Read Timugon Murut JISAYA 62 Bible Online

JISAYA 62 - Timugon Murut bible

JISAYA 62

¹Sabap ra Jirusalim mindagu aku; kalo mongkoror aku saboi ra Jirusalim bayagon, am kamanangan no makatampulau koson ra pilasut bulintok molondom.

²Okou Jirusalim, bansa'-bansa' magilong ra kamanangan muno, raja'-raja' magilong ra kaantakan muno! Sabiton kou ra inggalan bagu, inggalan ondo' tinaakan galama' ru TUHAN.

³Masauk kou koson ra karaun makaantak ra kalindu' ru TUHAN, karaun ru pamarintaan ra kalindu' ri Aki Kapuuno' muno.

⁴Kalo boo sabiton kou “Ondo' Tinatang”, pagun muno kalo boo sabiton “Ondo' Masilukan”. Kaa' sabiton kou “Ondo' Tagamin ri Aki Kapuuno'”, pagun muno sabiton “Ondo' Nakapaguot” sabap ra TUHAN maansayan rirun, am masauk koson ra ralaki ru pagun muno.

⁵Koson ra buayoi maguot ra sangulun ralaa, ginio niayuk ri Namangun rirun maguot rirun. Koson ra ungkuyon maguot maansukan magilong ra ruandu' uoton, ginio niayuk ri Aki Kapuuno' muno maansukan rirun.

⁶Giu' ra timbok muno, okou Jirusalim, paayanon Ku mantatamung; orou rondom kalo mokopongkoror ilo, kaa' musiti' ilo mapakara' ra TUHAN intor ra bantu' Nali, maa' raginio kalo malilianan No.

⁷Musiti' ilo marayus mapakara' Riso, saboi Io mapatapuli' ra Jirusalim, am saukon ginio ra bandar ondo' sasabiton ra titikop ra tana' ti.

⁸TUHAN nambantu' am nampator, am suguton ginio maya' ra kuasa' Nano. “Gandum mino kalo boo akanon ru pantula' mino, am wain binaal min intor ra kapaganan mino, kalo boo inumon ru ulun bansa' suai.

⁹Kaa' akau ondo' napatias am nangkumos ra gandum makasia' ra ampos nano am mongompor ra TUHAN. Akau nangupu' ra kawa' ru anggur makasia' ra wain giu' ra liliut ru Baloi Kuno.”

¹⁰Akau namagun ru Jirusalim, ingkual no intor ra bandar, am pambaal ra ralan ondo' bayaan ru ulun mino ondo' minuli' intor ra pamatiran. Baalo' noyo santaun sangkul; patiri' noyo batu-batu! Pabigoro' noyo bandira' maa' raginio bansa'-bansa' makapandai

¹¹ra TUHAN mapabala' ra baal raginio ra titikop ru tana' ti, “Balai' noyo namagun ru Jirusalim, TUHAN matong koson mamayag ramuyun. Ulun ondo' binayag Nano inibit No mababaya' Riso.”

¹²Piawon kau ra “Ulun Ondo' Matulai”, “Ulun Ondo' Binayag ru TUHAN”. Jirusalim sabiton ra “Bandar Ondo' Tinagaman ri Aki Kapuuno'”, “Bandar Ondo' Kalo Iniruanan ri Aki Kapuuno'”.