Read Timugon Murut JISAYA 7 Bible Online

JISAYA 7 - Timugon Murut bible

JISAYA 7

¹Raja' Agas ioginio buayoi ri Raja' Jotam am akupu ri Raja' Ujia. Bulintok ra Raja' Agas namarinta ra Jiuda, nasauk noyo pangayawan. Raja' Rijin, raja' ru pagun Siria, am Raja' Pika anak ri Rimalia, ioginio raja' ru Israil, namulunsar ra Jirusalim kaa' kolondo' ampos nilo mangala ra bandar no.

²Bulintok ra raja' Jiuda nokorongog ra saujor ru Siria soroi ra libung ru Israil, raja' am ulun nano mangalaa' kaga' saboi monontol koson ra puun ru tataun mauyog ru angin.

³Indagu TUHAN ri Jisaya, “Ibito' noyo anak muno, i Syiar Jasub[8] am ongoi tuum ra Raja' Agas. Mauma' mu io ra ralan intok pangandayan ru ulun mambaal ra konoon, giu' ra pompor ru parit ondo' mapatuluk ra timug intor ra kulam tampilon ra rasawat.

⁴Susubo' io tumampos am pai' kalingas. Kalo pana malaa' io kapoam magalabo. Sangitan ru Raja' Rijin am ulun ru Siria am niayuk Raja' Pika kalo makalalaa' ka lisun intor ra ruo polompor ru luton.

⁵Siria no naguum ra Israil am raja' nano.

⁶Mongoi ilo pangayou ri Jiuda am mangilalaa' ra namagun nano koson makisungka' risilo, am anak ungkuyon ri Tabiil lantikon ra raja'.

⁷Kaa' Aku, TUHAN, minindagu baal raginio kalo igogondo' kasauk,

⁸sabap Siria kalo maikang poyo intor ra Damsyik, pusor bandar nano, am Damsyik pana kalo maikang poyo intor ra Raja' Rijin. Kabalu' pana ralalom buoi onom ngoopor am limo ngambilor, Israil no kalo mogogondo' guang saboi kalo masabayan no koson ra rondo' bansa'.

⁹Israil kalo maikang poyo intor ra Samaria, pusor bandar nano, am Samaria pana kalo maikang poyo intor ra Raja' Pika. Amon ru kalo totopot kau mangintopot Raki', maaru' akau no maratu'.”

¹⁰Rondo' poyo pambalaan pinasaboi ru TUHAN ra Raja' Agas.

¹¹“Pakitaak noyo maa' raginio TUHAN, i Aki Kapuuno' muno manaak rondo' tatandu' rirun, ioginio intor nua' ra pagun ru ulun minatoi giu' ra ragana', kapoam intor ra limbowon giu' ra rasawat.”

¹²Taam Raja' Agas, “Kalo makitaak aku ra tatandu'. Kalo masaga' aku mangkinam ra TUHAN.”

¹³Taam boo i Jisaya, “Rongogo' min toojo, akau papag ru Raja' Daut. Kalo kia poyo sama' okou mangkinam ra orot ru ulun? Musiti' kia okou mangkinam ra orot ri Aki Kapuuno' kuno niayuk?

¹⁴Raino, TUHAN galama' manaak rirun ra tatandu': sangulun ralaa[9] ondo' maapang maganak ra sangulun anak ungkuyon ondo' inggalanin ri ‘Imanuil’.[10]

¹⁵Bulintok ra anak no masukor koson mangalap ra kapatasan galama', pagun no masauk langkaya'.[11]

¹⁶Ra iono poyo ra kalo poyo masuku' bulintok no, karuruo pagun ondo' pinarinta ru raja'-raja' ondo' kalaanin muno iruanin ra naliung-liung.

¹⁷Porotongon ru TUHAN raja' Asyur, am okou mabaya' ra ngaangai' papag muno am niayuk mamagun makaliman ra karaat ondo' malaat kaga' ka atan ondo' natutunan nilo intor ra Israil nakatuliar intor ra Jiuda.

¹⁸Bulintok raginio TUHAN no magisisiuk koson rondo' tatandu' mampiau ra saujor ru Misir ondo' matong koson ra sampanon ru bulongor intor ra pompor ru sungoi Nil, am saujor ru Asyur ondo' matong koson ra sampanon ru sapuon intor ra pagun nilo.

¹⁹Tumimung ilo ra tobo-tobo ondo' mapasuk, lolot-lolot ru kabatuan bulur, am moonong bulungkut makaruui am niayuk limayak masakot.

²⁰Bulintok raginio TUHAN mampagaji' ra sangulun manunukur, ioginio raja' Asyur intor ra sandaup ru sungoi Iprat. Raja' no manukur ra jangut am abuk ra ulu ru ulun ru Israil, am niayuk bulu ra inan nilono.

²¹Bulintok raginio kabalu' pana sangulun manambiag ra sanginan anak ru sapi' am ruo ngainan kambing ayuk,

²²gatas paingkualon ru tambiag no makaukop toojo koson pakuan ru ulun lakat soroi ra pagun raginio. Sotopot no, manginum ilo ra gatas am ruu' maningot.

²³Paat raginio umo ru anggur ra mongoonsoi, ondo' tinanaman saribu ngampuun am mokologo saribu ruit pirok, ngaangai' no tuwin ru sakot am kataunan sulinit.

²⁴Giu' no ulun mangasu ra kana' ondo' potoyon nilo ra panah. Titikop ru pagun no malungkutan ra bulungkut am kataunan sulinit.

²⁵Bulur-bulur ra galing i ondo' inumo tuwin ru sulinit saboi kolondo' sangulun pana masaga' ra giu' no. Tana' raginio masauk ra intok pangkatapan ru sapi' am kambing.”