Read Timugon Murut JISAYA 61 Bible Online

JISAYA 61 - Timugon Murut bible

JISAYA 61

¹ Kuasa'[79] ru TUHAN Ondo' Masawat Kaga' soroi raki'; Io nampili' raki' am nanusub raki' koson mapatanou ra tanou moonsoi ra ulun musikin, koson mapatapuli' ra ulun natutuk guang, koson mapatanou ra ulun rinakop ra ilo palabuson mataki', am ra ulun-ulun ralalom ru pangaputan ra paingkualon ilo.

²Sinusub No aku koson mapatanou ra mamaar noyo bulintok ru TUHAN mamayag; koson mangansuk ra ngaangai' ondo' mangiluk guang, am mambalos ra pantula'-pantula' nilono;

³koson mapabansuk ra ulun ondo' mangulir giu' ra Sion, maansayan am niayuk maansukan, sala' ka pangilukan, rimbai pangamparan, sala' ka pangilukan. Masauk ilo koson ra puun ondo' tinanom galama' ru TUHAN. Mambaal ilo ra atan ondo' motopot, am i Aki Kapuuno' omporon sabap binaal Nano.

⁴Baalon nilo saguli' bandar-bandar ondo' nakalair noyo napuut, am mapabigor ra intok-intok ondo' nakalair noyo masiluk.

⁵Akau ulun Kuno, ulun bansa' suai mangandoi ramuyun. Ilo magalung ra bibiag mino am mangandoi ra tana' am umo ru anggur mino.

⁶Piawon kau koson ra imam-imam ru TUHAN, koson ra ulipon ri Aki Kapuuno' takau. Makasia' kau ra kinalangkayaan ru bansa'-bansa', am mamanggo makaalap ra kinalangkayaan no.

⁷Kalo boo tauyuon am asabin kau. Mayan kau ra pagun min galama', kinalangkayaan mino masauk induo ruang; bansuk mino mantilayun ra sabuoi-buoi no.

⁸Mindagu TUHAN, “Motogom Aku ra katimpakan, am masisang Aku ra pangimbalaan am kalaatan. Ralalom ru gagaya' manaak Aku ra tangguang ra ulun Kuno; mambaal Aku ra nabantuan ondo' mantilayun risilo.

⁹Papag nilono mauligan kaga' ra ati ayuk intok, anggagakon ra ginio ngai' ru bansa'; moonong ulun ra makakito makapandai ilo ra ilo noyo bansa' ondo' binarakat Kuno.”

¹⁰Jirusalim maansukan sabap ra baal ondo' binaal ru TUHAN. Baal ru Jirusalim koson ra sangulun uoton ondo' nalimpor ra kuliamos makaantak. Ginio niayuk ri Aki Kapuuno' mapapakai ra pamayagan am kamanangan ra Jirusalim.

¹¹Koson ra unor pinatias tumuu' am sumawat, ginio niayuk ra TUHAN Raja' mamayag ra ulun Nano, am ngaangai' bansa' mongompor riso.