Read Timugon Murut JISAYA 60 Bible Online

JISAYA 60 - Timugon Murut bible

JISAYA 60

¹Tirong no, am kasauk no ra sinda, okou Jirusalim, sabap ra sinda pamayagan muno minatong noyo; I Aki Kapuuno' nanaak rirun ra sinda intor ra katulayan Nano.

²Tana' ti natikop ra kalandaman, bansa'-bansa' tinauban ra kalandaman; kaa' sinda ru TUHAN sumila' ra rasawat muno, sinda rinatangan Muno masauk motopot ra rasawat muno.

³Bansa'-bansa' ra bokon matong saguguluyur ra sinda muno, raja'-raja' nabunduk ru sinda siminila' koson rirun.

⁴Ilai' noyo atan masauk ra libung muno; ulun muno timinimung koson muli' rirun. Anak ungkuyon muno minuli' intor ra pagun maalur, am anak ruandu' muno kinubibil.

⁵Makito mu baal raginio am bulos muno maamis ra ilain; maansukan kaga' guang muno am maayo guang. Rapu' ru bansa'-bansa' poropogon rirun, kinalangkayaan intor ra sandaup ru raat tumuluk rirun.

⁶Kafilah-kafilah matong intor ra Midian am Ipa. Matong ilo intor ra Syiba am magibit ilo ra mas am kaminyan. Potonowon nilo baal ra moonsoi ondo' binaal ru TUHAN!

⁷Sampanon ru domba intor ra Kidar am domba gawayan intor ra Nibayot ibiton rirun koson ra taak simbalui, am pataakon ra rasawat ru altar koson mapabansuk ra guang ru TUHAN. Saukon ru TUHAN Baloi Nano ra matulai poyo kaga'.

⁸Atan kia mansiab koson ra gaun, koson ra susuit asang ondo' mansiab muli'?

⁹Ginio noyo kapal-kapal ondo' magibit muli' ulun ri Aki Kapuuno' intor ra pagun-pagun maalur. Pirok am mas inibit nilo koson mapatulai ra inggalan ru TUHAN, i Aki Kapuuno' min, i Aki Kapuuno' ru Israil, i Aki Kapuuno' ondo' matulai ondo' nangkinibit ra bansa'-bansa' mangurumat ra ulun Nano.

¹⁰Mindagu TUHAN ra Jirusalim, “Ulun bansa' ra suai mambaal saguli' ra timbok muno, am raja'-raja' nilono magayam rirun. Ragili nangukum Aku rirun ralalom ru sangit Kuno, kaa' ragino Aku masaga' makaasi' rirun.

¹¹Orou rondom kulobon-kulobon ru garabang muno maukaban, maa' raginio raja'-raja' ru bansa' suai ondo' rinakop magibit ra okou lumangkaya'.

¹²Kaa' bansa'-bansa' ondo' kalo gumagaya' rirun iono pusoon lingono'.

¹³Tataun sipris, tataun juniper, am tataun pain, tataun ra moonsoi kaga' intor ra kataunan Libanon, ibiton koson manirong rirun, okou Jirusalim, koson mangindon ra Baloi Kuno am mapatulai ra bandar Kuno.

¹⁴Anak-anak ru ulun nangimbolo' rirun matong migulatur koson mangurumat rirun. Ngaangai' ulun ondo' nakaili' nagasab rirun matong migulatur ra kalayam muno. Manabit ilo rirun ra ‘Bandar ru TUHAN’, ‘Sion, Bandar ri Aki Kapuuno' ru Israil, i Aki Kapuuno' ondo' matulai’.

¹⁵Okou kalo tatangon am kalo boo kasisangin, am kalo polosoon koson ra bandar ondo' nokoloso am masiluk. Saukon Tokou ra urumaton am maantak, intok kaansukan ra sabuoi-buoi no.

¹⁶Bansa'-bansa' am raja'-raja' magalung rirun, koson ra sangulun ina' magalung ra anak nano. Makapandai kou ra Aku, TUHAN, Mamamayag rirun, am ra i Aki Kapuuno' ru Israil, i Aki Kapuuno' Ondo' Maayo Kaga' Kuasa', Mamumuli' rirun.

¹⁷Ibitin Tokou ra mas koson suali ru gangsa', pirok koson suali ru basi', gangsa' koson suali ru tataun, am basi' koson suali ru batu. Ilo mangunguasa' muno kalo boo mangimbolo' rirun; mangkinibit Aku risilo mamarinta ra matimpok am kalinuos ayuk.

¹⁸Kalaatan kalo boo maining, pagun muno kalo boo makaliman ra kapusaan. Koson ra timbok, manindung Aku am manungka' rirun; omporon mu Aku sabap ra Aku mamamayag rirun.

¹⁹Mato ru orou kalo boo suminda rirun bulintok matawang, bulan kalo boo suminda rirun bulintok molondom, Aku, TUHAN, suminda rirun ra mantilayun; tampulawon Tokou ra katulayan Kuno.

²⁰Bulintok ru kapaganan muno maampus. Aku, TUHAN, masauk ra sinda muno ra mantilayun, mantilayun poyo intor ra mato ru orou am bulan.

²¹Mamagun muno mambaal ra baal ondo' motopot, am momolonggom ra pagun ti ra sabuoi-buoi no. Ilo koson ra tutuu' ondo' tinanom Kuno, ampos ru inangun Kuno, koson mapaintalang ra kuasa' maayo Kuno.

²²Io pana pongkotob mino ra kalo masuang am asasabin masauk ra bansa' maikang. Bulintok raginio ra tauli no, Aku, TUHAN, mambaal raginio ra mataki'.”