Read Timugon Murut JISAYA 65 Bible Online

JISAYA 65 - Timugon Murut bible

JISAYA 65

¹Mindagu TUHAN, “Nakatampos Aku no mangiou ra pakiasian ru ulun Kuno, kaa' kalo makiasi' ilo Raki'. Nakatampos Aku no tambuluyon nilo, kaa' kalo kuminam ilo maguyum Raki'. Bansa' ragitio kalo makiasi' Raki', kabalu' pana nakatampos Aku no tumaam, ‘Gitio Aku no. Masaga' Aku mangindangan ramuyun.’

²Masalok Aku tumampos mangapu ra ulun Kuno, kaa' masalok ilo mokotog guang am mambaal ra baal ondo' kalo matanda' am niayuk sumugut ra kasagaan nilo galama'.

³Mangkinibit ilo ra tanduusin Ku sangit Kuno. Mapataak ilo ra taak simbalui giu' ra taman ru dewa-dewa[82] am monolob ra kaminyan giu' ra altar-altar ru dewa.

⁴Bulintok ra rondom mongoi ilo ra luang ru batu am kalabangan koson makipinson ra ulun-ulun namagatoi no. Mangakan ilo ra kual ru bauwi am manginum ra ruu' ru kual ondo' pinataak ra sinungkalalaing.

⁵Kopongo raginio mindagu ilo, ‘Inggalur no ramon. Pai' kambong ramon sabap ra akai ti mapasau kaga' ramuyun!’ Masisang Aku ra ulun makapaliso koson raginio. Sangit Kuno risilo koson ra apui ondo' kalo igondo' kalasa'.

⁶Inaru' Ku noyo ukuman tayar nilono. Ukuman no tinulisan Ku noyo. Kalo polosoon Ku binaal nilono. Balasin Ku

⁷tula nilono am tula ru kinamatuaan nilono. Magasab ilo Raki' ra nonolob ra kaminyan tayar ru dewa-dewa giu' ra intok sambaan giu' ra bulur. Ginio ra mangukum Aku risilo nogondo' koson ra binaal nilo ra galing i.”

⁸Mindagu TUHAN, “Kolondo' osoi pana mamatir ra kawa' ru anggur ra moonsoi, kaa' baalon nilo ra wain. Aku pana kalo mamuso ra ngaangai' ulun Kuno; bayagon Ku ilo ondo' mangandoi ayuk Raki'.

⁹Barakaton Ku ulun ru Israil intor ra bansa' ru Jiuda. Papag nilo mompolonggom ra tana' kagunungan Kuno. Ulun pinili' Kuno ondo' mangandoi ayuk Raki' no mayan ra giu' no.

¹⁰Sumamba ilo Raki', am maningganai ra tambiag nilo mongoi ra Dataran Saron tampilon ra kalasaan, am giu' ra Limayak Akor tampilon ra sirangon.

¹¹Kaa' sala' ka ginio pupus mino ondo' manatang Raki' am niayuk kalo mampalio ra Sion, bulur Kuno ondo' matulai,[83] am ondo' sumamba ri Gad am Mini, dewa ru iawo am dewa ru nasip.

¹²Malarom patayan mino sabap ra akau kalo tumaam bulintok ra Aku mampiau, am kalo mangkirongog kau bulintok ra Aku mindagu. Singonon min kalo gumagaya' Raki' am singonon min mambaal ra malaat.

¹³Sotopot no, ulun ra sumamba Raki' am gumagaya' Raki' makaalap ra masuang akanon am inumon, kaa' maitilan am paason kau. Maansukan ilo kaa' asabin kau.

¹⁴Maririmbai ilo am maansukan, kaa' akau mantangi' am malawo guang.

¹⁵Ulun pinili' Kuno mamakai ra inggalan mino koson ra pagulasan, Aku, TUHAN Raja' mamatoi ramuyun, kaa' ilo ondo' gumagaya' Raki' aniin Ku ra inggalan bagu.

¹⁶Osoi-osoi ondo' mayan ra pagun raginio, am ondo' makibarakat makitaak ra barakat ri Aki Kapuuno' ondo' mampagagaya'. Osoi-osoi magibot, magibot ilo ralalom ru inggalan ri Aki Kapuuno' ondo' mampagagaya'. Sabap no kaimbalaan ra galing i natatak am linilianan.”

¹⁷Mindagu TUHAN, “Angunon Ku limbowon bagu am tana' bagu. Kasaukan-kasaukan ra nakasail lilianin lingono'.

¹⁸Pakaansuk noyo am kaantak noyo ra sabuoi-buoi no sabap ra inangun Kuno. Jirusalim bagu ondo' inangun Kuno mototop ra kaansukan am namagun nano maantak guang.

¹⁹Aku galama' maantak guang sabap ra Jirusalim am mamagun nano. Giu' no kolondo' boo tinangian kapoam mampiau koson makiindangan.

²⁰Anak-anak kalo matoi bulintok lakat lalagang, am ulun maawar painawo. Ilo ondo' makaumur maatus ngambilor karaan ra mamulok. Osoi matoi ra kalo poyo makasuku' maatus ngambilor karaan ra natiu' ra ukuman Kuno.

²¹Ulun ondo' manambaloi ayanin no; baloi-baloi no kalo ayanin ru ulun bokon. Ilo ondo' mantanom ra anggur makasia' ra ampos nano; ampos raginio kalo masiaan ru ulun bokon. Ulun Kuno maawar painawo koson ra puun. Majala' ilo makasia' ra ampos ru kandoi nilono.

²³Kandoi nilono masugut, am anak nilono kalo malumpa' ru karaat. Barakatin Ku ilo am papag nilono ra sabuoi-buoi no.

²⁴Ra kalo poyo mopongo ilo makiasi', iniou Ku noyo pakiasian nilono.

²⁵Taani am anak domba masisimpung mangakan, singa' mangakan ra rami koson ra sapi', am kukuo kalo boo makakalalaa'. Giu' ra Sion, bulur Kuno ra matulai,[84] kolondo' boo makalalaa', kapoam malaat.”