Read Timugon Murut JISAYA 64 Bible Online

JISAYA 64 - Timugon Murut bible

JISAYA 64

¹Rilako' noyo limbowon am tuun no, iou TUHAN! Gunung magilong Rirun, am gunung mauyog sabap ra malaa'.

²Gunung no monontol koson ra timug rumiri' ondo' pinarakan ra rasawat ru apui. Ibok noyo patalango' noyo kuasa' Muno ra pantula'-pantula' Muno, am sauko' noyo bansa'-bansa' monontol ra saang Muno.

³Nambaal Kou ra baal ondo' makalalaa', ondo' kalo maguang mai. Timinuun Kou, am gunung-gunung mauyog sabap ra malaa'.

⁴Kalo igondo' osoi-osoi pana makakito kapoam mangkirongog ra suai intor Rirun, mokoondo' i aki kapuuno' ondo' mambaal ra baal koson raginio ra ulun lumansan riso.

⁵Apuon Mu ulun mabanis guang, ondo' maayag sumugut ra kasagaan Muno. Sumangit Kou ramon, kaa' akai lakat makatula. Ioupana Okou sumangit kaga', rayusin mai mambaal ra sala intor poyo ra galing i.

⁶Akai ngaangai' makatula, baalon mai ra moonsoi no pana majamol kaga'. Sabap ra tula mai, akai mapuso ra tana' ti koson ra saap masiob ru angin.

⁷Kolondo' osoi pana makiasi' Rirun. Kolondo' osoi pana minggaar Rirun koson makiindangan. Nansibuni Kou intor ramon, am mopoloso[81] ramon mapuso sabap ra tula mai.

⁸Kaa' Okou noyo Ama' mai iou TUHAN. Akai ti koson ra tana' bandulan, am Okou koson ra ulun manukang ra paliuk. Okou noyo namangun ramon.

⁹Ginio ra pai' noyo ianga' sangit ramon, kapoam mangkara' ra tula mai ra sabuoi-buoi no. Akai ulun Muno, pakaasi' noyo ramon.

¹⁰Bandar-bandar Muno ra matulai masauk koson ra tana' kaagisan. Jirusalim masauk ra naluyuan am nasisiluk ayuk

¹¹am Baloi ru TUHAN, baloi ra matulai am makaantak, intok ru kinamatuaan maili mongompor ra TUHAN ra galing i, inumpo ru apui. Ngaangai' intok ra kasagaan mai nasauk boo ra naluyuan.

¹²Iou TUHAN, kalo kia nangimuag Kou ra kasaukan koson raginio? Mongkoror Kou ayuk kia? Polosoon Mu kia akai maimbolo' kaga'?