Read Timugon Murut JISAYA 8 Bible Online

JISAYA 8 - Timugon Murut bible

JISAYA 8

¹TUHAN minindagu raki', “Pangalap rondo' batu pamatikan ra maayo, am patuliso' ragu ragitio ra rasawat no maa' raginio maalap kabasa' ru moonong ulun:[12] ‘Tokowo' ribaki', gaawo' mataki'’.[13]

²Piawo' noyo ruo ngaulun ondo' maintopot koson saukon ra sasi', ioginio Imam Uria am i Jakaria anak ri Jibirikya.”

³Kalo nabuoi ragili am andu' kuno maapang. Bulintok ra anak maino anakon, minindagu TUHAN raki', “Inggalani' io ri ‘Tokowo' ribaki', gaawo' mataki'’.

⁴Ra kalo poyo makapanabit io ‘ina'’ am ‘ama'’, ngaangai' rapu' ru bandar Damsyik am ngaangai' kuliamos ondo' ginaau ru Samaria ibiton ru raja' ru Asyur.”

⁵Minindagu poyo TUHAN raki'.

⁶Kon Nano, “Sabap ra ulun ragitio marara' ra timug ondo' maliuk intor ra Sungoi Syiloa,[14] am makaansuk ilo[15] ra saang ru Raja' Rijin am Raja' Pika,

⁷Aku, TUHAN, mamparatong ra raja' ru Asyur am ngaangai' saujor nano koson mangayou ra Jiuda. Jumalai ilo koson ra liur intor ra Sungoi Iprat ondo' lumuab-luab am masakob tobo nano.

⁸Rumatong ilo ra Jiuda koson ra liur mokopolos ra limbawo am mompolosor ra ngaangai' no.” Aki Kapuuno' mabaya' ritakau! Kawo Nano ondo' pinabingkal manindung ra pagun ragitio.[16]

⁹Pantitimung kano ra malaa', alii ra ngaangai' bansa'! Rongogo' noyo, alii ra intok-intok ra maalur. Tampos kano koson mangayou, kaa' kalaa' kano! Iou, tampos kano, kaa' ra guang malaa'!

¹⁰Baalo' noyo atan inatangan mino, kaa' ngaangai' no kolondo' kasaukan! Pataso' noyo, kaa' ngaangai' no mamungawo ayuk, sabap ri Aki Kapuuno' mabaya' ramon!

¹¹Kinuasa' aku ru TUHAN am pinakara' aku maa' raginio kalo maya' ra ralan ondo' binayaan ru bansa' raginio. Mindagu Io,

¹²“Pai' kou paguum risilo, am pai' kalaa' ra atan ondo' kalaanan nilo.

¹³Karaa' noyo ra Aku, TUHAN Ondo' Maayo Kaga' Kuasa' iono matulai. Aku noyo sotopot no kalaanin min.

¹⁴Sabap ra matulai Aku kaga', masauk Aku koson ra batu kasaruan, am niayuk landak ra ulun ru Jiuda am Israil, am niayuk namagun ru Jirusalim.

¹⁵Masuang ulun makasaru; maratu' ilo am mangapilatan. Malandak ilo.”

¹⁶Akau, maamaya' raki' musiti' no mampauli am magalung ra bilin-bilin ondo' pinataak ri Aki Kapuuno' no raki'.

¹⁷Nansibuni TUHAN no intor ra ulun Nano, kaa' mangintopot aku am malansan Riso.

¹⁸Gitio aku no am anak-anak ondo' pinataak ru TUHAN no raki'. TUHAN Ondo' Maayo Kaga' Kuasa' ondo' namarinta ra Bulur Sion, nanusub ramon koson ra tatandu' ru ulun ru Israil.

¹⁹Kaa' ulun manusub ramuyun makitulu' intor ra ulun mangilong am babalian ondo' konos-konos am kuniam-kuniam. Mindagu ulun, “Sala' ka kia musiti' takau makitulu' intor ra ulun namagatoi koson kaatangan ru ulun lakat poyo maayag?”

²⁰Taam kau koson ragitio, “Rongogo' noyo pangilaan ru TUHAN! Ulun ra kalo matanda' ragu maya' ra pangilaan no, kolondo' kalansanan.”

²¹Ulun ragitio tumanggau ra titikop ru pagun, am mangiluk guang am niayuk maitilan. Sabap ra maitilan, sumangit ilo saboi magulas ra raja' am i Aki Kapuuno' nilo. Kabalu' pana mantingaa' ilo ra limbowon

²²kapoam manginduku' ra ragana', kolondo' atan-atan makito ondo' ak am kapaganan am kalandaman am niayuk kasilukan ondo' kumapit. Patirin ilo ra intok molondom kaga'.

²³Kolondo' ralan nilo lumabus ra kapaganan no. Tana' ru bansa' ru Jibulon am bansa' ru Naptali igondo' tinauyu'. Kaa' orou ra tauli no, intok raginio urumaton, ioginio intor ra Raat Tanga' saboi ra tana' giu' ra sandaup ru Jordan tampilon ra sirangon, am poyo saboi ra Galilia intok ru ulun bansa' ra bokon minayan.