Read Timugon Murut JISAYA 9 Bible Online

JISAYA 9 - Timugon Murut bible

JISAYA 9

¹Ulun ondo' mugar ralalom kalandaman nakakito ra sinda ondo' mapaang toojo. Mayan ilo ralalom babara' ru kapatayan, kaa' ragino matampulau ilo ru sinda mapaang.

²Iou TUHAN, inanian Mu ilo ra kaansukan maayo,[17] binansuk Mu ilo. Maansukan ilo sabap ra binaal Muno, koson ra ulun maansukan bulintok mangkumos ra tatanom, kapoam mantatayar ra kuliamos ginaau.

³Inalap Mu noyo kapaganan nilo ondo' maagat, am tataun pikulan intor ra limbawo nilono. Kinala Mu bansa' ondo' mangimpai am mantaligamis ra ulun Muno, koson ra Okou nangala ra saujor ru Midian ra galing i ayuk poyo.

⁴Kasut ra sinulungan ru saujor ondo' mangayou am nansalinut bayang nilo ondo' naluitan ru raraa' makai' mosolob ru apui.

⁵Sangulun anak inanak ra tayar takau! Sangulun anak ungkuyon pinataak ritakau! Masauk Io ra tingganai takau. Pampiawan Riso no “Mamiminson ra mapintar”,[18] “Aki Kapuuno' ra Matulai”, “Ama' ra Mantilayun”, “Raja' Pababansayan”.

⁶Kuasa' Nano marayus rumuang; pamarintaan Nano kalinuos ayuk. Mamarinta Io koson suali ru Raja' Daut, pamarintaan Nano mimpuun ra ukum am katimpakan intor ragino saboi ra pupus ru tana' ti. Ngaangai' kasaukan raginio maaru' baalon ru TUHAN Ondo' Maayo Kaga' Kuasa'.

⁷TUHAN mamparatu' ra ukuman ra pamarintaan ru Israil, ioginio papag ri Jakub.

⁸Ngaangai' namagun ra Israil am bandar Samaria makapandai ra Io noyo mambaal ra kasaukan ragitio. Ragino lumimbau ilo am masawat guang. Konilo,

⁹“Baloi-baloi binaal intor ra bata napuut noyo, kaa' baalon mai sagulio' baloi-baloi no intor ra batu pinopol. Puun ru nunuk tinagar, kaa' aligin mai ra tataun sidar ondo' moonsoi kaga'.”

¹⁰Paimbuoron ru TUHAN no pantula' nilono[19] koson mamulunsar risilo.

¹¹Bansa' ru Siria tampilon ra sirangon am bansa' ru Palistin tampilon ra kalasaan mampagaal ra kabang koson monolon ra Israil. Kaa' kabalu' pana masauk baal raginio, sangit ru TUHAN lakat poyo kalo malulu'; lakat Io poyo masaga' mangukum risilo.

¹²Ulun ru Israil lakat poyo kalo tumalikur intor ra tula. Kabalu' pana TUHAN Ondo' Maayo Kaga' Kuasa' nangukum risilo, kaa' lakat ilo poyo kalo sumaguli' Riso.

¹³Songorou ayuk TUHAN no mangukum ra tingganai-tingganai ru Israil am mamagun. Ulu ru Israil Ingguluin am iku' pututin No.

¹⁴Ulu ru Israil ioginio ulun-ulun mangatutuo am ulun urumaton kaga', am iku' nano ioginio nabi-nabi ondo' manaak ra pangilaan mampalayau!

¹⁵Tingganai-tingganai ru mamagun nampalayau am nakajajou ra mamagun.

¹⁶Ginio ra kalo polosoon ru TUHAN ulun mamulok nilo lumabus. Kalo igogondo' Io pakaasi' ra ulun napuor am lalaing nailusan ra matuo, sabap ra ngaangai' ulun no namatir ra pangintapatan am liminaat. Nansalinut raguon nilono malaat. Kaa' masauk pana baal raginio, sangit ru TUHAN lakat poyo kalo malulu'; lakat Io poyo masaga' mangukum risilo.

¹⁷Kalaatan ru ulun raginio manimbula' koson ra apui monolob ra kusingan am kaalaban. Simbula' nano koson ra kataunan nosolob ondo' lisun nano makapal.

¹⁸Sabap ra TUHAN Ondo' Maayo Kaga' Kuasa' siminangit toojo, ukuman Nano koson ra apui ondo' nonolob ra titikop ru pagun no am niayuk namagun nano. Moonong ulun mangkara' ayuk ra kaatangan ru inan nano galama'.

¹⁹Giu' ra titikop ru pagun ulun mamungkayut am mangakan ra atan ayuk maakan, kaa' kalo maasug ilo. Pabukat galama' pana akanon nilo.

²⁰Namagun ra Manasi am namagun ra Ipraim mangayou ra rondo' am bokon, am mababaya' ilo mamulunsar ra Jiuda. Kaa' masauk pana baal raginio, sangit ru TUHAN lakat poyo kalo malulu'; lakat Io poyo masaga' mangukum risilo.