun naayag akai koson ayuk ra ulun minatoi.

¹¹Malaa' akai am mangiluk guang; maguyum akai ra katimpakan, kaa' kolondo'; lumansan akai ra pamayagan, kaa' banangan ayuk.

¹²Masuang kaga' kalaatan mai Rirun; tula-tula mai manguu' ramon. Topot-topot mai malimanan kalaatan mai, am makapandai ra tula-tula mai.

¹³Lumungkang akai am gumuor ra TUHAN, am kalo masaga' maya' ri Aki Kapuuno' mai. Nangimbolo' akai ra ulun bokon am liminayau; pangkaraan mai nakalayau, am ragu-ragu mai abau ayuk.

¹⁴Ukum ra matimpok pinatiran, am katimpakan pinainggalur. Kabanisan ru guang kalo lioon ra intok nasuangan, kaansayan paingkiingon.

¹⁵Kolondo' boo ulun mabanis guang, saboi osoi minggalur ra kalaatan, io galama' masauk ra mausung ru kalaatan.” TUHAN nakakito ra ngaangai' no, am kalo moonsoi gigilong Nano sabap kolondo' boo katimpakan.

¹⁶Mangimuag Io sabap ra kolondo' ulun rumatong am kolondo' ulun manungka'. Ginio ra mamakai Io ra kuasa' Nano galama' koson mamayag am mapamanang risilo.

¹⁷Katimpakan pakayon Nano koson ra bayang basi' am pamayagan koson ra tupi' basi'. Gogoton Nano koson manapuli' ra baal raginio am balasin kalo katimpakan.

¹⁸Ukumin Nano pantula' Nano sumugut ra binaal nilo, makaaya' niayuk ulun ondo' minayan ra pagun-pagun maalur.

¹⁹Intor ra sirangon suku' ra kalasaan, moonong ulun malaa' ra katulayan am kuasa' Nano. Matong Io koson ra timug ru sungoi ondo' maaug am koson ra bagiu'.

²⁰Kon ru TUHAN ra ulun Nano, “Matong Aku ra Jirusalim koson manungka' am mamayag ra ngaangai' ulun ondo' timinalikur ra tula.

²¹Mambaal Aku ra nabantuan ramuyun: Aniin Takamin ra kuasa' Kuno am pangilaan Kuno ra sabuoi-buoi no. Ilaa' noyo anak-anak mino maa' raginio ilo pana makapangila' raginio saboi papag ka pagag ragino am saboi ra sabuoi-buoi no.”