Read Timugon Murut IMAMAT 11 Bible Online

IMAMAT 11 - Timugon Murut bible

IMAMAT 11

¹Nanaak TUHAN ri Musa am i Arun ra aturan ragitio

²ra tayar ru ulun ru Israil. Maakan mino atan ayuk bibiag ru lantur

³ondo' makajajampang am ondo' manapa' ra akanon ra kainduo no.

⁴Kaa' kalo maakan mino unta, karuui batu kapoam arnab. Bibiag-bibiag ragitio karaan ra majamol sabap ra kabalu' pana manapa' ra akanon ra kainduo no, kaa' kolondo' jajampang.

⁷Pai' pangakan ra bauwi. Musiti' karaan bauwi no majamol kabalu' pana makajajampang, kaa' kalo manapa' ra akanon ra kainduo no.

⁸Pai' akano' bibiag-bibiag raginio, am pai' kombongo' baangkai nano; mangajamol bibiag-bibiag raginio.

⁹Maakan mino ngaangai' salinut ru papait ondo' makasunsulur am makasisi',

¹⁰kaa' kalo maakan mino atan ayuk bibiag ondo' biag giu' ralalom timug am ondo' kolondo' sunsulur am sisi'.

¹¹Bibiag koson raginio musiti' karaan ra majamol. Kalo maakan min ginio kapoam mangambong ra baangkai no.

¹²Kalo maakan mino atan ayuk bibiag ondo' biag ralalom timug am ondo' kolondo' sunsulur am sisi'.

¹³Kalo maakan mino susuit-susuit ragitio: Susuit kanui, puok, ngaangai' salinut ru kanui, susuit nasar, bangkaak, susuit unta, susuit camar, susuit ranggung, susuit pucung, am ngaangai' salinut ru susuit kanawai, undan, kosa am bangkawot.

²⁰Ngaangai' bibiag mangalumot ondo' makakawo no majamol,

²¹ondo' ayuk am bibiag mangalumot ondo' tumindak.

²²Maakan mino gapu', ilik am gapu' masansam.

²³Kaa' ngaangai' bibiag mangalumot ra bokon ondo' makakawo am niayuk ondo' kaam-kaam musiti' karaan ra majamol.

²⁴Sasangulun ondo' mangambong ra baangkai ru bibiag ragitio majamol saboi ra tumolop mato ru orou: Ngaangai' bibiag ra makasalindu, ondo' ayuk am ondo' makajajampang am ondo' manapa' ra akanon ra kainduo no, am ngaangai' bibiag ondo' apat kalayam am ondo' makasalindu kumayus. Osoi ondo' magibit ra baangkai salinut ru gitio musiti' mampupu' ra bayang nano, kaa' io magulayun majamol saboi tumolop mato ru orou.

²⁹Tikus mondok, tikus, totok, andaatan am ngaangai' salinut ru palaki' sukat musiti' karaan ra majamol.

³¹Sasangulun ondo' mangambong ra bibiag no kapoam baangkai nano, majamol saboi tumolop mato ru orou.

³²Amon ru maratu' baangkai ru bibiag no ra rasawat ru atan ayuk kuliamos, majamol kuliamos no; intor kia kuliamos no ra tataun, konoon, kungkung kapoam karung, kalo karaan atan pana pamakayan ru kuliamos raginio. Kuliamos raginio musiti' paabugon ra timug, kaa' kuliamos raginio magulayun majamol saboi tumolop mato ru orou.

³³Amon ru maratu' baangkai no ralalom ru pagangan tana', ngaangai' ondo' soroi ra ralalom no majamol, am musiti' popolon pagangan no.

³⁴Atan ayuk akanon ondo' kaindalaman no maakan majamol, amon ru matiu' ra timug intor ra pagangan no, am inumon ondo' soroi ralalom ru pagangan no majamol niayuk.

³⁵Atan ayuk ondo' maratuan ru baangkai no majamol. Amon ru kuliamos no oven tana' kapoam rapuan arang, musiti' popolon kuliamos raginio.

³⁶Kaa' taur ru timug am tulubong kalo majamol, kabalu' pana ondo' ngaangai' ra bokon no majamol paat ra matiu' ra baangkai no.

³⁷Amon ru maratu' rondo' ra baangkai no ra rasawat ru sampug ondo' tonomon, kalo majamol sampug no.

³⁸Kaa' amon ru tatanga' abugon sampug no ralalom ru timug am maratu' rondo' ra baangkai no ra rasawat no, majamol sampug no.

³⁹Osoi mangambong ra baangkai ru bibiag ondo' kalo majamol masauk ra majamol saboi tumolop mato ru orou.

⁴⁰Osoi mangakan ra atan pana tayar intor ra baangkai ru bibiag no musiti' mampupu' ra bayang nano, kaa' magulayun io majamol saboi tumolop mato ru orou. Osoi magibit ra baangkai no musiti' mampupu' ra bayang nano, kaa' magulayun io majamol saboi tumolop mato ru orou.

⁴¹Kalo maakan mino bibiag mongoborok ondo' kaam-kaam ra tana',

⁴²ondo' kia mamuntana', mugar ra apat kalayam, kapoam ondo' masuang kalayam.

⁴³Pai' jamali' inan mino ra mangakan rondo' ra bibiag raginio.

⁴⁴Aku noyo TUHAN i Aki Kapuuno' min; pagilalain min maa' raginio magulayun kau matulai, sabap ra Aku ti matulai.

⁴⁵Aku noyo TUHAN ondo' nagibit ramuyun miningkual intor ra Misir, maa' raginio masauk Aku ri Aki Kapuuno' mino. Musiti' kau matulai sabap ra Aku ti matulai.

⁴⁶Ginio noyo aturan intor ra bibiag, susuit, ngaangai' ondo' biag ralalom timug, am ondo' mugar ra tana'.

⁴⁷Pagilalain mapasuai ra atan ondo' kalo majamol am atan ondo' majamol, bibiag ondo' maakan am bibiag ondo' kalo maakan.